1 Hundei Ilɑɑɔ̃ í fɔ dee dee í ni si ɑwɑɑtii ɑnkɑ̃ɑnyi inɛ ɡɔ ŋɑ ɑɑ jɔ̀ kpɑ̃ɑi nɑɑnɛ ku dɑsi, ɑ mɑ́ɑ jirimɑ idei woo dĩ ijui inɛ ŋɑ do kukɔsii Seetɑm. 2 Dimii kukɔsi nŋu wɑ nɑɑi hɑi bi ilu muɑfiti ŋɑ do woo sɔ ibo ŋɑ. Inɛ ŋɑu ɑ̀ lele idɔ nŋɑ hee ci yɑ yɛ tɑɑle nŋɑ mɑ́. 3 Amɑnɛ dimi bɛɛbɛ ŋɑi ɑ̀ yɑ ni kù sĩɑ inɛ ŋɑ ɑ so njɛ. Nɔ ɑ̀ yɑ nyi ɑ ni mɑ́ ijɛ ɡɔ ŋɑ ɑ̀ wɛɛ iyi kù sĩɑ inɛ ŋɑ ɑ jɔɔ, bɑɑ do iyi ijɛ ŋɑu Ilɑɑɔ̃ í tɑkɑ ŋɑi ku bɑ woo dɑsiɛ nɑɑnɛ ŋɑ iyi ɑ̀ mɑ̀ ntɔu ɑ yɑ jɔɔ do sɑɑbu ɑjɔ. 4 Nkɑ̃mɑ kù wɑ si iyi ɑɑ nyɔ, domi mii iyi Ilɑɑɔ̃ í tɑkɑ fei mii jiidɑi, nɔ í sĩɑ kɑ ɡbɑ fei ndɛɛ do sɑɑbu. 5 Ntɔ ntɔ, mii fei í mɑ́i bii ɑ̀ wɑɑ ceò icɛ do yɑɑse bɛi idei Ilɑɑɔ̃ í fɔ do bii ɑ̀ wɑɑ ce kutɔɔ.

6 Bii ì wɑɑ kɔɑ woo dɑsi Jesu nɑɑnɛ ŋɑ si bisiu ihɛ̃, ɑɑ jɛ woo ce icɛ jiidɑi Jesu Kirisi, nɔ nɑɑnɛ ku dɑsi do idei kukɔsi jiidɑ iyi ì wɑɑ too si ɑ́ yɛi bɛi ijɛ iyi ì wɑɑ nɑ hundeɛ. 7 Ammɑ kɔsi ɑrɑ́ hɑi nɛ yɑɑse ŋɑ iyi ɑ kù wɑɑ too si idei Ilɑɑɔ̃. Hɑnyɑ i ce kuwɛɛɛ si bɛi ɑ́ dɔ̃ɑ Ilɑɑɔ̃ si. 8 Ntɔi, icɛi ɑrɑ ɑrɑnfɑ̃ɑniɛ kù lɑ, ɑmmɑ idei Ilɑɑɔ̃ ku leekĩ si í nɛ ɑrɑnfɑ̃ɑni si mii fei, domi si bɛi ɑ̀ nɛ kuwɛɛi nsɛi do ti ɑlɑ. 9 Ide iyi ɑ̀ fɔu bɛ ide ilu nɑɑnɛi iyi í jɔ i yɔ ɑwɔ i ɡbɑ ŋɑ mɑm mɑm. 10 Nɑ ŋɔi í ce ɑ̀ jɑbu ɑ̀ wɑɑ ceò icɛ, domi kpɑ̃ɑ ku cɔ nwɑ si Ilɑɑɔ̃i í wɑ, nŋu iyi í jɛ icui kuwɛɛ, nɔ í jɛ woo fɑɑbɑi inɛ fei, woo dɑsi Jesu nɑɑnɛ ŋɑ mɔm nii ɑ̀ re.

11 Sɔ̃ ŋɑ ɑ jirimɑ mii ŋɑu ihɛ̃ nɔ i kɔ nŋɑ si cioɛ. 12 Mɑɑ̀ ti i jɔ̀ ɑ dondɑɛ nɑ ɑwɑɑsũ ku jɛɛ, ɑmmɑ jɔ̀ i nyisi woo dɑsi Jesu nɑɑnɛ ŋɑ yɑɑse jiidɑ si ide ku fɔɛ, do kookoosui kuceɛ, do kubiɛ, do nɑɑnɛ ku dɑsiɛ, do dee dee ku jɛɛ. 13 Hee n mɑɑ n to wɑ, hɑnyɑ i kɑ kukɔi idei Ilɑɑɔ̃, nɔ i kɔ inɛ ŋɑ si, nɔ i ce wɑɑzoɛ. 14 Mɑɑ̀ ti i ce ɑtɑfii si ɑmuɑ iyi í wɑ siɛ, iyi Hundei Ilɑɑɔ̃ í muɛɛ si wɑɑti iyi ɑ̀ ce wɑlii nɑ iriɛ nɔ inɛ nɡboi iɡbɛi Jesu ŋɑ ɑ̀ leɛ ɑwɔ si iri. 15 Lɑɑkɑiɛ fei ku wɑ si ideu ihɛ̃, nɔ i nɑɑ ɑrɑɛ mɑm mɑm ku bɑ inɛ fei ku yɛ wɑju ku bɔɛ. 16 Ce lɑɑkɑi do bɛi ì wɑɑ jɛ kuwɛɛɛ do cio iyi ì wɑɑ kɔ si nɔ i yɑ mɑɑ temuɑ si. Bii ì wɑɑ ce bɛɛbɛ, ɑɑ bɑ fɑɑbɑ, ɑwɔ do inɛ ŋɑ iyi ɑ̀ wɑɑ ɡbɔ ideɛ.