1 Nu n‑yaꞌa xa n‑xini‑da ñadɨꞌɨ jan, ijan dada n‑xini‑da ɨɨn ángel taxnuni nuu ñayiu ñuñayiu vax juun andɨu. N‑koko ñuñayiu chi ndii‑ia. 2 Xee kana‑ia. N‑jaꞌan‑ia:

—Naa ñuu kaꞌnu Babilonia. Naa ñuu kaꞌnu Babilonia. Kueꞌe xaloko koo ijan. Kutuu‑i ijan chi ijan ku kuu veꞌe‑i. Kueꞌe kɨt ka ndava ka xini uꞌu ñayiu koo ñuu ijan. 3 Naa Babilonia chi ñayiu ñuu ijan n‑daneꞌe ñayiu ntdantuꞌu nación ñuñayiu xa kava‑i xiꞌin ñayiu ñatu kuu ñadɨꞌɨ‑i a yɨɨ‑i. Ná kuu anu ɨɨn se n‑xini ndɨdɨ́ xa koꞌo‑s, daa ka kuu anu‑i xa kada‑i xijan. Ka kidakuechi se ka taxnuni ntaka dava nación xiꞌin ñadɨꞌɨ Babilonia jan. Se ka xeen te ka nadiko‑s nituꞌu ñuñayiu, yo n‑ka kukuika‑s xa ka najueen‑s te ka nadiko‑s ndatniu nuu ñayiu ñuu Babilonia jan —kuu ángel, n‑jaꞌan‑ia.

4 N‑teku ntuku‑da xa n‑jaꞌan andɨu. N‑jaꞌan:

—Ta kee koio ndoꞌo, ñayiu ka kuu daꞌya Ianyuux, ñuu dian na ñaꞌa kada koio‑n kuechi ka kida‑i. Ta kee koio xa maxku ndaꞌu yaꞌa koio‑n ná ndaꞌu yaꞌa ñayiu dian hora na kada uꞌu Ianyuux‑yɨ. 5 Nde andɨu ndeꞌa‑ia xa ka kida‑i. Xini‑ia ntdaa xaloko ka kida‑i. 6 Kada uꞌu koio‑n ñayiu n‑ka kida uꞌu ñaꞌa. Ndeꞌe ka kada uꞌu‑n‑yɨ. Ñayiu n‑ka kida uꞌu ñaꞌa ɨɨn vuelta, uu vuelta kada uꞌu‑n‑yɨ. Dandenaa koio‑n xa n‑ka kida ñaꞌa‑i. 7 Xaxeꞌe xa ndeꞌe n‑ka ku iꞌni‑i xiꞌin tvini‑i xiꞌin xaxii‑i, xijan kuu xa ndeꞌe kada uꞌu‑n‑yɨ. Kada koio‑n xa ndaꞌu na yaꞌa‑i. Dɨuni kada koio‑n xa na kukoꞌyo ini‑i. Xko jaꞌan mee xko jaꞌan ɨɨn ñá kuu kuenda kɨu ñuu Babilonia. Duꞌa xko jaꞌan‑ña: “Kuu‑ro ñá taxnuni. Ndito yɨɨ‑ro, ñatu n‑xiꞌí‑te. Ña kukoꞌyo ini‑ro.” 8 Xaxeꞌe xijan ndaꞌu yaꞌa ñayiu ñuu dian. Kuu tnama. Koo xa koꞌyo ini. Kayu ñuu dian. Te kuú koio‑i. Idii ni kɨu yaꞌa koio‑i ntdaa xijan. Dayaꞌa ñaꞌa Ianyuux juxtixia xaxeꞌe xa taxnuni‑ia.

9 Na jini se ka taxnuni ntaka ñuu ñuñayiu n‑ka kidakuechi xiꞌin ñadɨꞌɨ kuu Babilonia jan xa kane ñuꞌa ñuu‑ña xa kayu, ndaꞌi koio‑s. Kueꞌe tvini n‑ka xe juꞌun‑s xiꞌin‑ña xa n‑ka xo xeen‑s ndatniu yo yaꞌu n‑ka xo nevaꞌa‑s xiꞌin‑ña.

10 Xika kunujuiin koio‑s xa na ñaꞌa ndaꞌu yaꞌa koio‑s ná yaꞌa ñayiu ñuu ijan, te juñaꞌa tnaꞌa‑s:

—Naka ndaꞌu n‑yaꞌa ñayiu Babilonia. Naka ndaꞌu n‑yaꞌa ñuu kaꞌnu jan. N‑xo taxnuni ñuu jan n‑kuu. Idii ni hora ndaꞌu n‑ka yaꞌa‑i xa n‑ka yaꞌa‑i juxtixia.

11 Hora na jini se ka xeen te ka nadiko‑s, dɨuni kukoꞌyo ini‑s te ndaꞌi koio‑s xaxeꞌe ñuu ijan chi mayo ka jueen xa ka diko‑s. 12 Xa ka diko‑s kuu oro, plata, yuú vili xndaa yo yaꞌu, perla, daꞌma linu, daꞌma seda, daꞌma tndee ndɨjɨn ndiꞌi, daꞌma kueꞌe yo yaꞌu, xiꞌin ntdantuꞌu nuu yutnu vili xeꞌen, yutnu yo yaꞌu, bronce, hierro, marmol, ndatniu marfil du. 13 Ka diko‑s canela xiꞌin ntaka xa keé nuu ndeyu, duxa tnuu, duxa kuixi, yuchi vili xeꞌen, vinu, aciti, yuchi trɨu, mee trɨu du. Ka diko‑s ngutu, tkachi, caballu, carreta du. Dɨuni ka diko‑s se kadatniu duꞌa. 14 Te jaꞌan koio‑s nuu ñayiu ijan:

—Ma kaxi ka‑n xavidi daa n‑xo tna ini‑n. Mayo ka‑n kunevaꞌa xa yo yaꞌu, ni ma kukutu ka‑n xa yo yaꞌu. Ma uun ka niꞌi‑n xijan.

15 N‑ka kukuika se ijan xaxeꞌe xa yo n‑ka xo xeen ñayiu Babilonia ndatniu‑s jan. Xika kunujuiin koio‑s xa na ñaꞌa ndaꞌu yaꞌa koio‑s ná yaꞌa ñayiu ñuu ijan. Kukoꞌyo ini koio‑s te ndaꞌi‑s.

16 Na yaꞌa xijan, juñaꞌa tnaꞌa‑s:

—Ñayiu ijan n‑xo ndixi daꞌma linu vaꞌa, daꞌma tndee ndɨjɨn ndiꞌi xiꞌin daꞌma kueꞌe yo yaꞌu. N‑ka xo kukutu dujun‑i, ndaꞌa‑i, dɨkɨ‑i dɨkɨ oro, yuú vili xndaa te yaꞌu xiꞌin perla. 17-18 Idii ni hora n‑naa ntdandituꞌu xa yo yaꞌu jan te ña tuu ka.

Hora na jini se dakaka barcu xiꞌin ñayiu ndido‑i xiꞌin se ka xata daꞌma xa kaka‑i xiꞌin dava se ka kidatniu xiti barcu jan xa kane ñuꞌa xa kayu ñuu jan, xika kunujuiin koio‑s tuku te kana koio‑s:

—Ni ɨɨn ñuu ñatu n‑xo xee ñuu kaꞌnu ijan.

19 Yo kukoꞌyo ini‑s te ndaꞌi‑s xaxeꞌe ñuu ijan. Te kodo koio‑s ñuꞌu yuchi dɨkɨ‑s. Kana koio‑s:

—Naka ndaꞌu n‑yaꞌa ñayiu Babilonia. Naka ndaꞌu n‑yaꞌa ñuu kaꞌnu jan. Ntdaa se ka kuu xtoꞌo barcu n‑ka kukuika xaxeꞌe xa yo n‑ka xo xeen ñayiu ñuu kuika jan xa n‑ka diko‑s. Idii ni hora n‑naa ntdandituꞌu xa yo yaꞌu n‑xio ijan te ña tuu ka —kachi koio‑s.

Te n‑jaꞌan:

20 —Na kuvete ia xndaxio andɨu. Na kuvete ñayiu n‑kida Ianyuux xa n‑ka nduu‑i ñayiu ii. Na kuvete se n‑tundaꞌa ñaꞌa Jesús xa kada koio‑s tniu‑ia. Na kuvete se n‑ka xo jaꞌan tnuꞌu Ianyuux nuu ñayiu. Na kuvete koio‑s ntdaa‑s chi n‑dayaꞌa Ianyuux juxtixia ñayiu ñuu ijan xa n‑dandenaa‑ia xa n‑ka kida ñaꞌa‑i.

21 Ijan n‑ndoneꞌe ɨɨn ángel ndaku ɨɨn toto kaꞌnu longo kaa ná kaa yodo molino. N‑dajane niꞌno‑ia nuu mar te n‑jaꞌan‑ia:

—Duꞌa dajane Ianyuux ñuu kaꞌnu Babilonia te ma uun ka jini ñayiu ñuñayiu ñuu ijan chi naa. 22 Ma uun ka teku ñayiu xa kande arpa ñuu ijan. Mayo ka teku xa tɨu ñayiu flauta, ni xa tɨu ñayiu strompeta. Mayo ka teku xa kata ñayiu, ni xa tɨu; ni xa kande mayo ka‑i teku. Ma koo ka ñayiu kadavaꞌa ntaka ndatniu xetniu‑ro. Ndondoo‑i naa. Ma uun ka teku ñayiu xa ku kurrɨɨ molino. 23 Ma ku koko ka luz xiti ñuu, ni xiti veꞌe. Mayo ka teku xa ku kuvaa viko tnundaꞌa. N‑ka xo kunuu ñayiu ñuu ijan xa n‑ka xo xeen‑i te yo n‑ka xo diko‑i ntaka ndatniu. Yo n‑ka xo dandaꞌu‑i dava ka ñayiu ñuñayiu, te n‑ka xo chibruju‑i‑yɨ. 24 Ñayiu ñuu kaꞌnu yaꞌa n‑ka xaꞌni ñayiu n‑kida Ianyuux xa n‑ka nduu‑i ñayiu ii. Dava ñayiu n‑ka xaꞌni‑i jan n‑ka xo jaꞌan xa n‑xo jaꞌan Ianyuux nuu‑i. Te xaxeꞌe‑i n‑ka xaꞌni ñayiu ñuñayiu ndɨyɨ.