1 Ta saá xi̱ni i̱ inka̱ ñaángel ña kómí nda̱yí káꞌno, ke̱e ña ñoyívi ni̱no, ta va̱xi noo ña nda̱ ñoyívi no̱o̱ ñoꞌo̱. Ndíxin níí ña vi̱ko̱ yaa, ta ñii ñakua̱ꞌnkú xi̱no nduu ña no̱o̱ yóo si̱ni̱ ña. Ta náyeꞌe no̱o̱ ñaángel yóꞌo, nda̱tán náyeꞌe ño̱ꞌo káꞌno ña yéꞌe ndiví. Ta nda̱tán yóo o̱vi̱ yito̱n siꞌi̱n tón síkón ní, tón yíta ndíso veꞌe síkón, saá yóo xa̱ꞌa̱ ñaángel yóꞌo. Ta nda̱tán náꞌa ña xíxi̱ xíꞌin ñoꞌo̱, saá náꞌa xa̱ꞌa̱ ñaángel yóꞌo. 2 Ñii nomi tutu loꞌo ña na̱ndika kánóo ndaꞌa̱ ñaángel yóꞌo. Ta xa̱ꞌa̱ kuaꞌá ña ñíndichi ña no̱o̱ takuií mi̱ni, ta xa̱ꞌa̱ yitin ña, ñíndichi ña no̱o̱ ñoꞌo̱ yi̱chí. 3 Ta xíꞌin ndiꞌi ndee̱ ñaángel yóꞌo ni̱nda̱ꞌyi ña. Nda̱tán ndáꞌyi tíleón, saá ni̱nda̱ꞌyi ña. Ta saá xa̱ndi̱ko̱n xi̱ni̱ so̱ꞌo i̱ nda̱tán káꞌndi ndáꞌyi sa̱vi̱ u̱xa̱ yichi̱, ta ti̱xin ñayóꞌo xi̱ni̱ so̱ꞌo i̱ ndiꞌi to̱ꞌon ña ni̱ka̱ꞌa̱n ña ni̱nda̱ꞌyi sa̱vi̱ yóꞌo. 4 Ta saá, xa yóo tiꞌva i̱ taa i̱ to̱ꞌon yóꞌo, ta xi̱ni̱ so̱ꞌo i̱ inka̱ to̱ꞌon ña ki̱xi ñoyívi ni̱no, ta ni̱ka̱ꞌa̱n ña xíꞌin i̱:

―Chikaa̱ seꞌé ún ini mi̱i ún to̱ꞌon xi̱ni̱ so̱ꞌo ún ña ni̱ka̱ꞌa̱n nda̱tán káꞌndi ni̱nda̱ꞌyi sa̱vi̱ u̱xa̱ yichi̱, ta o̱n taa ún nda̱ ñii to̱ꞌon xi̱ni̱ so̱ꞌo ún yóꞌo ―káchí to̱ꞌon ña ki̱xi ñoyívi ni̱no xíꞌin i̱.

5 Ta saá ñaángel ña ñíndichi xíꞌin ñii xa̱ꞌa̱ ña no̱o̱ takuií mi̱ni, ta xíꞌin inka̱ xa̱ꞌa̱ ña no̱o̱ ñoꞌo̱ yi̱chí, nda̱níꞌi ña ndaꞌa̱ kuaꞌá ña chí ni̱no, 6 ta ni̱ka̱ꞌa̱n ña, káchí ña saá:

―Ndios kúu ta̱a ta̱ táku̱ ndiꞌi saá ki̱vi̱, ta ki̱sa va̱ꞌa ra ñoyívi ñoꞌo̱ xíꞌin ñoyívi ni̱no, xíꞌin ndiꞌi ña yóo ndiꞌi saá ñoyívi. Ta saá tuku ki̱sa va̱ꞌa ra takuií mi̱ni xíꞌin ndiꞌi ña ñóꞌo ti̱xin takuií mi̱ni yóꞌo. Ta mi̱i Ndios yóꞌo káchí ra ndí ndixa o̱n kundati ka̱ ra. 7 Saá chi tá kixaa̱ ki̱vi̱ ñaángel ñau̱xa̱ tivi ña tón trompeta, tá mií saá kixáꞌá kundivi ndiꞌi ña chi̱tóni̱ Ndios xa̱ꞌa̱ ndiꞌi ni̱vi xíꞌin ndiꞌi ña ki̱sa va̱ꞌa ra. Ña chi̱tóni̱ Ndios yóꞌo xi̱kuu ña o̱n vása ní‑kunda̱a̱ va̱ꞌa ini ni̱vi, ta ndixa Ndios kasa ndivi ra ndiꞌi ña chi̱tóni̱ ra, nda̱tán yóo ña ni̱ka̱ꞌa̱n ra xíꞌin naprofeta, na xi̱kuu na ki̱sa chiño no̱o̱ ra kui̱ya̱ xi̱na̱ꞌá ―káchí ñaángel, xi̱ni̱ so̱ꞌo i̱.

8 Ta saá tuku xi̱ni̱ so̱ꞌo i̱ to̱ꞌon ña ki̱xi nda̱ ñoyívi ni̱no, ta ni̱ka̱ꞌa̱n ña xíꞌin i̱:

―Kua̱ꞌa̱n kiꞌin ún nomi tutu loꞌo ña na̱ndika kánóo no̱o̱ ndaꞌa̱ ñaángel ña ñíndichi xíꞌin ñii xa̱ꞌa̱ ña no̱o̱ takuií mi̱ni, ta xíꞌin inka̱ xa̱ꞌa̱ ña no̱o̱ ñoꞌo̱ yi̱chí ―káchí to̱ꞌon xíꞌin i̱.

9 Ta saá ni̱xa̱ꞌa̱n i̱ no̱o̱ ñaángel, ta ni̱ka̱ꞌa̱n i̱ xíꞌin ña:

―Taxi ún nomi tutu loꞌo ña níꞌi ún ndaꞌa̱ i̱.

Ta ni̱ka̱ꞌa̱n ñaángel xíꞌin i̱:

―Va̱ꞌa kiꞌin ún tutu yóꞌo ta kaxi ún ña. Visi ní ña, nda̱tán visi ño̱ño̱, saá visi ndasa ña yuꞌu̱ ún. Ta saá ni, tá xaa̱ ña nda̱ ti̱xin ún, ta ndasa yo̱va̱ ña ndiꞌi ti̱xin ún ―káchí ñaángel xíꞌin i̱.

10 Ta na̱kiꞌin i̱ nomi tutu loꞌo yóꞌo ndaꞌa̱ ñaángel, ta xa̱xi i̱ ña. Ta visi ní ni̱xi̱yo yuꞌu̱ i̱, ta saá ndu̱u yo̱va̱ ní ti̱xin i̱. 11 Ta saá tuku ni̱ka̱ꞌa̱n ñaángel xíꞌin i̱, káchí ña saá:

―Xíni̱ ñóꞌó ka̱ꞌa̱n ndoso ún to̱ꞌon ña káꞌa̱n Ndios xa̱ꞌa̱ ña kundoꞌo kua̱ꞌa̱ ní ni̱vi, ta xa̱ꞌa̱ ña kundoꞌo narey na xáꞌnda chiño no̱o̱ na. Ta ni̱vi yóꞌo kúu na táku̱ kua̱ꞌa̱ ní ñoo válí xíꞌin kua̱ꞌa̱ ní ñoo náꞌno, ta káꞌa̱n na kua̱ꞌa̱ ní no̱o̱ to̱ꞌon ―saá ni̱ka̱ꞌa̱n ña xíꞌin i̱.