Na wi'gatign
elgi'tmut Gisiteget
Gisi Mgnaji Mimajuinu'g
Gegnugwataqan ugjit ula wi'gatign
Na wi'gatign ugjit na gisi mgnujig mimajuinu'g ewi'gas'g ugjit apgua'lanew ula a'sutmewinu'g. Na tetuji gitnm'tijig getu iga'tu'tij ta'n teli gtlams'tasultijig. Ula wi'gatign ewi'gas'g ugjit apgnua'lanew aq munso'ltinew ta'n tel siawi gtlams'tasultijig. Ta'n wen ewi'giget musga'tugsi'gw Westaulg na wijei nisgamewit 'st'ge' Gjinisgam. Telui'tatl Westaulgl, “Gwi's.” Na tel musga'tugsi'gw me' espe'lin Westaulgl je mu ta'n pas'g wenn ansale'wiliji, iganigjitegewinu'g gisna we'gaw Mowisal.
Pegisinneg gisa'tun pilei gis agnutmamgewei ugjit mimajuinu'g aq iganapti'gmugsi'gup wa'so'q. Ta'n teli np'g'pnaq gujjieweigtug gis jigla'toqol gtlue'utinal. Jigs'tmug ignmugsitesnu atlasmuti ggamlamuninal.
Ta'n wen ewi'giget migwimugsi'gw negmow ta'n sa'q getlams'tmu'tipnig. Gegnu pmita'pnig ta'n pas'g goqwei getu tliaq. Telimugsi'gw, ‘Mut legetmnenu ta'n teli gtlams'tasulti'gw awna punajo'tmnej ms't goqwei ta'n etegigjennugsi'gw aq igani ltaigw majulgwalanenu Westaulg. Ula Gisiteget tel puatg. Ge' siaw lapultinej Westaulgeg. Mo puniegup ugjit ta'n teli amasgipnnut'p aq gujjiewto't'p.
Gatu awna gisipugutg ms't goqwei aq nige' pemgopit ugt'pung ugtinaqanmg Gjinisgam Gisitegelitl mutputimg.
Ta'n goqwei ewi'gas'g ula wi'gatignigtug
Gjinisgam wet saputi glulugsi'gw uggwisg (1.1-3)
Westaulg me' espe'g aq ta'n pas'g tegen ansale'wijig (1.4–2.18)
Westaulg me' espe'g aq Mowiso'q aq Ja'suao'q (3.1–4.13)
Negm na mawi espe'g patlia's (4.14–7.28)
Mawagnutmamgewei ta'n gisitoq maw gelu'lg (8.1–9.28)
Pas'g newgt ta'n teli np'g'p aq na tepiaq (10.1-31)
Amujpa siawi majulgwalug Westaulg, nige' aq iapjiw (10.32–13.25)
1
1 Gi's na nige' sa'q, Gjinisgam Gisiteget i' glulapni gujjina'gi'g. Gaqais nemi'gl ta'n teli agnutmaji. Wet saputi glulasni iganigjitegewinu'gi'g. 2 Gatu nige', ula na'gwegl, wet saputi glulugsi'gw uggwisg. Negm na Gisiteget newgtunatl uggwisl teluisilitl, Westaulg. Etna na negm ta'n wet sapu tl lugwet, ta'n teli'toqop ugs'tqamu. Negm na newgte'jilitl ta'n Gisiteget megenapnn ugjit ugtaligamlin 'ms't goqwei enmi giaspiaq. Se'sus na. 3 Weji paqtasit Gisiteget uggepmitelgaqanm aq wijei tel Nisgamewit 'st'ge' Ujjl. Nujo'tg ugs'tqamu aq 'ms't goqwei mawn'g ta'n negm teluej. Na tel mawi'gna'qal ugglusuaqanml. Gisa'laji mimajuinu'g gis waqama'tuan ugtlue'utiwal, aq nige' epit wa'so'q ugtina'qanmg Gisitegelitl, ta'n mawi espe'litl aq ta'n pajiji melgi'gna'litl.
Gjinisgam uggwisl mawi espe'litl je mu ansale'wijig
4 Gjinisgam na uggwisl gisa'lapnn me' mawi espe'litl je mu na ansale'wijig. Pa na wijei Gjinisgam ignmuatl wisun me' aji espe'g je mu ta'n te'sijig ansale'wijig. 5 Gjinisgam telimatl uggwisl,
“Gi'l nige' 'ngwis. Gisgug nige' ni'n na gujj.”
Gatu menaq ula telimagul ansale'wilitl. Wesgumatl uggwisl teluej,
“Ni'n ujjitew aq negm 'ngwisitew.”
Gatu menaq ula telimagul ta'n pas'g tegen ansale'wilitl. 6 Ta'n tujiw Gjinisgam Gisiteget getu petgimateg newgtunatl uggwisl ula ugs'tqamug ap na teluet,
“Ni'n Gjinisgam teluei,
‘Ta'n te'sijig ntansale'witemg
amujpa na, emtoqwala'titl.’ ”
7 Etna na ula ta'n Gjinisgam teluet ugjit ugtansale'witemg,
“Ni'n, Gjinisgam, gisi'gig ntansale'witemg
pa wijei aq ugju'sn.
Smtug tela'taqatiji ta'n ni'n tel puatm
aq 'ntlugowinu'jmg gisi'gig na tel melgi'gna'tij
pa wijei aq sisue'ugtlin.”
8 Gatu ugjit uggwisl Gjinisgam teluet,
“Gi'l Nisgamewin 'st'ge' ni'n
aq 'gtelege'wa'gim iapjiwewe'tew.
Iganpugu'tajig 'gtmimajuinumg giasgiwewei.
9 Gesaljig ta'n goqwei mimajuinu'g
tela'taqatiji ta'n tetapu'aq
aq masgelm'jig ta'n tela'taqatijig
aq ta'n mu tetapuaqtnug.
Etna na ugjit ni'n Gjinisgam
ta'n emtoqwalin gisi mgnmul
aq gisa'lul ul'ta'sin
aq maw gepmitelmulin je mu gitapaq.”
Na ula Gjinisgam telimatl uggwisl. 10 Elt Gjinisgam Gisiteget teluet,
“Gi'l, Gjisaqamaw, amgweseweieg gisitu't'p ugs'tqamu
aq 'gpitng el'tu't'p musigisg.
11 'Ms't goqwei gaqi gs'ga's'gt'tew
gat gi'l siaw i'ttes, apji mimajites.
'Ms't ugs'tqamu aq musigisg sa'gu'atal 'st'ge' aligal.
12 Mawanga'tun 'st'ge' pitu'gun
aq tl gawasga'tutew pa wijei aq aligew.
Gatu gi'l apji wije'tes aq mo eigtnug gisigu'en.”
Na ula Gjinisgam Gisiteget telimatl uggwisl. 13 Elt Gjinisgam telimatl uggwisla,
“Tet pa'si 'ntinaqanmg glapis wissuignemg
ta'nig getanijig aq iganpugu'tuatesq.”
Gatu mo eigtnug ula telimagwi ugtansale'witemg.
14 Wenig ta ansale'wijig nige'? Etna na negmow ta'n elugowa'titl Gjinisgaml. Aq elgimujig apoqonmuan ta'nig Gjinisgam ugs'tawiataq.