1 Anutu ko imuŋai iti mi ikampe iti.

Ni ko iswe itunu ramaki kampeŋana kini piti, mi ikam mat kini ma iyaara piti. ✡ Nam 6:24+

2 Naso tomtom ta tirao toono ta boozomen na, tikilaala mbulu kini,

mi zin karkari ta boozomen tiute ulaaŋa kini. ✡ Ŋgo 10:34+; Tit 2:11

3 Anutu, zin karkari ko tiwe kwom mi tipakuru.

Tomtom ta munŋaana men ko tiwit urum.

4 Zin karkari ko menmeen zin mi timbo mboe pu.

Pa nu kamam mbulu ndeeŋeŋana men, mi urpewe pataŋana kizin tomtom.

Mi nu ta kamam peeze pizin tomtom ta timbotmbot su toono i.

5 Anutu, zin karkari ko tiwe kwom mi tipakuru.

Tomtom ta munŋaana men ko tiwit urum.

6 Anutu kiti, ni ikampe iti, tana toono ipiyooto mai ambaiŋana.

Mi kampeŋana kini ko imbotmbot men se kiti. ✡ Mbo 65:11

7 Anutu ko ikampe iti.

Mi tomtom ta tirao pa toono ta boozomen ko timototo i mi tileŋleŋ la kalŋaana. ✡ Mt 12:21, 28:19; Tur 7:9