60
Suŋŋana be Anutu leleene imiili pa wal kini
Mboe ki Dabit Timbombo bekena tipaute zin tomtom. Indeeŋe ta Dabit ziŋan zin Aramea kan mi zin Mesopotamia kan mi zin Soba kan tiparkam malmal pizin na, Yoab imiili mi ipun zin Edom kan 12,000 isu lele ŋgolooboŋana ki tai. Mana Dabit itooro mboe tiŋgi
(2Sam 8; 1Sto 18)
1 Anutu, nu ketem malmal piam, mi pizil ndemem piam.
Tanata koyam koi bizin tilip piam, mi tireege siiri mbolŋana ki kar tiam.
O Merere, motom miili piam mini.
2 Pa iŋgi kembei nu tok toono tiam ma imapalpaala,
mi koroŋ ta boozomen ikamam be isaana.
Tana amsuŋu be urpe toono tiam mini, kokena isaana kat.
3 Wal ku ta niam i. Mi nu kam yam ma amre pataŋana biibi kat.
Nu piwin yam pa yok mbolŋana ki ketem malmalŋana ku. Tabe ikam ma ampa na, kumbuyam mburaana som.
4 Zin wal ta so timototo u mi tileŋleŋ la kalŋom na,
twiiri ku itaŋ bekena tiko pa zaaba tabe ipet i.
5 Anutu, leŋ suŋŋana tiam ti, mi swooro nomom woono ma uulu yam.
Pa niam wal ku ta nu lelem piam ilip. Tana kamke yam pa pataŋana taiŋgi.
6 Muŋgu Anutu imbot lele kini potomŋana, mi iso ta kembei:
“Nio niŋ se paso, aŋporou ma aŋlip kek.
Tana ko aŋpeete toono Sekem mi lele ŋgolooboŋana ki Sukot, mi aŋur ma iwe leyom leyom.
7 Toono pakaana ki Gileat, ina nio tio. Mi toono kizin Manase tomini, ina nio tio men.
Eparaim ta iwe kembei koroŋ ta ipakaala uteŋ.
Mi lele pakaana ki Yudea, ina kembei tete ta iwe kilalan pa peeze ta aŋkamam na.
8 Lele pakaana ki Moap iwe kembei timbiiri ta aŋwwe pa.
Mi lele pakaana ki Edom, ina lele ta aŋpiri kumbuŋ keteene pa.
Mi zin Pilistia kan na, nio aŋlip pizin kek, tana niŋ ise mi kalŋoŋ izalla.”
9 Mi koozi na, asiŋ ta irao be ikam yo ma aŋlip pa koŋ koi bizin mi aŋlela kar kizin ta ka siiri mbolŋana na?
Asiŋ ko imuuŋgu pio, mi iyaaru yo ma aŋla aŋpet lele pakaana kizin Edom?
10 Asiŋ toro? Anutu, nu tau!
Tamen iŋgi pizil ndemem piam,
mi gabgaaba zin malmal kan tiam mini som.
11 Anutu, uulu yam be amlip pa koyam koi bizin.
Pa ulaaŋa ta amkamam la kizin tomtom na, koroŋ sorok.
12 Mi sombe Anutu igaaba yam, nako amlip.
Pa ni irao be ikoto koyam koi bizin ma mburan imap.