1 O Anutu, nu toto sua ku mbukŋana mi urur lelem pa wal ku.

Muŋai yo pa zooroŋana tio.

Pa nu lelem izanzaana pizin mbesooŋo ku, mi muŋaiŋana ku na, biibi kat.

Tana mus sanaana tio ma ila lene. ✡ Lu 18:13; Ŋgo 3:19

2 Nio aŋpaŋoobo pa zaala ku, mi mbulu tio irao pa nu motom som. Tana pus yo pa sanaana tio ta boozomen,

mi kam ma leleŋ iŋgeeze mini. ✡ Ŋgo 22:16; Ibr 9:14; 1Yo 1:9

3 Pa nio aŋkilaala zooroŋana tio kek.

Tana aŋkamam ŋgar pa sanaana tio ikot mbeŋ ma aigule.

4 Sanaana boozomen ta aŋkamam na, ina aŋkamam pa nu itum tau.

Mbulu tio na, irao pa motom som. Tana nu sombe ŋgal motoŋ, ina kam ŋoobo som.

Mi sombe ur kadoono pio, ina indeeŋe men. ✡ Lu 15:21; Ro 3:4

5 Indeeŋe ta anaŋ ipeebe yo ma aŋsu, mi imar indeeŋe koozi na, aŋpaŋobŋoobo pa zaala ku.

Pa indeeŋe ta aŋbotmbot men lela anaŋ kopoono na, aŋsaana pataaŋa kek. ✡ Un 8:21; Ep 2:3

6 Anutu, nu lelem be aŋkam mbulu tio ta boozomen raama leleŋ, mibe aŋto sua ŋonoono men.

Tana itum paute yo pa ŋgar ku ambaiŋana. Naso imbol la leleŋ. ✡ Mbo 119:66; Yo 4:23

7 Ziiri sanaana tio ma ila lene. Naso leleŋ iŋgalaŋ.

Ŋguuru yo ma leleŋ iŋgeeze kat. ✡ Yesa 1:18; Ibr 9:19; Tur 7:14

8 Kam mbulu sa tabe iswe kembei: Nu reege sanaana tio kek. Naso leleŋ ambai mini mi menmeen yo.

Nu ŋgal motoŋ pa sanaana tio ma motoŋ siŋiini isu. Kam ma menmeen yo mini.

9 Motom mbiriizikaala mbulu tio boozomen ta irao pa nu motom som na. Mbulu ta aŋkam ŋoobo na, mus ma ila lene.

10 Anutu, ur ŋgar popoŋana ta iŋgeeze men sula leleŋ, mi pombol yo.

Naso aŋmender mbolŋana mi aŋkiskis mbulu ku. ✡ Ezek 36:26; Yo 3:3+; 2Kor 5:17; 1Pe 1:22

11 Ziiri yo pa kerem uunu pepe.

Mi tatke Bubuŋom Potomŋana pio pepe.

12 Ulaaŋa ta muŋgu kakamam pio na, leleŋ be aŋre mini. Naso leleŋ ndabok kat.

Mi pombol yo be motoŋ leŋleŋ pu.

13 Tonabe aŋpaute zin wal zorzooroŋan pa zaala ku.

Mi zin wal ta mbulu kizin irao pa nu motom som, nako titooro lelen ima ku mini.

14 Anutu, nu ulaaŋa tio.

Sanaana tio na biibi kat. Irao aŋmeete pa.

Tana kamke yo, mi reege ma ila ne.

Naso leleŋ ambai kat, mi kalŋoŋ isala mi aŋpakuru pa mbulu ku ndeeŋeŋana. ✡ Ro 6:23

15 Iŋgi koŋ miaŋ pa sanaana tio ma aŋmaane men. Tana paraurau kwoŋ be aŋso sua.

Naso aŋwe kwom mi aŋpakur zom.

16 Anutu, sombe lelem be aŋpatoronu pa koroŋ sa, so aŋkam.

Mi sombe lelem be aŋneene mbili sa ma iwe patoronŋana pu, so aŋneene.

Tamen patoronŋana ta kembei na, nu lelem pa som.

17 Pa patoronŋana ta nu lelem pa ilip, ina ta kembei: Bela aŋkoto ituŋ, mi leleŋ ipata pa sanaana tio.

Pa tomtom ta so iyamaana itunu kembei mbulu kini irao pa nu motom som, mi leleene ipata pa sanaana kini, na nu ko tit ndomoono na som. ✡ Mbo 34:18; Mt 11:29

18 Anutu, kampe kar Sion mi uulu wal ku.

Urpe siiri mbolŋana ki Yerusalem ma imender mini.

19 Tonabe amkam mini patoronŋana tabe indeeŋe men pa nu motom.

Ko amyo makau ma amneene zin isala artaal ku be ampatoronu pa.

Mi nu ko re ma lelem ambai.