JONAH
(The Book of Jonah)
Jonah Cabu Kawng
Jonah cabu he Bible dongah a tloe tonghma rhoek neh vai uh pawh. Jonah he a tloe tonghma olphong bangla om pawh. He tah Pathen kah a khuenah neh tonghma loh a oeinah kawng he kungpuei la a thui. A lungdueng la thui koinih Pathen kah lungnah tah hlangboeih ham he a rhal rhoek ham pataeng om. Assyrian kho Nineveh he a tholh phu dantat ham a om coeng dongah cet lamtah thui pah a ti nah. Pathen ol a ngai kolla tuisangpho dongah Sapain (Tarshish) la yong. Pathen loh hlipuei a tloh tloe la a tueih pa tih tuisangpho khaw dalh buek. Jonah loh Pathen ol a ngai pawt dongah ni hlipuei loh tui sangpho dalh a buek sak tila kholong pathen aka bawk rhoek loh a ming. Te dongah Jonah kah Pathen Yahweh te a bawk uh tih Jonah khaw tuili khuila a voeih uh. Te vaengah Pathen loh khohli khaw a paa sak tih Jonah dolh hamla nga a tueih. Nga ko khuiah thangthui tih nga loh tuikaeng la a thaa. Te phoeah Nineveh la cet tih Pathen ol te a pang puei. Khopuei khaw yut tih Pathen loh tholh a hlah pah. A hnukkhueng ah Pathen kah sitlohnah kawng te Jonah a cangpuei.
Sawt Yoeinah
I. Tonghma la khuenah neh althanah 1.1—2.10
A. Pathen kah tueinah neh rhaelnah 1.1-3
B. Hlipuei tuilet 1.4-7
C. Tholh phongnah 1.8-12
D. Tuipuei khuila yutnah 1.13-17
E. Huithuinah neh daemnah 2.1-10
II. Pabae khuenah neh olngainah 3.1—4.11
A. Nineveh la cet 3.1-4
B. Nineveh yutnah 3.5-9
C. Khopuei daemnah 3.10
D. Jonah sai4.1-4
E. Jonah toelnah 4.5-11
1
Jonah Yong
1 2Mg 14.25BOEIPA ol tah Amittai capa Jonah taengah om tih, 2 “Thoo, khopuei len Nineveh la cet lamtah a taengah hoe pah. Amih kah boethae he ka mikhmuh ah pai coeng,” a ti nah. 3 Tedae Jonah tah BOEIPA mikhmuh lamloh Tarshish la yong hamla thoo tih Joppa la suntla. Te vaengah Tarshish aka pha sangpho te a hmuh. Te dongah a thapang te a paek tih BOEIPA mikhmuh lamloh amih neh Tarshish la caeh ham a khuila kun.
4 Te dongah BOEIPA loh khohli len te tuitunli ah a hut sak. Te vaengah hlipuei khaw tuitunli soah hli khungdaeng tih sangpho khaw ka rhek eh a ti coeng. 5 Sangphobibi rhoek loh a rhih dongah hlang loh amah kah pathen te ni a khue uh coeng. A soah yanghoep hamla sangpho dongkah hnopai te tuitunli khuila a dong uh. Tedae Jonah tah sangpho hlaep la suntla tih a yalh neh muelh ip.
6 Te dongah sangphoboei kung loh anih te a paan. Te vaengah anih te, “Nang te balae tih na ih? Thoo, na Pathen te khue laeh, Pathen loh mamih ham a poek atah m'milh uh pawt khaming,” a ti nah.
7 Te dongah hlang loh a hui taengah, “Halo lamtah hmulung naan sih. Te vaengah mamih taengkah yoethaenah he u kong ah ti khaw ming uh sih,” a ti nah.
Tedae hmulung a naan uh hatah tah hmulung loh Jonah a tlak thil. 8 Te phoeiah anih te, “Kaimih taengah thui laeh, mamih taengkah yoethaenah he u kongah nim? Na bitat tah balae? Me lamlong nim na pawk? Melae na khohmuen? Te lamkah te menim na pilnam?” a ti na uh. 9 Te dongah amih te, “Kai tah Hebrew ni. Vaan kah Pathen YAHWEH te ka rhih. Amah loh tuitunli neh laiphuei te khaw a saii,” a ti nah.
10 Te dongah hlang rhoek tah rhihnah puei neh a rhih uh anih te, “Balae tih he tla na saii,” a ti na uh. Amah te amih taengah a puen coeng dongah BOEIPA mikhmuh lamloh a yong te khaw hlang rhoek loh a ming uh coeng. 11 Te phoeiah anih te, “Nang te metlam kan saii uh eh? Te daengah ni tuitunli khaw mamih taeng lamloh a paa eh. Tuitunli he cet tih thikthuek coeng dongah,” a ti na uh.
12 Te dongah amih te, “Kamah he m'pom uh lamtah kai he tuitunli khuila n'dong uh laeh. Te vaengah tuitunli khaw nangmih taeng lamloh paa bitni. Kai kong ah hlipuei len he nangmih soah a tloh tila ka ming,” a ti nah. 13 Te vaengah laiphuei dongla mael ham hlang rhoek loh a kaih uh. Tedae tuitunli khaw cet tih amih taengah a thikthuek pah dongah noeng uh pawh.
14 Te daengah BOEIPA te a khue uh tih, “Aw, YAHWEH, he hlang kah hinglu dongah m'milh sak uh mai boeh. Ommongsitoe kah thii he kaimih soah khueh boeh. BOEIPA namah ham tah na ngaih bangla saii nawn,” a ti uh. 15 Jonah te a pom uh tih amah ah tuitunli la a dong uh daengah ni tuitunli kah a hmai a tal khaw a duem pueng. 16 Te dongah hlang loh BOEIPA a rhih uh he a rhihnah khaw len. BOEIPA taengah hmueih a nawn uh tih olcaeng khaw a caeng uh.
17 Mat 12.40Tedae Jonah aka dolh hamla nga len te BOEIPA loh a khueh coeng. Te dongah Jonah tah nga bung khuiah khothaih hnin thum neh khoyin hnin thum om.