8
UYeesu mupuutili wɨɨtʉ ʉmʉpɨtɨ
1 Mʉ zɨnɨɨzyo zyonti zye tʉkʉlonga, lye lɨpɨtɨ nhaani lye li liili: ɨtwe tʉlɨ nu mupuutili ʉmʉpɨtɨ we alɨ anza shɨnɨɨsho, ayɨkhaaye ɨnyoobhe ɨya kʉndɨɨlo kwɨ tengo ɨlya shɨmwene ɨlya Mʉlʉngʉ, apa lushindikho ʉlʉpɨtɨ nhaani kʉmwanya. 2 Kʉnʉʉkwo akʉmʉbhombela ʉMʉlʉngʉ aPafinjile, mukaasi mu sheegwi shiila ɨsha nalyoli she shigombiilwe nʉ Mwene ʉMʉlʉngʉ wʉʉyo, te nɨ nyoobhe zya muntu.
3 Umupuutili ʉmʉpɨtɨ wowonti akʉsaabhʉlwa ɨnga afumwe insupo ni mfinjile ɨzya kʉlʉngʉlɨzya. She shɨnɨɨsho, umupuutili wɨɨtʉ ʉmʉpɨtɨ woope yɨkhanzɨwaaga abhe na khantʉ akha kufumwa. 4 Ɨnga uYeesu abhanje niishi akwɨkhala mʉ nsɨ umu, atáamɨle abhe mupuutili ngakheeka, kʉnongwa ye kʉlɨ abhantʉ abhanjɨ bhe bhakufumwa imfinjile kʉlandatana nɨ ndajɨzyo zya Moose. 5 Bhanaabho abhapuutili bhakʉmʉbhombela ʉMʉlʉngʉ aPafinjile pe shɨkholanyo, khabhɨlɨ shɨnzyʉngʉʉlɨ ɨsha pafinjile kʉmwanya. Ye nongwa ʉMoose we ayɨlɨngaanya kʉzenga isheegwi ɨsha kumupuuta ʉMʉlʉngʉ,* 8:5 Isheegwi ɨsha kumupuuta ʉMʉlʉngʉ ABhayahuudi we bhashɨɨlɨ kʉzenga iNyumba iMfinjile bhágombile isheegwi mwe bhakhaputilaga, she bhakhatɨnjɨ isheegwi ɨsha wukeeti. Shikhasimishizyaga kʉtɨ ʉMʉlʉngʉ alɨ peeka na bhantʉ bhaakwe. Bhaazya iNyumba iMfinjile mu Wilulanyo ʉwa mazwi amajeni. ʉMʉlʉngʉ ámusoshile akhamʉbhʉʉzya akhatɨ, “Usimishizye kʉtɨ ʉkʉgomba vwonti kʉlandatana nɨ nsɨɨbho ye nákulanjile kwɨ gamba ɨlya Sinaayi.”† 8:5 Bhaazya Kufuma 25:40. 6 Ɨleelo uYeesu apewiilwe ɨmbombo ye nyinza nhaani kʉshɨla yɨnɨɨyo ɨya bhapuutili abhɨ maandɨ. Ɨmbombo yaakwe nyinza nhaani kʉnongwa ye ʉweene we mwimvwanyi ʉwa lufingo ulupwa lwe lwázenjiilwe pamwanya pa mʉlajɨ umwinza nhaani kʉshɨla ʉwɨ maandɨ.
7 Ɨnga lʉnʉʉlwo ulufingo ʉlwa kwanda lʉtáamɨle nu wubhiibhi wowonti, nhanɨ kʉtalɨ nɨ nsɨɨbho ɨya lufingo ʉlwa wʉbhɨlɨ. 8 Ɨleelo ʉMʉlʉngʉ akhaaga abhamaama bhɨɨtʉ bhalɨ ni mbiibhi. Pe shɨnɨɨsho, akhabhabhʉʉzya akhatɨ,
“Yeenyi, akhabhalɨlo khakwɨnza,
khe ɨnhayɨbhomba ulufingo ulupwa
na bhantʉ abha mu Isilaeli na bha mʉ Yʉʉda.
9 Lunuulu ulufingo ulupwa te lʉkhabhe
anza luula ʉlwɨ maandɨ
lwe nábhiishile na bhamaama bhaabho,
we nábhalemile ɨnyoobhe kʉbhalongola
kwepa mʉ nsɨ ɨya mu Miisili.
Kʉnongwa ye bhatáamɨle bhasunde
kʉlandata ulufingo lwanɨ ʉlwɨ maandɨ.
Ye nongwa ɨntábhasajɨɨye winza.
10 Lunuulu lwe lufingo ulupwa
lwe ɨnhayɨbhomba na bhantʉ abha mu Isilaeli
insiku zɨnɨɨzyo we zyafikha.
Ɨnhayɨbhɨɨkha ɨndajɨzyo zyanɨ mʉ njeele zyabho,
khabhɨlɨ inhayizisimba mʉ mooyo gaabho.
Nɨɨne ɨnhayɨbha ne Mʉlʉngʉ waabho,
bhoope bhakhayɨbha bhantʉ bhaanɨ.
11 Te kʉkhabhe winza nu muntu
ʉwa kʉmʉmanyɨzya ʉwamwabho,
awe kʉmʉmanyɨzya ʉnholo waakwe
kʉmʉmanya ʉMwene ʉMʉlʉngʉ.
Kʉnongwa ye weeka weeka,
kwandɨla umunsi paka ʉmʉsongo,
bhakhayɨmanya ɨne.
12 Kʉnongwa ye ɨnhayɨbhatʉʉyɨla uwubhiibhi waabho,
te ɨnhazɨkʉmbʉshe winza imbiibhi zyabho.”‡ 8:8-12 Bhaazya Yelemiya 31:31-34.
13 ɄMʉlʉngʉ we akʉlʉtekha lunuulu ulufingo kʉtɨ, “lupwa,” yɨkʉlolesya kʉtɨ alubhiishile ulufingo ʉlwa kwanda luula kʉbha lʉkʉʉlʉ. Akhantʉ khe khakʉʉlʉ khapalamɨɨye kʉteega.
*8:5 8:5 Isheegwi ɨsha kumupuuta ʉMʉlʉngʉ ABhayahuudi we bhashɨɨlɨ kʉzenga iNyumba iMfinjile bhágombile isheegwi mwe bhakhaputilaga, she bhakhatɨnjɨ isheegwi ɨsha wukeeti. Shikhasimishizyaga kʉtɨ ʉMʉlʉngʉ alɨ peeka na bhantʉ bhaakwe. Bhaazya iNyumba iMfinjile mu Wilulanyo ʉwa mazwi amajeni.
†8:5 8:5 Bhaazya Kufuma 25:40.
‡8:12 8:8-12 Bhaazya Yelemiya 31:31-34.