5
1 Umupuutili ʉmʉpɨtɨ wowonti akʉsaabhʉlwa mʉ bhantʉ, abhishiilwe kʉnongwa ɨya kʉmʉbhombela ʉMʉlʉngʉ kʉnongwa ya bhantʉ. Akumufumwizya ʉMʉlʉngʉ insupo ni mfinjile ɨzya kʉlʉngʉlɨzya kʉnongwa ɨya kwefwa imbiibhi. 2 Angakhola kʉbhalolela ishisa abhamwabho bhe bhatamanyile na bhe bhakʉteega kwɨ dala ɨlya kʉbhomba imbiibhi, kʉnongwa ye woope wʉʉyo mʉtolwe. 3 Ye nongwa akwanzɨwa afumwe imfinjile kʉnongwa iyi mbiibhi zyakwe wʉʉyo na kʉnongwa iyi mbiibhi zya bhantʉ. 4 Atalɨɨpo umuntu we angakhola kʉyɨbhɨɨkha wʉʉyo kʉbha mupuutili ʉmʉpɨtɨ. Lyoli weeka weeka akʉsaabhʉlwa nʉ Mʉlʉngʉ kʉbha mupuutili ʉmʉpɨtɨ anza she uAaloni* 5:4 UAaloni áamɨle mupuutili mʉpɨtɨ wa kwanda. Bhaazya Kufuma 28:1-3. ásabhuliilwe.
5 She shɨnɨɨsho, uYeesu Kilisiti atáyanzɨɨye kʉbha mupuutili ʉmʉpɨtɨ, lyoli ʉMʉlʉngʉ we ámʉsabhʉʉye na kʉmʉbhʉʉzya kʉtɨ,
“Ɨwe we Mwana waanɨ,
ʉmʉsanyʉʉnʉ nabha ne Taata waakho.”† 5:5 Bhaazya Zabuuli 2:7.
6 Khabhɨlɨ álonjile apamwabho mu Wusimbe uWufinjile kʉtɨ,
“Ɨwe we mupuutili ʉwa wiila,
kʉ shɨkholanyo sha Melikizeedeki.”‡ 5:6 Bhaazya Wandɨlo 14:17-20; Zabuuli 110:4.§ 5:6 UMelikizeedeki áamɨle mupuutili we akhamupuutaga ʉMʉlʉngʉ mʉ nhaaya ɨya mu Yelusaleemu akhabhalɨlo khe uAbulahaamu áamɨle mʉpʉʉma. Ʉweene áamɨle mupuutili wa Mʉlʉngʉ kʉ khabhalɨlo akhatali, we ʉMʉlʉngʉ ashɨɨlɨ kʉmʉbhɨɨkha uHaluuni, we ɨshɨkholo shaakwe sheene shábhishiilwe kʉbha bhapuutili. UAbulahaamu akhamushindikhaga nhaani uMelikizeedeki kʉnongwa ye uwupuutili waakwe wáwushilile ʉwa Haluuni nɨ shɨkholo shaakwe.
7 UYeesu we alɨ mʉ nsɨ, ápuutile nhaani kwa Mʉlʉngʉ kwi zi ɨlya kʉdandɨzya, akhalɨla amansozi, kʉnongwa ye ámanyile kʉtɨ ʉMʉlʉngʉ alɨ na makha aga kʉmʉpokha mu wufwe. Woope ʉMʉlʉngʉ ámutejeleziizye kʉnongwa ye áamɨle nu lutinikho kʉkwakwe, nu wutonsu. 8 Poope she áamɨle Mwana wa Mʉlʉngʉ, ámanyɨɨye kutinikha kwɨ dala ɨlya mayɨmba ge gámwajile. 9-10 We amʉbhɨɨkha kʉbha mugolosu kwɨ dala lɨnɨɨlyo, ʉMʉlʉngʉ ámupiiye ʉwʉpɨtɨ ʉwa mupuutili ʉmʉpɨtɨ kʉ shɨkholanyo sha Melikizeedeki. Ɨpo pe akhaabhapa abhantʉ bhonti bhe bhakʉmwɨtɨkha uwuposhi ʉwa wiila na wiila.
Insoshi kʉ zya kʉlʉlekha ʉlwɨtɨkho
11 Tʉlɨ na minji aga kʉlonga kʉ zya liniili ɨlya Yeesu kʉbha mupuutili ʉmʉpɨtɨ, ɨleelo pagomu kʉgapanga, kʉnongwa ye mwe bhagomu kʉzyaganya nalʉbhɨlo. 12 Nalyoli kʉ khabhalɨlo ɨkha nhanɨ mwe bhamanyizyi, ɨleelo mʉlɨ she mʉkwanzɨwa umuntu ʉwa kʉbhamanyɨzya winza ɨmanyɨzyo ɨzya kʉwandɨlo izyi zwi lya Mʉlʉngʉ. Muyiiye kwonha izibha, te kulya ishaakulya ɨshɨkhome. 13 Kʉnongwa ye wowonti we akwonha izibha lyene, mwana mwela, atangakhola kʉzyaganya ɨmanyɨzyo ɨzya wugolosu. 14 Ɨleelo ishaakulya ɨshɨkhome shɨkhondeeye kʉ bhantʉ abhasongo, bhe bhamanyɨɨye kʉwaaganya uwuleganu uwi nyinza ni mbiibhi.
*5:4 5:4 UAaloni áamɨle mupuutili mʉpɨtɨ wa kwanda. Bhaazya Kufuma 28:1-3.
†5:5 5:5 Bhaazya Zabuuli 2:7.
‡5:6 5:6 Bhaazya Wandɨlo 14:17-20; Zabuuli 110:4.
§5:6 5:6 UMelikizeedeki áamɨle mupuutili we akhamupuutaga ʉMʉlʉngʉ mʉ nhaaya ɨya mu Yelusaleemu akhabhalɨlo khe uAbulahaamu áamɨle mʉpʉʉma. Ʉweene áamɨle mupuutili wa Mʉlʉngʉ kʉ khabhalɨlo akhatali, we ʉMʉlʉngʉ ashɨɨlɨ kʉmʉbhɨɨkha uHaluuni, we ɨshɨkholo shaakwe sheene shábhishiilwe kʉbha bhapuutili. UAbulahaamu akhamushindikhaga nhaani uMelikizeedeki kʉnongwa ye uwupuutili waakwe wáwushilile ʉwa Haluuni nɨ shɨkholo shaakwe.