ዶንጋሳ ፓቂፆ
107
(ዓይኑ. ማፃ ዓይ. 107—150)
ፆኦሲ ኮሹሞ ዛሎ ጋላቲንቴ ጋላታ
1 ኮሺ ማዔሢሮ ናንጊና ናንጋ ጎዳ ጋላቱዋቴ፤
ሚጪንቲፃ ዒዛኮ ናንጊና ናንጋያኬ። 1ፆኦሲ. ዓሃኬ 16፡34፤ 2ፆኦሲ. ዓሃኬ 5፡13፤ 7፡3፤ ዒዝ. 3፡11፤ ዓይኑ. 100፡5፤ 106፡1፤ 118፡1፤ 136፡1፤ ዔር. 33፡11።
2 ናንጊና ናንጋ ጎዳ ማሂ ሻንቂ ዓውሴ ዓሳ
ዒዚ ሞርኮ ኩጫፓ ሄሊ ዓውሴ ዓሳ
ሂዚ ጎዖንጎ፦
3 ዓባ ኬስካ ባንፃፓ
ጌላ ባንፃፓ
ኬዶ ዛሎና ዾኦሎ ዛሎናይዳፓ
ዓጮ ቢያይዳፓ ቡኬ ዓሳ ሂዚ ጎዖንጎ።
4 ፔቴ ፔቴዞንሢ ዓሲ ናንጉዋ ዳውላ ዣኣሊ ሃንቴኔ፤
ዔያታ ናንጋ ካታሞ ሄሊሳ ጎይፆዋ ባይዜኔ።
5 ናይዺንቴኔ፥ ዼኤቢንቴኔ፤
ማሊፃኣ ዔያቶኮ ላቤኔ።
6 ዔያታ ሜታዼ ዎዶና ናንጊና ናንጋ ጎዳ ባንሢ ዒላቴኔ፤
ዒዚያ ሜታሢዳፓ ዔያቶ ዓውሴኔ።
7 ዔያታ ናንጋ ካታሞ ባንሢ
ፒዜ ጎይሢና ዔኪ ዓኣዼኔ።
8 ናንጊና ናንጋ ጎዳኮ ሚጪንቲፆ ዛሎሮ
ዓሶማኣ ዒ ማዼ ዲቃሢ ሄርሺሳ ማዾሮ
ዒዛ ጋላቶንጎ።
9 ዒዚ ዼኤቢንቴ ዓሶኮ ዼኤቦ ማሃኔ፤
ናይዺንቴ ዓሶዋ ኮሺ ባኣዚ ሙኡዚ ሚሻኔ።
10 ፔቴ ፔቴ ዓሳ ካኒ ቢራታና ቱኡቲ
ሄርቂንቲያ ሜታዺ
ሻኔ ዹሚዳኣ ዴዔኔ።
11 ፆኦሲ ቃኣሎ ዋይዞ ዒፂፆና
ዼኤፖ ፆኦዛሢኮ ዞሮ ዔያታ ቶኦቼኔ።
12 ዬያሮ ዎልቄ ማዾ ማዺሲሢና ዒኖ ዔያቶኮ ዒ ላቢሴኔ፤
ጋፒ ዔያታ ላቤኔ፥ ማኣዳያ ጴዺባኣሴ።
13 ዔያታ ሜታዼ ዎዶና ናንጊና ናንጋ ጎዳ ባንሢ ዒላቴኔ፤
ዒዚያ ሜታሢዳፓ ዔያቶ ዓውሴኔ።
14 ሻኔ ዹሞይዳፓ ዔያቶ ዒ ኬሴኔ፤
ቱኮና ካኖ ቢራቶዋ ሜንሤኔ።
15 ናንጊና ናንጋ ጎዳ ዒዛኮ ጋፑዋ ሚጪንቲፆሮ
ዓሶማኣ ዒ ማዼ ዲቃሢ ሄርሺሳ ማዾሮ
ዔያታ ዒዛ ጋላቶንጎ።
16 ዒዚ ሞኦኖ ዓንጎና ዎዾና ካሮ ሜንሤኔ፤
ዓንጎ ጋጋርዞዋ ሾኦሌኔ።
17 ፔቴ ፔቴ ዓሳ ዋይዞ ዒፂፃፓ ዔቄያና ዔኤያ ማዔኔ፤
ዻቢንታፓ ዔቄያናኣ ሜቶይዳ ኬዴኔ።
18 ዑፃ ዔያቶኮ ዱማ ዱማ ሙዖ ሻኣኪንቴኔ፤
ሃይቃኒ ዔያታ ዑኬኔ።
19 ዔያታ ሜታዼ ዎዶና ናንጊና ናንጋ ጎዳ ባንሢ ዒላቴኔ፤
ዒዚያ ዔያቶ ሜታሢዳፓ ዓውሴኔ።
20 ዒዚ ፔ ቃኣሎ ዳኪ ዔያቶ ፓሤኔ፤
ዱኡካኒ ዔኪ ዓኣዾንቴያ ዓውሴኔ።
21 ናንጊና ናንጋ ጎዳ ዒዛኮ ጋፑዋ ሚጪንቲፆሮ
ዓሶማኣ ዒ ማዼ ዲቃሢ ሄርሺሳ ማዾሮ
ዔያታ ጋላቶንጎ።
22 ጋላታ ዒዛም ዒንጎ ባኣዚ ማሂ ዔያታ ሺኢሾንጎ፤
ማዾ ዒዛኮ ዎዛሳ ዓይኑሞና ፔጋሲ ዔርዞንጎ።
23 ፔቴ ፔቴ ዓሳ ዋኣፆ ካኣሚሎና
ባዞ ባንሢ ኬዴኔ፤
ዼኤፖ ዋኣፆ ዑፃኣ ፔ ማዾ ማዼኔ።
24 ናንጊና ናንጋ ጎዳኮ ማዾ ዒኢካ ዔያታ ዛጌኔ፤
ዒዛኮ ዲቃሢ ሄርሺሳ ማዾ ዼኤፖ ዋኣፆይዳ ዴንቄኔ።
25 ዒዚ ዓይሢ ዓልጎ ዢባሮ ዢባርሺሴኔ፤
ዢባራኣ ዋኣፆ ዓጊሢ ዴቼኔ።
26 ሌካ ጫሪንጮ ኬስኬኔ፥ ሊካ ዴሞዋ ኬዴኔ፤
ሜታሢዳፓ ዔቄያና ጎጳ ዔያቶኮ ዋኣፄኔ።
27 ዓዳ ማሢንቴ ዓሲጉዲ ዓኣፓ ሺሬም
ሴካ ሃንጋ ዔያታ ቡኡዲንቴኔ፤
ጎዖንዶ ጎይፆንታ ማዾንዶሢኮዋ
ካራ ዔያቶም ባይቄኔ።
28 ዔያታ ሜታዼ ዎዶና ናንጊና ናንጋ ጎዳ ባንሢ ዒላቴኔ፤
ዒዚያ ሜታሢዳፓ ዔያቶ ዓውሴኔ።
29 ዓልጋሢ ዢባሮ ዒ ዚቲዴኔ፤
ባዞ ጉዳሢያ ዓጊፆ ላኣጌኔ።
30 ዬይ ዚቲዮ ጌዔሢሮ ዔያታ ዎዛዼኔ፤
ዔያታ ዔቂሳኒ ማሌ ዋኣፆ ካኣሚሎ ቤዞ
ዒ ዔያቶ ሄሊሴኔ።
31 ናንጊና ናንጋ ጎዳ ዒዛኮ ጋፑዋ ሚጪንቲፆሮ
ዓሶማኣ ዒዚ ማዼ ዲቃሢ ሄርሺሳ ማዾሮ
ዔያታ ዒዛ ጋላቶንጎ።
32 ዴራ ቡኪንታ ቤዛ ዒዛ ዼግ ዼጊዶንጎ፤
ጋርቾ ዓሶ ቡኪንቶይዳኣ ዒዛ ሄርሾንጎ።
33 ዎሮ ዒዚ ዓሳ ናንጉዋ ዳውሎ ባንሢ
ዓልቃ ዋኣፆዋ ዶዲ ሳዓ ማሄኔ።
34 ዒኢካ ናንጋ ዓሶኮ ፑርቱማፓ ዔቄያና
ኮዦ ዓጬሎ ሶኦጌና ሲኢሪንቴያ ዒ ማሄኔ።
35 ዓሲ ናንጉዋ ዳውሎ ቦኦሎ ዋኣሢ ዴዓያ
ሜሎ ሳዖዋ ዓልቃ ዋኣሢ ዒ ማሄኔ።
36 ናይዺንቴ ዓሶ ዒ ዒኢካ ጌሤኔ፤
ዔያታ ናንጋ ካታማኣ ማዤኔ።
37 ጎዦይዳ ዔያታ ዜርቄኔ፥ ዎይኔያ ቱኬኔ፤
ሚርጌ ባኣዚያ ካፂሴኔ።
38 ዔያቶ ዒ ዓንጄኔ፥ ኮሺያ ዔያታ ሚርጌኔ፤
ዔያቶኮ ባኣቶ ፓይዶዋ ዒ ዻኪሲባኣሴ።
39 ካራ ዔያታ ባይዚ ሜታዺ ዖዪሢና
ፓይዳ ዔያቶኮ ዻኬም ቦርሲንቴኔ፤
40 ቢቶ ዓሶ ፆኦሲ ዻውሲሴኔ፤
ዓሳ ናንጉዋ ዳውሎ ማኣሻሎይዳ
ሜታዺ ሃንታንዳጉዲ ማዼኔ።
41 ሜታዼ ዓሶ ጋዓንቴ ሜታሢዳፓ ጎቺ ዒ ኬሴኔ፤
ዔያቶኮ ማኣሮ ዓሶዋ ማራይጉዲ ሚርጊሼኔ።
42 ዒኖ ፒዜ ዓሳ ዬያ ዛጊ ዎዛዻኔ፤
ፑርቶ ማዻ ዓሳ ጋዓንቴ ቦርሲንቲ ዚቲ ጋዓኔ።
43 ዓካሪ ዖኦኒያ ጪንጫ ማዔቴ
ሃያ ባኮ ዒና ዔኮንጎ፤
ዬያይዳሢ ናንጊና ናንጋ ጎዳኮ ሚጪንቲፆ ማሊ ጶቂሦንጎ።