55
ዓይኑሞ ሱኡጋሢ ዓይሣ ጎይፆና ጎኦላና ዓይናዺንታ ዳውቴ ኬኤዚ ዔርዜ ባኮ
ላጌ ዒፄ ዓሲ ሺኢቄ ሺኢጲሢ
1 ፆኦሲዮ! ሺኢጲፆ ታኣሲ ዋይዜ፤
ታ ኔና ሺኢቃ ሺኢጲፆ ቶኦዛዺፖ!
2 ታ ባንሢ ዛጌ፥ ዋይዚያ ታኣም ማሄ፤
ጋርሲና ታኣኒ ዲቃቴኔ፥ ዓጊፂያ ዓጊፄኔ።
3 ታ ሞርካ ታኣም ዚርቃሢሮ ታ ዒጊጬኔ፤
ፑርቶ ሄርቂ ዎይሢፃ ታና ሺኢቼኔ፤
ዔያታ ፑርታ ሜቶ ታ ጊዳ ዔኪ ሙካኔ፤
ዒፂ ዻጋና ታና ዔያታ ዛጋኔ።
4 ዒና ታኣኮ ታና ማሊሢና ዋኣዪሳኔ፤
ታኣኒ ሃይቄኔ ጌይሲ ታና ዒጊቺ ዓርቄኔ።
5 ዒጊቹሞና ዲቃቲሢና ታ ዓርቄኔ፤
ዑፃ ታኣኮ ማዔ ካራና ዲቃታኔ።
6 ዶኦሌጉዲ ጋኣሲ ታኣኮ ዓኣቴ ዓይጎ!
ባራኒ ዴንዲ ታ ሃውሼያ ናንዳኔ።
7 ሄኤዶ ቤቲ ታኣኒ ሃኬ ዓኣዼቴ
ዓሳ ናንጉዋ ዳውሎይዳ ታ ናንጋንዳቴኬ።
8 ዓልጋሢ ዢባሮና ዢኢፖናፓ ታ ጳሽኪ
ሩኡሪና ታ ማኣሮ ባንሢ ታ ሄሌያ ናንዳኔ።
9 ናንጊና ናንጋ ጎዳሢዮ!
ካታሜሎይዳ ጌኔ ማዾና ዣሎና ታ ዛጋሢሮ
ዲቃሢ ካራ ዔያቶኮ ባይዜ፤
ጌስታ ሙኡጮዋ ዔያቶሲ ሲኢሬ።
10 ዒዛ ሜቶና ባይሲንታና ኩሜ ካታማኬ፤
ፑርቶ ዓሳ ዋንቶንታ ሮኦሮንታ ዒዞኮ ኬኤሎ ዲፆ ዑፃ ሃንታኔ።
11 ባይሲንታ ዒዞይዳ ዓኣኔ፤
ጌኔ ማዾና ጌሺሢና ዓሳ ቡካ ጶኦካፓ ዒዞኮ ባይቁዋሴ።
12 ታና ጫሽካሢ ታ ሞርካሢቱዋሴ፤
ዎንዴ ዬያታቴ ጊቢ ታ ዳንዳዔያ ናንዳኔ፤
ታ ዑፃ ዖቶርቃሢያ ዒዛቱዋሴ፤
ዒዛታቴ ቤርታፓ ታ ዒዛኮ ዓኣሺንቴያ ናንዳኔ።
13 ጋዓንቴ ዬያ ማዻሢ ታ ኔና ጉሙርቃ
ታኣኮ ላጋሢና፥ ዒጊናሢ ማዔ ኔናኬ።
14 ኑኡኒ ፆኦሲ ማኣራ ዴሮ ባኣካ ዎላ ሃንቴኔ፤
ዎዛሳ ናሹሞዋ ኑኡኮ ዓኣኔ።
15 ዒና ዔያቶኮ ፑርቱሞ ቡኬ ቤሲታሢሮ
ታ ሞርኮይዳ ዔያታ ዔሩዋንቴ ሃይቢ ዬዖንጎ!
ሳዛና ዓኣዖዋ ዱኡኪንቶንጎ!
16 ታኣኒ ጋዓንቴ ፆኦሲ ባንሢ ዒላታኔ፤
ናንጊና ናንጋ ጎዳሢ ታና ዓውሳኔ።
17 ዋንቶንታ ጉቶንታ ሮኦሮንታ
ታኣኒ ዔኤሊንታኔ፥ ዚኢሊንቲያ ታ ዚኢሊንታኔ፤
ዑኡዞዋ ዒ ታኣኮ ዋይዛኔ።
18 ታና ማኪ ዔቄ ዓሳ ሚርጌኬ፤
ታኣም ማሎና ዖላፓ ሼምፓሢ ታኣኮ ዒዚ
ማሂ ሻንቂ ዔኪ ዓውሳንዳኔ።
19 ዔያታ ፔኤኮ ሃንቲፆ ላኣሚባኣሴ፤
ፆኦሲያ ዔያታ ዒጊጩዋሴ፤
ሚናፓ ዓርቃዖ ፔኤኮ ካኣቱሞይዳ ዓኣ ፆኦዛሢ
ዋይዚ ዔያቶ ዒ ዻውሲሳንዳኔ።
20 ታኣኒ ዒዛ ታ ላጌኬ ጋዓ ዓሢ
ፔ ላጎ ጳርቃኒ ፔ ኩጮ ዔቂሴኔ፤
ዎላ ጫኣቄ ጫኣቁሞዋ ሃሼኔ።
21 ዻንጋ ዒዛኮ ዖይሲዳፓ ባሼ ሺኢታኔ፤
ዒና ጋዓንቴ ዒዛኮ ዖልዚ ማላኔ፤
ዑኡዛ ዒዛኮ ዛይቴይዳፓ ባሼ ኮሽካኔ፤
ጋዓንቴ ቱጊንቴ ጬንቻ ዓፓሮጉዲኬ።
22 ኔና ዴኤፃ ባኮ ቢያ ናንጊና ናንጋ ጎዳም ሃሼ፤
ዒዚ ኔ ቶኦኮ ዛጊ ዓርቃንዳኔ፤
ዒዚ ኮዦ ዓሶ
ፔቴታዖ ሜታዻንዳጉዲ ሜቶም ዓኣሢ ዒንጉዋሴ።
23 ፆኦሲዮ! ኔኤኒ ጋዓንቴ ፑርቶ ዓሶ
ባይሲንታ ዔቴይዳ ኬኤራንዳኔ፤
ዬያታ ዓሶ ዎዻ ዓሶና ጌሻ ዓሳ
ዔያታ ናንጋኒ ኮይሳ ሌዖኮ ሄካሢታዖ ናንጋዓኬ፤
ታኣኒ ጋዓንቴ ኔና ጉሙርቃኔ።