45
ዓይኑሞ ሱኡጋሢ ዓይሣ ጎይፆና ዛዬና ዓይናዺንቴ ቆሬ ናኣታ ዔርዜ ባኮ
ናሹሞ ዛላ ካላሊ
1 ዒና ታኣኮ ኮሺ ማሊሢ ኬሳኔ፤
ታኣኒ ጊኢጊሼ ካላሎ ካኣቲም ዋይዚሳንዳኔ፤
ዻንጋ ታኣኮ ዔሮ ዓሲ ዓርቂ ፃኣፓ ቢዒሬጉዲኬ።
2 ሚዛጱማ ኔኤሲ ዓሲዳፓ ቢያ ባሼኬ፤
ኔኤኒ ጌስታ ጌኤዛኣ ሄርሺሳያኬ፤
ዬያሮ ናንጊና ናንጋ ጎዳ ኔና ዓንጄኔ።
3 ቦንቾና ዲቃሥሢና ኩሜ ዎልቆ ካኣቲዮ
ጬንቾ ዓፓሮ ኔኤሲ ቱኬ።
4 ጎኑሞንታ ፒዜ ዎጌንታ ፂሉሞንታ ዛላ
ኔኤኮ ዲቃሣ ፑኡፑሞና ባሻኒ ቱኡቲ ኬስኬ፤
ሚዛቆ ኩጫ ኔኤኮ ዲቃሣ ዓኮ ባኮ ማዾንጎ።
5 ሂኢዣ ኔኤሲ ዋርቂንቴያኬ፤
ኔ ሞርኮኮ ሳዞ ዱካንዳኔ፤
ዓጮ ካኣታ ባሺንቲ ኔ ቢታንቶ ዴማ ሎኦማንዳኔ።
6 ፆኦዛሢዮ! ኔኤኮ ካኣቱሞ ዖይታ ናንጊና ናንጋኔ፤
ካኣቱሞ ኔኤሲ ፒዙሞና ኔ ዎይሣያኬ።
7 ፂሉሞ ኔኤኒ ናሽካኔ፤
ዋይዚ ዒፂሢ ኔኤኒ ናሽኩዋሴ፤
ዬያሮ ናንጊና ናንጋ ጎዳ ማዔ ፆኦዛሢ ኔና ዶኦሬኔ፤
ኔ ላጎይዳፓ ባሼ
ቶኦኮ ኔኤኮ ዎዛ ዛይቴና ዒ ቲሽኬኔ። ዔብ. 1፡8-9።
8 ኬርቤንታ ዒሬቴንታ ቢሬጉዴንታፓ ኮሺንቴ ሳውቃ ባካ
ኔኤኮ ካኣቱሞ ዓፒሎይዳ ፑኡኪንቴኔ፤
ዳርዞ ዓጮና ሚዛጲሶና ካኣቱሞ ማኣራ
ሚርጌ ሻዦ ዴንሢ ዋርቆ ጎኦሎ ዋርቆዛ ኔና ዎዛሳኔ።
9 ኔኤኮ ካኣቱሞ ማኣራ ዓኣ ዉዱሮ ናኣቶ ባኣካ
ካኣቶ ናኣቶ ማዔ ዉዱራሢ ዓኣኔ፤
ጌኤሻ ጌኤሺ ዎርቄና ሚዛጲሶና
ሚዛጲ ዓፒላ ማይንቲ
ኔኤኮ ካኣቱሞ ዖይቶኮ ሚዛቆ ዛላ ዔቄኔ።
10 ኔኤኒ ታ ናዔሌ!
ታኣኒ ኔኤም ጋዓ ባኮ ዋይዜ፥ ሃይሶዋ ታኣኮ ዒናፓ ዋይዜ፤
ኔኤኮ ዓዶ ማኣሮንታ ዴሮንታ ዋሊ ሃሼ።
11 ሚዛጱማ ኔኤኮ ካኣቲ ዒኖ ባይዜኔ፤
ጋዓንቴ ዒዚ ኔኤኮ ጎዳታሢሮ ዒዛ ቦንቼ።
12 ፂሮሴኮ ዉዱሮ ናኣታ ዒንጎ ባኣዚ ኔኤም ዔኪ ዬዓኔ፤
ዖርጎጮ ዓሳኣ ቃይሺ ኔና ሺራኔ።
13 ካኣቲኮ ናኣ ቶኦካፓ ቶኮ ሄሊ ፓልሚ ዑኡቱሞ ማኣራ ዓኣኔ፤
ማኣዓሢያ ዒዞኮ ዎርቄ ሌሊኬ።
14 ዒዛ ፔኤኮ ሚዛጶ ማኣዓሢ ማኣዒ
ካኣቲ ኮራ ዔውቲ ዓኣዻኔ፤
ዒዞኮ ዔርጎና ዉዱራሢያኣ ዒዞ ጎኦቢሣኔ።
15 ኮሺ ዎዛዺ ዎዛዺ
ካኣቲ ማኣሪ ዎላ ዔያታ ጌላንዳኔ።
16 ዓቲንቆ ናኣታ ኔኤኮ ዓዶንሢ ቤዞ ካኣቱሞ ጌላንዳኔ፤
ዎይሣንዳ ዓሶ ማሂ ዓጮ ቢያይዳ ኔ ዔያቶ ዶኦራንዳኔ።
17 ሱንፆ ታ ኔኤኮ ሾይንቶ ቢያሢም ማላታ ማሃንዳኔ፤
ዬያሮ ዴሬ ናኣናና ኔና ሄርሼ ጎይሣ ናንጋንዳኔ።