29
ዳውቴ ዓይኑሞ
ናንጊና ናንጋ ጎዳ ዑኡዞኮ ዎልቆ
1 ዒንሢ ፆኦሲ ኪኢታንቻ! ናንጊና ናንጋ ጎዳም ዒንጉዋቴ፤
ቦንቾና ዶዱሞና ዒዛሮኬ ጎዑዋቴ።
2 ዒዛኮ ሱንፆም ኮይሳ ቦንቾ ዒንጉዋቴ፤
ዒዛኮ ዱማዼ ዼኤፑሞሮዋ ዒዛም ዚጉዋቴ። ዓይኑ. 96፡7-9።
3 ናንጊና ናንጋ ጎዳኮ ዑኡዛ ዋኣፆ ዑፃ ማኣማኔ፤
ቦንቺንታ ፆኦዛሢያ ጉጉንሣኔ፤
ናንጊና ናንጋ ጎዳ ዼኤፖ ዋኣፆ ዑፃ ጉኡማኔ።
4 ናንጊና ናንጋ ጎዳኮ ዑኡዛ ዎልቄና ዓኣያኬ፤
ዒዛኮ ዑኡዛ ዼኤፒ ዲቃሣያኬ።
5 ናንጊና ናንጋ ጎዳኮ ዑኡዛ ዴኤሎ ዚቢቆ ሜንሣኔ፤
ዑኡዛ ዒዛኮ ሊባኖኦሴ ሚፆዋ ሾኦላኔ።
6 ሊባኖኦሴ ዹኮ ማርሶ ዻንቄ ናኣሪጉዲ
ሲሪዮኔ ዹኮዋ ዖሶ ናይጉዲ
ዎዛሲ ፂኪሳኔ።
7 ናንጊና ናንጋ ጎዳኮ ዑኡዛ
ታሚ ሎስቶጉዲ ፖዓኔ።
8 ናንጊና ናንጋ ጎዳኮ ዑኡዛ ዓሲ ናንጉዋ ዳውሎ ዓጊሣኔ፤
ቃዴሴኮዋ ዓሳ ናንጉዋ ሳዖ ጎቃይሳኔ።
9 ናንጊና ናንጋ ጎዳኮ ዑኡዛ ዶቆዞ ሾይዣኔ፤
ሚፆኮዋ ዋላዦ ዲኢኒሻኔ፤
ዒዛኮ ዱማዼ ቤዞይዳ ዓኣዞንሢ ዑኡዞ ዒዛሲ ዋይዛዖ፦
«ቦንቾ ፆኦሲም ማዖንጎ!» ጋዓኔ።
10 ናንጊና ናንጋ ጎዳ ዼኤፖ ዋኣፆ ዎይሣሢኬ፤
ዒዚ ናንጊና ካኣታዺ ዬያ ዑፃ ዴዓኔ።
11 ናንጊና ናንጋ ጎዳ ፔ ዴሮም ዎልቄ ዒንጋኔ፤
ዒዚ ዴሮ ፔኤሲ ኮሹሞና ዓንጃኔ።