12
ናንጊና ናንጋ ጎዳ ኮይላ ዔርሚያሴ ዖኦጬ ዖኦጪሢ
1 ናንጊና ናንጋ ጎዳሢዮ! ታኣኒ ኔ ቤርታ ኔና ሞኦቲ ጌስታሢ ኔኤኒ ፒዜ ማዔሢ ዔሬዖኬ፤
ሃሢ ኔኤኒ ፒዜ ዎጋ ዎጊፆይዳ ታ ዖኦጫ ባኣዚ ዓኣኔ፤
ጎሜ ዓሲኮ ናንጋ ፒዜ ማዒ ዓኣዻሢ ዎይቲዳይ?
ጌሺ ናንጋ ዓሶ ቢያሢኮ ዔባ ቢያ ጊኢጋሢ ዎይቲዳይ?
2 ኔኤኒ ዔያቶ ቱኬም ዔያታ ፃጲ ዳኬኔ፤
ዑጊ ዓኣፒያ ዓኣፔኔ፤
ዻንጋና ኔና ዔያታ ቦንቻኔ፤
ዒና ጋዓንቴ ዔያቶኮ ኔጊዳፓ ሃኬያኬ።
3 ናንጊና ናንጋ ጎዳሢዮ! ታና ጋዓንቴ ኔ ዔራኔ፤
ኔ ዛሎ ታ ማላ ማሊፆ ኔ ዛጊ ዱማሲ ዴንቃኔ፤
ሃኣቶ ፑርቶ ዓሶ ሹካኒ ዔኪ ዴንዶ ማራይጉዲ ዒሼ፤
ሹኮንዶ ኬሎም ዱማሲ ዔያቶ ዔቂሴ።
4 «ኑ ማዻ ባኮ ቢያ ናንጊና ናንጋ ጎዳ ዛጉዋሴ» ጋዓ
ዴሮኮ ፑርቱማፓ ዔቄያና ኑኡኮ ሳዓ ሉማዻሢ፤ ጊንሣ ሃሣ
ካዮይዳ ዓኣ ማኣታ ሜሊ ኩዳሢ ዎማ ሄላንዳኣናዳይ?
ዬያ ዛሎና ካዮ ቦዖንታ ካፖንታ ቢያ ጋፒ ዴንዲ ባይቄኔ።
ናንጊና ናንጋ ጎዳ ማሂ ኬኤዜ ባኮ
5 ናንጊና ናንጋ ጎዳ ሂዚ ጋዓኔ፦
«ዔርሚያሴ! ቶኪና ሄሌሎ ጳሽካ ዓሶና ዎላ
ጳሽኪፃ ኔና ላቢሳያ ማዔቴ
ፓራሢና ዎላ ኔ ዎዲ ሄሌሎ ጳሽካንዳይ?
ዔኤቢባኣ ፔጎይዳ ጳዦ ባሺንቲ ሎኦማያ ማዔቴ
ዮርዳኖሴ ዎሮ ዓጫ ዓኣ ዴኤሎ ካዮ ባኣካ ኔ ዎዎይታንዳይ?
6 ኔኤኮ ጌርሲንሢንታ ኔኤኮ ዑኬ ዒጊኖንታ ኔና ሃሼኔ፤
ኔና ዔያታ ዒፂ ማኪ ጌስቴኔ፤
ዬያሮ ኔ ቤርታ ዔያታ ኮሺ ባኣዚ ጌስቴቴያ ዔያቶ ጉሙርቂፖ።»
ዴሮኮ ዻቢንታ ናንጊና ናንጋ ጎዳ ዖዪሴሢ
7 ናንጊና ናንጋ ጎዳ ሂዚ ጋዓኔ፦
«ታኣኮ ማኣሮንታ ታ ዴኖንታ ታ ሃሼኔ፤
ታኣኒ ናሽካ፥ ታ ዴሮዋ
ዔያቶኮ ሞርኮም ታ ዓኣሢ ዒንጋንዳኔ።
8 ታ ዴራ ታጊዳ ፑርቱሞና ዔቂ ካይዚ ዞቢጉዲ ጉዻኔ፤
ዬያ ማዾ ዔያቶኮ ታ ዒፃኔ።
9 ታኣኒ ዶኦሬ፥ ታ ዴራ ቢያ ዛሎና
ዜኤጌ ካቲ ዔቄ ካፒ ማዔኔ፤
ዬያሮ ሜሌ ካዮ ቦዓ ሙኪ ዓሽኮ ዔያቶኮ ሙይ
ዎዛዻንዳጉዲ ዬያ ቦዖ ዔኤሉዋቴ።
10 ሜሌ ዴሮ ሱኡጋ ታኣኮ ዎይኖ ጎዦ ፑርቲሲ ባይዜኔ፤
ታ ዴኖ ማዔ ሳዖዋ ሄርቂ ዲርካቼኔ፤
ዎዛሳያ ማዔ ሳዔሎዋ ዓሲ ናንጉዋ ዳውሌ ማሂ ሃሼኔ።
11 ዓሲ ናንጉዋ ዳውሌ ማሂ ዔያታ ሃሼሢሮ ታ ቤርታ ጉሪ ሳዓ ማዒ ዒዛ ዓቴኔ፤
ዓጬላ ካራና ዓሲ ናንጉዋ ዳውሌ ማዒ ጋፔኔ፤
ዒዞ ዔኤቢኬ ጌይ ዛጋ ዓሲ ፔቴታዖ ባኣሴ።
12 ዓሲ ናንጉዋ ዳውሌ ማዒ ዓኣ ዹካፓ
ባይዛንዳ ዖልዚ ዓሲ ሙካንዳኔ፤
ናንጊና ናንጋ ጎዳ ዳኬ ጬንቻ ዓፓሮ ዓጬሎኮ
ካራፓ ካሮ ሄላንዳኣና ዓሶ ባይዛንዳሢሮ
ኮሺ ናንጊ ናንጋንዳ ዓሲ ፔቴታዖ ባኣሴ።
13 ዴራ ታኣኮ ዛርጌ ዜርቃዖ ማርካፄ ዓንጊሢ ጮኦሬኔ፤
ማዾና ዔያታ ላባዖ ዔያቶም ማዓንዳ ባኣዚ ፔቴታዖ ዴንቂባኣሴ፤
ታኣኮ ዶዶ ዻጋፓ ዔቄያና ዔያቶኮ ሃኣካ ባይቄሢሮ ዔያታ ዖዬኔ።»
ዪሁዳ ዴሮ
14 ናንጊና ናንጋ ጎዳ ሂዚ ጋዓኔ፦ «ታ ዴሮ ዒስራዔኤሌም ታ ዒንጌ ዓጬሎ ባይዜ፥ ዒስራዔኤሌኮ ዓሺኖ ዓጮም ታ ጋዓ ባኣዚ ዓኣኔ፤ ዬያቶ ፑርቶ ዓሶ ዔያቶኮ ዓጫፓ ዓጫፓ ቱጊ ዔኪ ታ ዓኣዻንዳኔ፤ ዪሁዳ ዴሮዋ ዔያቶ ባኣካፓ ዋቂ ታ ኬሳንዳኔ። 15 ጋዓንቴ ዔያቶኮ ዓጫፓ ታ ዔያቶ ኬሴስካፓ ጊንሣ ዔያቶም ታ ሚጪንቲ ዔያቶ ማኣራንዳኔ፤ ፔቴ ፔቴ ዴሮ ፔኤኮ ሳዖና ፔኤኮ ዓጮና ባንሢ ታ ማሂ ዔኪ ዬዓንዳኔ። 16 ታ ዴራ ሃንታ ጎይፆ ጉቤ ዒኔና ዔያታ ሃንታኒ ዔኤዒ ዔያታ ሃያኮ ቤርታ ታኣኮ ዴሮ ባዓኣሌ ሱንፆና ዔኤቢ ሳላዺሢ ዔርዜማ ጎይፆ ‹ናንጊና ናንጋ ጎዳ ሃይቆ!› ጌይ ዔያታ ሳላዻያ ማዔቴ ታ ዴሮ ባኣካ ታ ዔያቶ ናንጊሻንዳኔ፤ 17 ዔያቶ ባኣካ ታኣም ዋይዙዋ ዴሬ ዓኣቴ ጋዓንቴ ቱጊ ዳኪ ታኣኒ ባይዛንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»