26
ባሺሢ ዓይኑሞ
1 ዬኖ ዎዶና ዪሁዳ ዓጮይዳ ሃካፓ ዴማ ዓኣ ዓይኑማ ዓይናዺንታንዳኔ፦
ኑኡኮ ዶዲ ካታማ ዓኣኔ፤
ኬኤሌ ዲሢና ዋርዲያና ማዒ ኑ ፆኦዛሢ ኑና ካፓኔ።
2 ጉሙርቂሢና ዶዴ፥ ፂሎ ማዔ ዴራ ጌላንዳጉዲ
ካታሜሎኮ ካሮ ቡሊ ሃሹዋቴ።
3 ናንጊና ናንጋ ጎዳሢዮ! ጉሙርቂ ኔ ጊዳ ጌኤቂንቴ ዓሶም
ኩሙሢ ኮሹሞ ዒንጊ ኔ ዔያቶ ካፓኔ።
4 ናንጊና ናንጋ ጎዳ ጉሙርቂ ናንጉዋቴ፤
ዒዚ ኑኡኮ ናንጊና ዶዶ ላላሢኬ።
5 ዒዚ ዖቶርቃ ዓሶ ዻውሲሳኔ፤
ዼግ ዼጊ ጌዔ ካታሜሎዋ ሻሃኔ፤
ሳዖ ሲላሎይዳ ዔኪ ዒ ኬኤራኔ።
6 ሄርቂንቲ ናንጌ ዓሳ ዒዞይዴና ሃንታንዳኔ፤
ማንቆ ዓሳኣ ፔ ቶኮና ዒዞ ሄርቃንዳኔ።
7 ፂሎ ዓሶኮ ጎይፃ ፒዜኬ፤
ኔኤኒ ፒዜ ማዔሢዮ! ፂሎ ዓሶኮ ጎይፆ ኔ ፒዚሳኔ።
8 ፆኦሲዮ ዎጎ ኔኤኮ ኑ ካፒ ካፒ ሃጊ ማዓ ዎዛ ኔጊዳ ኑ ጌሣኔ፤
ኑኡኮ ዒና ማላሢ ኔኤኮ ሱንፃ ኬስኪ ቦንቺንታንዳጉዲኬ።
9 ኔኤኒ ሳዖይዳ ፒዜ ዎጎ ዎጋኣና
ዓጮ ዴራ ጎኑሞ ዔራንዳኔ፤
ታኣኮ ሼምፓሢ ዋኣንቶና ኔና ጶቂሣኔ፤
ታኣኮ ጋሮ ዓያና ኔና ኮዓኔ።
10 ፑርቶ ዓሳ ኔ ዔያቶም ኮሺ ባኣዚ ማዼቴታዖ
ኮሺ ማዺሢ ዔያታ ዔሪ ዔሩዋሴ፤
ሃያ ፂሉማ ኩሜ ሳዖይዳ ዓኣዖታዖ
ፑርቱሞ ማዺሢዳፓ ጊንሢም ጎዑዋሴ፤
ሃሣ ኔኤኮ ዼኤፑሞዋ ዔያታ ማሉዋሴ።
11 ናንጊና ናንጋ ጎዳሢዮ፥ ኔ ዔያቶ ጳርቃኒ ዔቂሴ ኩጮ
ኔና ዒፃ ዓሳ ዴንቂባኣሴ፤
ኔኤኮ ዴሮ ኔ ናሽካ ናሹሞ ዛጊ ዔያታ ቦርሲንቶንጎ፤
ኔ ሞርኮም ጊኢጊንቴ ታማ ዔያቶ ሙዖንጎ። ዔብ. 10፡27።
12 ናንጊና ናንጋ ጎዳሢዮ፥ ኑኡም ኔኤኒ ኮሹሞ ሚርጊሼኔ፤
ኑኡኮ ማዾ ቢያ ማዺ ኑኡም ኩንሤሢ ኔናኬ።
13 ናንጊና ናንጋ ጎዳ ማዔ ኑ ፆኦዛሢዮ!
ኔኤፓ ሜሌ ሚርጌ ጎዳታ ኑና ዎይሤኔ፤
ጋዓንቴ ኑኡኒ ኔ ሱንፆ ሌሊ ቦንቻኔ።
14 ያታ ቢያ ሃይቄኔ፥ ላምዓንሦ ሼምፔና ዔያታ ናንጊንዱዋሴ፤
ኔኤኒ ሜቶ ዔያቶይዳ ዓጌም ጋፒ ዔያታ ባይቄኔ፤
ላሚ ዔያታ ሼምፔና ዓኣያ ማዓዓኬ፤
ዔያቶ ጶቂሣያ ማዓ ባኣዚ ባኣያ ማዓንዳጉዲ ኔ ባይዜኔ።
15 ናንጊና ናንጋ ጎዳሢዮ! ኑ ዓጮኮ ዛጶ
ቢያ ዛሎና ኔኤኒ ዳልጊሼኔ፤
ኑኡኮ ዴሮዋ ኔኤኒ ሚርጊሼኔ፤
ዬያይዲፆና ኔኤኒ ቦንቺንታያ ማዔኔ።
16 ናንጊና ናንጋ ጎዳሢዮ! ዔያቶኮ ሜታሢ ዎዶና ኔና ዔያታ ኮዔኔ፤
ኔ ዔያቶ ጎሬ ዎዶና ሺኢጲሢና ዔያታ ኔ ባንሢ ሺሬኔ።
17 ናንጊና ናንጋ ጎዳሢዮ! ጎጲንዳ ሾይቺ ዑካኣና ማሊ ሜታዻሢጉዲ
ሾይፆ ቆፂፆናኣ ሜታዺ ዒላታሢጉዲ
ኑኡኒ ኔ ቤርታ ዒማጉዲ ማዔኔ።
18 ጎጳዼ ላኣሌሎጉዲ ኑ ማዔኔ፥ ሾይሢያ ኑና ዓርቄኔ፤
ጋዓንቴ ፔቴታዖ ናይ ኑ ሾዒባኣሴ፤
ኑ ሳዖም ዻቂንታ ኑ ዔኪ ዬዒባኣሴ፤
ሳዖ ዻካላንዳ ዓሲያ ኑ ኬሲባኣሴ።
19 ኔኤኮ ሃይቄ ዓሳ ሃይባፓ ዔቂ ሼምፔና ናንጋንዳኔ፤
ዒንሢ ዱኡፖይዳ ናንጋ ዓሳ፥ ዔቂ ፆኦሲ ቦንቾም ዎዛ ዓይኑሞ ዓይናዹዋቴ!
ዖልካ ኔኤኮ ካሪሢ ዖልኬጉዲኬ፤
ሳዓ ሃይቄ ዓሶ ሾይ ኬሳንዳኔ። ዳኣኔ. 12፡2።
ፆኦሲ ዎጋ ዎጎንታ ዴሮኮዋ ዲዒንታፓ ማዒፆ
20 ታ ዴሬዮቴ፥ ዒንሢኮ ማኣሪ ማኣሪ ጌሊጋፓ ጊንሢና ካሮ ዒንሢ ዑፃ ዎዹዋቴ፤ ፆኦሲኮ ዻጋ ዓኣዻንዳያ ሄላንዳኣና ዻካ ዎዴም ዒንሢና ዓኣቹዋቴ፤ 21 ሳዖይዳ ናንጋ ዴሮይዳ ዔያቶኮ ጎሞ ዛሎሮ ሜቶ ዓጋኒ ናንጊና ናንጋ ጎዳ ጫሪንጫ ፔኤኮ ናንጋ ቤዛፓ ፔጋዺ ጴዻንዳኔ፤ ሳዖይዳ ሼምፓሢ ዎዼ ዓሶኮ ማዻ ፔጋዺ ኬስካንዳኔ፤ ሳዔላ ዒኢካ ሃይቄ ዓሶ ዓኣቻዓኬ።