1 Yiitjuku walytja tjuṯangkuya wangka ngaatjanya kulila! Yurrunpalatju maa yankula Yiitjuku wangka nyurrangarrila tjakultjunu. Wangka palunyanyurra kulira yunyparringu, wiyanyurra kulira wantingu. Kuliranyurra Yiitjuku walytjarringu. Yalatjikunyurra ninti nyinanyi. 2 Yurrunpalatju yanu ngurra Pilipayilakutu, Yiitjuku wangka tjakultjunkukitja. Pala ngurrara tjuṯangku nganaṉanyatju panypurangkula wiipatjarrangku pungkupayi. Palunyatjanulatju maa yanu nyurrangarrilakutu, ngurra Tjitjaluniyalakutu. Tjitjaluniyanya ngurrara tjuṯangkulpilanyatju panypurangkupayi. Katutjalulanyatju kaṉṯilyankupayi nganaṉatju nyurrangarrinya Katutjaku wangka Yiitjunyatjarra tjakultjunkunytjaku. 3 Nganaṉatju nyurrangarrinya Yiitjuku wangka tjukarurru tjakultjunkupayi, wiyalatju wiyawana tjakultjunkupayi mani mantjilkitjangku. Wiyalatju yalatji kulilpayi, “Tjinguru ngaa ngurrara tjuṯangku mani, yulytjaṯarra nganaṉanya yungku, Yiitjuku wangka nganaṉatju tjakultjunkunytjala.” Yalatji wiyalatju kulilpayi. 4 Yilta, tjukarurrulatju nyurrangarrila tjakultjunkupayi, Katutjakuṉu wangka Yiitjunyatjarra. Katutjalulanyatju ngaratjunu palumpa wangka tjakultjurinkunytjaku. Katutjalu yurrunpa yalatji kuliṉu, “Yilta, ngaa tjuṯangku ngayukuṉu wangka tjananya tjukarurru tjakultjunku.” Wiyalatju kulilpayi yalatji, “Katutjaku wangka maṉkurrpa kutjula tjanala tjakultjunku, tjana kulira nganaṉanya yunypangku waḻkuntjaku.” Wiya alatji wangka maṉkurrpalatju tjakultjunkupayi, Katutjaku wangka ulaatalatju nyurrangarrila tjakultjunkupayi. Kuliṉulatju Katutjanya nganampatju yunyparrinytjaku. Paluru nganaṉanya nintingku kuliṉingi, nganaṉatju tjukarurrungku palumpa wangka tjakultjunkupayi.

5 Nganaṉatju nyurrangarrilakutu ankula tjukarurru tjakultjunkupayi, wiyalatju mayutju tjuṯangka yunypa yunypalpayi mani mantjilkitjangku. Yalatjiku Katutjanya ninti nyinanyi. 6 Wiyalatju kuliṉingi nyurrangarri nganaṉanya waḻkuntjaku, wiya. 7 Yurrunpa Yiitjuluṉi Puulanya watjaṉu ngayulu palumpa wangka ngurra tjuṯawana tjakultjurinkunytjaku. Palya ngayulu nyurrangarrinya Yiitjuku waarrkanangku inkamara mangarri, kukaku. Wiya ngayulu nyurrangarrinya yalatji inkapayi, mayutju nguwanpangku. Waarrkana tjuṯa nguwanpalatju nyinarra nyurrangarrinya yaṉṯayaṉṯalpayi, maama nguwanpangku, maamangku palumpa pipirri tjuṯa yaṉṯayaṉṯalpayi nguwanpa. 8 Yilta, nganaṉatju nyurrangarrimpa puntura yunytju nyinapayi. Yalatji yunytjulatju nyinarralatju nyurrangarrila Yiitjuku wangka tjakultjunkupayi. Wiyalatju nguḻurringkula wantingu. Wiyalatju yalatji kuliṉu, “Yiitjuku tuunlayiki tjuṯangku nganaṉanya pungkutjipingka, nganaṉa tjakultjunkuwiyangku wantinytjaku.” Wiya yalatjilatju kuliṉu, nyurrangarrinya nguḻurringkula wantinytjaku. Tjukarurrungku nganaṉatju nyurrangarrinya Yiitjukuṉu wangka tjakultjunkupayi.

9 Tjingurunyurra Yiitjuku walytja tjuṯangku kuliṉi, yilta?, nganaṉatju nyurrangarrilawana nyinanyingka. Kutulatju nyurrangarrilawana nyinarra waarrkarringkupayi. Tjiṉṯu kutjupa tjiṉṯu kutjupangkalatju waarrka kutjupa palyalpayi, mani mangarriku mantjintjaku, nyurrangarrila yinkatjipingkamarra. Yalatji waarrkarringkula nganaṉatju kutu nyurrangarrinya Yiitjuku wangka tjakultjunkupayi. 10 Yiitjuku walytja tjuṯangka palyalatju nyurrangarrilawana nyinangi tjukarurru, Katutjala kurungka, nyurrangarrila kurungkaṯarra. 11-12 Paapangku pipirri tjuṯa nintilpayi. Nganaṉatju nyurrangarrinya paapa maṉkurrpa nguwanpangku nintilpayi. Nintiralatju nyurrangarrinya pinangkatjunkupayi, tjukarurru nyurrangarri Katutjaku nyinanytjaku. Kutjupa tjuṯangku nyurrangarrinya panypurangkunytjala nganaṉatju nyurrangarrila tjungu watjilpa nyinapayi. Yalatjikunyurra ninti nyinanyi. Katutjalu yurrunpa nyurrangarrinya ngurrtjaṉu palumpa walytja tjuṯarringkula nyinanytjaku.

13 Nganaṉatju nyurrangarrinya yurrunpa Yiitjukuṉu wangka nintintjala, wangka palunyanyurra yilta kulira palumpa walytjarringu. Wiyanyurra yalatji wiyawana kuliṉangi, “Ngaatja yaṉanguku wangka, Katutjakuṉu wiya. Puulalungarri ngunytji Katutjaku wangka nganaṉala nintilpayi.” Wiyanyurra yalatji kuliṉu, Katutjakuṉu wangkanyurra yilta kuliṉu. Palunyatjanu kuwarri Katutjalu nyurrangarrinya kutu nintiṉi, tjukarurru palumpa kutu nyinanytjaku. 14 Yiitjuku walytja tjuṯaya manta Tjuutiyalawana nyinanyi. Yurrunpa Yiitjuku tuunlayiki tjuṯangku, palunya ngurrara tjuṯangku panypurangkula tjananya pungkupayi, Yiitjuku walytja tjuṯaya nyinanyingka. Yalatji nyuntupaṉu ngurrangka Tjitjaluniyala Yiitjuku tuunlayiki tjuṯangku nyurrangarrinya panypurangkula pungkupayi.

15-16 Ngurra Tjuutiyala Tjuwu tjuṯa paluru tjana mayutju Yiitjunya yiluntanu. Irriṯi Katutjaku wangka watjalpayi tjuṯaṯarra, palunya ngurrara tjuṯangku mirri pungkupayi. Nganaṉanyaṯarra palunya ngurrara tjuṯangku panypurangkula payira iyaṉu. Palulanguru Katutjanya tjanampa wiya yunypa nyinanyi, wiya. Tjana nganaṉanya marrkulpayi, “Nyurrangarri wiya yankula Tjuwuwiya tjuṯangka Yiitjukuṉu wangka tjakultjunkunytjaku, wantiya!” Tjana kulinmara Tjuwuwiya tjuṯangku palya Yiitjuku wangka kulira walytjarringkula kana kutu nyinanytjaku, Katutjaku ngurrangka. Yalatjiya kututja Katutjaku wangka kilytjuntankupayi. Palulanguru Katutjanya tjanampa ngurrkurringkula kuwarrilpi tjananya wantiku, yaṉṯayaṉṯara kanyintjawiyangku.

17 Ngayuku walytja tjuṯangkuya wangka ngaatjanya kulila! Kutulatju kulilpayi nyurrangarrilakutu yankula piyuku nyakunytjaku. Watjilpalatju nyinanyi. Puṯulatju kuliṉi maa yankula nyurrangarrilawana nyinakitjangku. 18 Yiltalatju kutu kuliṉi, maa yankula nyurrangarrinya nyakukitja. Ngayulu Puulalu kutu puṯu kuliṉingi, maa yankula nyurrangarrinya nyakukitjangku, mamuku mayutjungku nganaṉanya yangayangatjunkula kanyintjala. 19-20 Nganaṉatju yunyparringanyi nyurrangarrimpa Tjitjaluniyanya ngurrara tjuṯaku, Yiitjukunyurra tjukarurru kutu nyinanyingka. Ngula, mayutju Yiitjunyalampa piyuku ngalyananyingka nganaṉatju palunya tjakultjunkuku yalatji, “Nganaṉatju nyuntupa wangka tjananya yaṉangu Tjitjaluniyanya ngurrara tjuṯaṯarra tjakultjunu, palunyatjanuya kuwarri nyuntupa walytja tjuṯalpi nyinanyi. Yalatji nyuntupa waarrkalatju palyalpayi.”