1-2 Sika Philemon un ay-ayatonmi ya biɏunmiʼn pin-a mantudtuchu si ugud Apudyus, ha allayaʼn suɏatmi kan sika, maatod bo kan cha suludmiʼn Apphia ya si Archippus un biɏunmi si kawachimi, ya cha losan un mamatiʼn pin-a manchetchetong uwayu. Sakon si Paul, un libyaɏud gapu si mamatiyak kan Jesu Kristu. Awed si Timothy utla un sulud taku.

3 Iluwaluk ta kacheguwan chikayu kan Ama takuʼn Apudyus ya Apu Jesu Kristu ta mallin-awaoncha bo somsomokyu.

4 Pasigak manyaman kan Apudyus si malluwaluwak lu masmasmokku sika suludkuʼn Philemon, 5 ti chingngeɏk chi pammatim kan Apu Jesus ya ayatlu kan cha losan un mamati kan Apudyus. 6 Iluwaluk sika ta ibyegbyegam kan cha uchum chi mipanggop si pammati taku, ta machogchog-an cha man-aawatyu mipanggop kan cha losan un bibiɏu un maatod kan chitaku gapu si lamatiyan taku kan Jesu Kristu. 7 Sulud, magalasalak ya masegegak gapu si man-aayatlu ya mansesegeglu kan cha tagun Apudyus utlat.

8 Ked gapu si pammati taku kan Kristu, un hachi lansuluchenta, lateɏochak un mangibilin si ustuʼn koom. 9 Ngim gapu ta ay-ayatok sika, un-ulloy chi mampakpakaasiyak kan sika. Ked sakon si Paul, un leɏakay,* 9 Ha liigili si uchum un Greek manuscript ked sakon si Paul un pilaka-long-egla Kristu. Ha ugud un Greek, ossaan chi letter un mansabyaliyan chi ugud un leɏakay ya representative. ya libyabyaɏud si sala mipagapu kan Jesu Kristu. 10 Alusam ya kacheguwam si Onesimus, un musassum un ummawid. Imbilangku si Onesimus un alakku, gapu ta lamati kan Jesu Kristu si lambyegbyeg-ak si salaʼn labyabyaɏuchek. 11 Si sin-eɏgew, lappun simbin Onesimus kan sika, ngim si sala, achu simbila kan sika ya ulay kan sakon.† 11 Ha piolaʼn uguchon chi Onesimus un ngachen ked malagtuɏung.

12 Ked mangulilok siya kan sika, ulay mansigeb chi somsomokku si umoyolala. 13 Piok un inggew otyan utla kan sakon ta tuɏungalak un isun chi sika tumuɏung kan sakon si allaʼn byabyayɏuchen gapu si mangibyegbyeg-ak si bibiɏuʼn chameg. 14 Ngim achipunku ipatut lu achipunlu iteun, ti ha piok ked mampeɏpu si uwam un somsomok.

15 Hachi gapun lin chi lisilaala kan sika si sin-akitan, ta lu mangulin ichagasla iinggew kan sika. 16 Ked malipud si sala, chakampun un musassu ngim lapotpotog lu musassu. Ti lambyalin un sulud taku un ay-ayaton taku si sala. Lapotog siya kan sakon, ngim sin-umamod kan sika ti chakampun un musassum abus ngim mansulud kayu gapu kan Apu Jesu Kristu.

17 Ked lu ibilanglu sakon un kadwam, awatom siya un kamaʼd sakon chi awatom. 18 Ked lu awed killingwalaʼn lawwing kan sika willu awed utangla kan sika, ibilanglu un utangku ked sakon chi mamayed. 19 Sakon si Paul, mismuʼn sakon chi langigili si alla, byayachek losan cha utangla kan sika. Achipun masapuɏʼn ipasomsomokku kan sika un utanglu kan sakon chi biyeglu. 20 Ked sulud, koom otyan chi allaʼn chawatku kan sika mipagapu kan Jesu Kristu, ta masegeg chi somsomokku kan Jesu Kristu. 21 Ha maluɏatak kan sika, sigulachuwok un chakampun un abus chi allaʼn chawatku cha koom, ti ammuk un achu cha koom.

22 Ked osa boʼn ibyegak: Mangiyala kayu si kuwetuʼn inggewak, ti lamlamaok un songbyatan Apudyus cha luwaluyu ked mangulilak kan chikayu.

23 Alla bo si Epaphras, un biɏunkuʼn lakabyaɏud mipagapu kan Jesu Kristu. Pakumustaola chikayu utlat, 24 isula bo kan cha Mark, Aristarchus, Demas ya Luke un biɏunkuʼn mangkawachi.

25 Sapay otyan ta kacheguwan chikayu losan kan Apu Jesu Kristu.