1 Bubuɏunku un ay-ayatok, allaya mikadwaʼn suɏatku kan chikayu. Ha panggopkuʼn langisuɏat si chuwaʼn suɏat, ta ipasomsomokku otyan kan chikayu ta pakoskoscheɏonyu bibiɏu ya mampeɏkas un somsomokyu. 2 Sosomkonyu otyan cha intudtuchun cha propetan Apudyus si awi ya cha bilin Apu Jesu Kristu un Malagu un impakaammun cha apostoles kan chikayu.

3 Umula si losan, masapuɏʼn maawatanyu un lu chanchaliʼn gumatong chi alungus chi eɏgew, lumoswa cha tagu un siyad suɏutoncha lawwing un pipion chi long-egcha. Ked yokyokyokoncha chikayu 4 un kalancha, “Alla, amin! Chakampun kamman un ingkarilaʼn mangulin? Ked udman chi awechela? Latoy lawa cha aammami, ngim lappun loob-obsan cha losan lalipud si lakwaan chi lubung!” 5 Gagaɏaoncha achipun bigbigon chi katuttuwaan, un si chamchamu lan-ugud gey si Apudyus ot lakwa langit ya allaʼn pita. Lakwa allaʼn pita malipud si chelum ya chelum bo lalagula kan cha losan un latagu. 6 Ya chelum bo lanlitapla un lanyam-an losan si allaʼn pita si lalusaala kan cha tagu. 7 Ngim gapu si ugud Apudyus un illuusla insasaggala langit ya pita un kasin mayam-an. Ked apuy chi useɏola un manyam-an si manguisala ya malusaala kan cha taguʼn achipun mamati kan siya.

8 Bubuɏunku un ay-ayatok, achiyu otyan maliwatan chi allaʼn ossaan un byaleg! Si sangwalan Apudyus, man-isuwola ossaan un eɏgew si sillibun tawon! Ya ha sillibun tawon, isun chi ossaan un eɏgew kan Apudyus.* 3:8 Psalm 90:4 9 Ked chakampun un meɏolot si Apudyus un mangwa si ingkarila un siya malomsomkan cha uchum. Ngim alu-alusala chikayu gapu ta issalaʼn awed mibyellu ulay ossaan, ti piolaʼn mambyabyawi otyan cha losan un tagu kan cha byasbyasuɏcha.

10 Ngim ha eɏgew un mangulilan Apu Jesu Kristu achipun maammuwan, ti isun chi umaliyan chi man-aakaw. Ked si mangulilala, maumas chi langit un michisan chi amod un atingeɏ, ked melas cha losan si apuy, ha ilit, seɏeg ya cha bituwon ked ulay cha losan un inggew si pita maumas cha.† 3:10 Ha liigili si uchum un manuscript si ugud un Greek ha pita ya losan un inggew ked lappuncha.

11 Ked gapu ta katla mayam-alan cha losan, simma mambyalilan taku lù? Masapuɏʼn ichatunyu long-egyu kan Apudyus ya laapudyusan chi mambibiyegyu. 12 Si man-uuwayan taku si gumatngan chi eɏgew Apudyus, koon taku losan un kabyeeɏan taku ti achipun mabyeyeg ked gumatong. Si hachiʼn eɏgew, siya masgobyen ya mayam-alan cha inggew ud langit, ked melas si apuy cha losan. 13 Ngim chitaku, lamlamaon taku ingkarin Apudyus un baruʼn langit ya baruʼn pita un inggewan cha lalintog.‡ 3:13 Isaiah 65:17, Revelation 21:1

14 Ked bubuɏunku un ay-ayatok, si manguuwayanyu si hachiʼn eɏgew, ipapatiyu kabyeeɏanyu ta mampeɏkas kayu un lappun machillawanyu ya mallin-awa somsomokyu si sangwalala. 15 Laalus si Apudyus ked ibilangyu kilaaluslaʼn wayayu un illidchola taplu matatagu kayu. Siya bo insuɏat sulud takuʼn Paul kan chikayu gapu si laingla un illidchon Apudyus kan siya. 16 Si losan un suɏatla mipanggop si alla, katla pin-ala ipasomsomok. Awed cha uchum un insuɏatla un mansukun un maawatan, ked ob-obsoncha chi ustuʼn piolaʼn uguchon ti lappun ammucha ya lakapsut chi pammatichaʼn tagu un isun cha pin-an cha uchum koon si liigilin ugud Apudyus. Ked siyad kooncha machusaancha si ing-inggala.

17 Ked chikayuʼn bubuɏunkuʼn ay-ayatok, ilaaggammuyu alla. Ked an-allechenyu ta achi kayu maallilaw si boko-bokon un tudtuchun cha taguʼn achipun tumungpeɏ si lintog ked makaan kayu si bibiɏuʼn kasasaedyu kan Apudyus. 18 Ngim chumakeɏ kayu si kachegu ya pallakaammu kan Jesu Kristu un Apu taku ya Malagu kan chitaku. Ipangatu ya ichaychayaw taku si Kristu, si sala ya si ing-inggala! Amen.