1 Sakon si Paul un chilutukan Apudyus un man-apostoles Jesu Kristu. Ked alla bo si Timothy un sulud taku. Ked allaya suɏatmi kan chikayuʼn pin-a manchetchetong utlat Corinth un malaychayaw kan Apudyus, ya losan un tagun Apudyus si kaili-ili un sakupon chi probinsiya ud Achaia. 2 Ked iluwalumi kan Apudyus un Ama taku ya Jesu Kristu un Apu taku ta kacheguwancha chikayu ya palin-awaoncha bo somsomokyu losan.

3 Manyaman taku kan Apudyus un Aman Apu takuʼn Jesu Kristu, ti siya Ama takuʼn malagchegu ya Apudyus takuʼn malagliwliwa. 4 Ti tuɏutuɏungala chitaku kan cha losan un malligatan taku, taplu tumuɏung taku kan cha bubuɏun takuʼn maligligatan si losan un ligat. Ti ha mantutuɏung Apudyus kan chitaku, kamatchi otyan bo mantutuɏung taku kan cha bubuɏun taku. 5 Lu amod cha malliligat taku, isun chi makaligat taku si ligat Kristu, siya isun bo chi makakuwaan taku si chakeɏʼn tuɏung Apudyus gapu kan siya. 6 Ked lu maligatan kami, intalu ti ha alungusla ked bumaɏuwanyu ya mataguwanyu. Ked lu matuɏungan kami, siya bo ibungala matuɏungan kayu ya machogchog-an cha koscheyu un mangiyalus kan cha ulay siluʼn ligat un isun chi mangalu-alusanmi. 7 Ked hachi gapula un lappun manchuwachuwaanmi mipanggop kan chikayu, ti ammumi un ulay maligatan kayu un isun cha malliligatmi, tuɏungan Apudyus chikayu bo un isun chi maluɏungala kan chikami.

8 Susulud, pionmi un ipakaammu kan chikayu hachiʼn lakwa kan chikami si probinsiya ud Asia, ti amod cha ligatmi udchi un achipun kami makaiyalus ya lappun lamlamami un matagu. 9 Ti isumi laibilang un matoy. Kamatchi cha ligatmi. Ngim lalaweg un lakwa cha hachi losan ta mangachaɏanmi un achipunmi otyan piyeɏon chi kalobbonganmi, ta siyad piyeɏonmi si Apudyus un kalobbongala un malagu si latoy. 10 Ti sileɏaklibyela chikami si hachiʼn lapaligatanmi un kalanmi pun lu ikatoymi, ked sigulachuwonmi un seɏaklibyen chikami ulay silu makwa, ked siya pipiɏeɏonmi. 11 Tumuɏung kayu bo un mangiluwalu kan chikami. Ta lu achu mangiluwalu kan chikami, achu bo manyaman kan Apudyus si laluɏungala kan chikami si malongbyatala si luwaluyu.

12 Ichayawmi ya sigulachuwonmi si somsomokmi un cha losan un koonmi kan cha tagu, sinchumadlu kan chikayu, mampeɏkas losan un lappun litaɏu un lawwing. Ked chakampun un somsomok chi tagu lampeɏpuwan cha killingwami ti tiluɏungan Apudyus chikami gapu si kachegula. 13-14 Ti losan un suɏatmi kan chikayu, lappun lipasagid ked lalaweg cha mambyebyegami taplu maawatanyu. Ti ulay lu chaampunyu patunged maawatan cha awed kan chikami, otyan ta gumatong chi mangawatanyuʼn ustu-ustu ta lu chumtong chi eɏgew un mangulilan Apu Jesus, makwa un ichayawyu chikami un isun chi mangichayawanmi kan chikayu.

15-16 Gapu ta masigulachuk un piyeɏonyu sakon, siyad simsimmokku un ulaonmi umali geggakayon chikayu asi kami ot mangaw-as ud Macedonia ya mangoyak bo kasin utlat lu mangulilak utla un mampeɏpuʼd Macedonia, ta mamidwa maluɏungak kan chikayu un masegagenyu, ya piok boʼn mampatuɏung kan chikayu si allaʼn mambiyasiyak un umoy ud Judea. 17 Ngim gapu ta achipun lituɏuy chi simsimmokku, achiyu otyan sosomkon un chakampun si mapiɏeɏ cha ugudku un isun cha hachiʼn achipun mamati un amiloncha iteun ngim achipuncha koon.

18 Ngim ha katuttuwaan, chakampun si kamatchiyak, ti mantegochen si Apudyus ked siya tuttuwaok. 19 Ya lappun bo kamatchi kan Jesu Kristu un Alak Apudyus, ti cha losan un imbyegan Jesus killingwala. Siyad ibyegbyegami kan cha Timothy ya Silas kan chikayu si Jesus. 20 Ti cha losan un ingkarin Apudyus, si Jesu Kristu latungpaɏala. Ked hachi malakcheɏanmi si kilatuttuwala kan cha losan un tagu ta michayawan Apudyus. 21 Ked si Apudyus chi mampakoscheɏ si pammati taku losan kan Jesu Kristu ya pililiyan chitaku un mansimbi kan siya. 22 Ked limeɏkaan chitaku ta siya main-ala un chitaku bo tagula. Ha killingwala, illidchola Ispiritula un inggew kan chitaku ta siya maluttuwaan taku un idchola cha losan un ingkarila.

23 Ammun Apudyus cha katuttuwaan un ha achipunku umaliyan utlat Corinth, lawwingok un maasusu somsomokyu lu omɏak chikayu. 24 Ti chakampun un siyad panggopmi mampangat kami kan chikayu mipanggop si pammatiyu, ti sigud un ammumi un ustu cha pammatiyu. Ti pionmiʼn chogchog-an cha galasyu un malusuɏut kan Apudyus.