2 Lǝmɑɣɑsɛɛ nyǝ́mɑ mɛ,

ɩ́ nɩɩ mɑ kʋyɔɣɔtʋtʋ,

nyǝntɑɑ mɛ ɩ́ ke ŋkpɑŋŋ.

3 Pǝ tɑɣɑ pʋlʋ, ŋkpɑŋʋɣʋ nɩɩkǝnɑ tɔmnɑɑ,

ɩsɩɩ nsǝmlɛ nɩɩkʋɣʋ tɔɣɔnɑɣɑ leleŋ tɔ.

4 Tǝ́ lǝsɩ tɑ́ tǝɣɩ mpi pǝ siɣisɑɑ tɔ.

Tǝ́ cɛkǝnɑ tɑ́ tɑɑ kɛ́ mpi pǝ wɛ teu tɔ.

5 Soopu sɩ:

Mɑ siɣisɑɑ kɛ́. Amɑ Ɩsɔ pɛŋɩ-m tɑmpɑnɑ.

6 Pɑɑ nɑ mɑ tɑmpɑnɑ tǝŋʋɣʋ tɔ,

pɑ nyǝnǝɣɩ-m pɔpɔtʋ kɛ́.

Anɩ mɑ tɑ pǝntɩ.

Pǝyele mɑ hiŋ fɛɩ wɑɑʋ.

7 Yʋlʋ nɔɣɔlʋ ɩ fɛɩ ɩsɩɩ Soopu

nɑ ɩ́ nyɔɔkɩ kʋtʋɣʋ kɛ lʋm tǝlɛ.

8 Nɑ ɩ́ tɔŋ mpɑ pɑɑ tǝŋǝɣɩ siɣisuɣu tɔ

pɑ kpekǝle tɑɑ, nɑ ɩ́ nɑ ɑsɑɣɑɑ pɑ́ kɑɑkɩ mpɑɑʋ.

9 Hɑlǝnɑ ɩ́ tɔŋ sɩ pɑɑ yʋlʋ cɑɑ sɩ

ɩ́ wɛɛ Ɩsɔ kɛ́ teu,

weɣe ɩ wɑɑkɩ pǝ tɑɑ.

10 Lǝmɑɣɑsɛɛ nyǝ́mɑ mɛ ɩ́ nɩɩ mɑ tɔm

Ɩsɔ ɩɩ lɑkɩ kɑwɑlɑɣɑ.

Pǝyele Tomɑ tǝnɑ tʋ ɩɩ lɑkɩ mpi pǝ tɑ siɣisi tɔ.

11 Mpi yʋlʋ lɑpɑ tɔɣɔ ɩ lɛɛtǝɣɩ-ɩ.

Ɩ fɛlǝɣɩ pɑɑ wei kɛ́ ɩsǝnɑ pǝ mʋnɑɑ tɔɣɔ.

12 Aɑɩ yoo, tɑmpɑnɑ tɔɔ, Ɩsɔ ɩɩ lɑkɩ ɩsɑɣɑtʋ.

Tomɑ tǝnɑ tʋ ɩnɩ ɩɩ wɑkǝlǝɣɩ siɣisuɣu.

13 Ye pɩɩ wɛ mpʋ,

ɑwe cɛlǝnɑ-ɩ tɛtʋ sɩ ɩ́ pɑɑsǝnɑ-tɩ?

Yɑɑ ɑwe tʋ-ɩ sɩ ɩ́ pɑɑsǝnɑ ɑntulinyɑ tǝnɑ?

14 Ye Ɩsɔ kɑ hʋʋkɑɣɑ ɩ tɩ tɔm tike,

ɩ kɑ mʋ ɩ feesiŋ kɛ yǝlɑɑ kiŋ.

15 Tɔfɔ weesuɣu nyǝm tǝnɑ kɑ sǝpɑ

tɔm kʋlʋm tɔɔ kɛ́, nɑ yʋlʋ pǝsɩ tɛtʋ.

16 Soopu ye n wɛnɑ lɑɣɑtʋ,

ke ŋkpɑŋŋ nɑ ń nɩɩ mɑ tɔm.

17 Wei ɩ kɛ́ siɣisuɣu kolontu tɔ,

ɩ kɑ́ pǝsɩ nɑ ɩ́ tɔkɩ tɛtʋ nɑ?

Ɩlɛ ɩsǝnɑɣɑ nyɑ́ mɑɣɑsǝɣɩ sɩ

ń kʋ Siɣisilu Toŋ tʋ tɔm?

18 Ɩ tike ɩ wɛnnɑ mpɑɑʋ sɩ,

ɩ́ yɑɑ ɑwulɑɑ sɔsɑɑ sɩ ɑsɑɣɑɑ nɑ ɑwulumpiyɑ sɩ wɑkǝllɑɑ.

19 Ɩsɔ ɩɩ fɑɣɑsǝɣɩ ɑwulumpiyɑ.

Pǝyele ɩɩ pɑɑsǝɣǝnɑ liɣitee nyǝ́mɑ,

nɑ pǝ́ kǝlɩ kʋnyɔntʋnɑɑ.

Mpi tɔ, pɑ tǝnɑ pɑ kɛ́ ɩ niŋ kʋlɑpǝm kɛ́.

20 Sɔsɑɑ sǝkɩ kɛ́ nɑ pǝ́ sɑɑlǝɣɩ,

ɑhoo tɑɑ kɛ́ pɑ sǝkɩ kpɑkpɑɑ.

Pǝyele pɑ kpɛsǝɣɩ ŋmɑkǝllʋ kɛ́ tǝhɛɛ.

21 Ɩsɔ nyǝnǝɣɩ yʋlʋ mpɑɑŋ tǝnɑɣɑ,

nɑ ɩ́ nɑɑkɩ ɩ tɔntɛ.

22 Sǝkpɛtʋɣʋ yɑɑ ɑtɛtǝlɛ nɑtǝlɩ tǝ fɛɩ

nte tǝ tɑɑ ɑsɑɣɑɑ pǝsǝɣɩ nɑ pɑ́ ŋmɛlɩ tɔ.

23 Ɩsɔ pɑɑ fɛɩnɑ sɩ ɩ́ pɑɑsǝnɑ yʋlʋ

nɑ pǝ́ leeli nɑ pǝ́cɔ́ ɩ́ yɑɑ-ɩ hʋʋlɛ.

24 Pɑɑ ɩ tɑ feŋ toŋtʋnɑɑ, ɩ wɑkǝlǝɣɩ-wɛɣɛ,

nɑ ɩ́ lɛɛtɩ pɑ lonɑ tɑɑ kɛ́ kʋfɑmɑ.

25 Mpi tɔ, ɩ nyǝmɑ́ pɑ kʋlɑpǝlɛ kɛ́.

Ahoo kɛ ɩ kʋsǝɣɩ-wɛ nɑ ɩ́ tǝlǝkɩ-wɛ.

26 Nɑ ɩ́ mɑkɩ-wɛ ɩsɩɩ ɑsɑɣɑɑ,

nɑ yǝlɑɑ nɑɑkɩ.

27 Pǝ tɑɣɑ pʋlʋ, pɑ kisɑ-ɩ kɛ́,

pɑ tɑ pǝsɩ nɑ pɑ́ cɛkǝnɑ ɩ mpɑɑŋ.

28 Pɑ lɑpɑ nɑ kʋnyɔntʋnɑɑ

nɑ wɑhɑlɑ nyǝ́mɑ wii nɑ Ɩsɔ nɑ́ɑ́ nɩɩ.

29 Ye Ɩsɔ hɑwɑ nɔɣɔlʋɣʋ hɛɛsʋɣʋ

ɑwe kɑ́ kʋ pʋntʋ tɔm?

Ye ɩ tɑkɑ ɩ ɩsɛntɔɔ, ɑwe nɑ-ɩ?

Ɩnɩ ɩ feŋiɣinɑ piitimnɑɑ nɑ yǝlɑɑ pɑ tɔɔ.

30 Ɩ lɑkɩ ḿpʋ́ɣʋ́ sɩ ɩsɑɣɑʋ ɩ́ tɑɑ tɔɣɔ kɑwulɑɣɑ

nɑ ɩ́ pǝsɩ ɩsɩɩ kɑtɔkɑ kɛ yǝlɑɑ.

31 Ye pʋntʋ heelɑ Ɩsɔ sɩ:

Pɩɩ tʋsɑ-m kɛ́,

mɑ kɑɑ tɑsɑ ɩsɑɣɑtʋ kɛ lɑpʋ.

32 Mɑ pǝntɑɑ kɛ́, ɩlɛ Ɩsɔ sɛɣɛsɩ-m.

Mɑ lɑpɑ mpi pǝ tɑ siɣisi tɔɣɔ, ɩlɛ mɑ kɑɑ lɛlɩ.

33 Ɩsɩɩ Soopu, n kisuɣu

nti Ɩsɔ sɩɩwɑ tɔ.

Mpʋ tɔ, n mɑɣɑsǝɣɩ sɩ pǝ wɛɛ sɩ

Ɩsɔ ɩ́ tʋ pʋntʋ kɛ sɑlǝkɑ?

Timpi pǝ wɛɛ sɩ nyɑ́ mɑɣɑsǝɣǝnɑ nɑ

ń sɩɩkɩ pǝ tɑɣɑ nɔɣɔlʋ tɔ,

hʋlɩ-tʋɣʋ nyɑ́ nyǝm.

34 Amɑ yǝlɑɑ mpɑ pɑ wɛnɑ hʋwɛɛ tɔ,

nɑ lǝmɑɣɑsɛɛ nyǝ́mɑ tǝnɑ, mpɑ pɑ nɩɩkɩ

mɑ tɔm tɔ pɑɑ heeli-m sɩ:

35 Soopu yɔɣɔtǝɣɩ kɛ́, ɩ tɑ nyɩ pʋlʋ,

yɑɑ ɩ fɛɩnɑ lǝmɑɣɑsɛɛ.

36 Soopu mɑɣɑsʋɣʋ ɩ́ tɑɑ sɩɩ tǝnɑɣɑ.

Mpi tɔ, ɩ tɔm kʋcɔcɔtʋ wɛ kɛ́ ɩsɩɩ

yǝlɑɑ mpɑ pɑ tɑ siɣisi tɔ.

37 Pǝ tɑɣɑ pʋlʋ,

ɩ kʋlǝɣɩ Ɩsɔ tɔɔ, nɑ pǝ́ sɔɔsǝɣɩ ɩ ɩsɑɣɑtʋ tɔɔ.

Hɑlɩ ɩ kɑ́ tɛɛsǝnɑ sikɑ tʋɣʋ kɛ́ tɑ́ tɑɑ.