1 Mɑ tɑɑpɑlɑɑ mɛ, ɩ́ tɑɑ nyɩɩlɩ sɩ ɩ́ lɑ sɛɣɛsǝlɑɑ kɛ pɑɣɑlɛ. Pǝ tɑɣɑ pʋlʋ tɔɔ, ɑnɩ ɩ́ nyǝmɑ́ sɩ tɑ mpɑ tǝ kɛ́ sɛɣɛsǝlɑɑ tɔ tɑ́ hʋʋnɑʋ kɑ́ lɑnɑ toŋ nɑ pǝ́ kǝlɩ kpɑɩ nyǝ́mɑ. 2 Yɑɑsinɑɑ pɑɣɑlɛ tɑɑ kɛ́ tɑ́ tǝnɑ tǝ pǝntǝɣɩ. Ye yʋlʋ wɛɛ nɑ ɩɩ pǝntǝɣɩ ɩ yɔɣɔtɑɣɑ tɑɑ, pʋntʋ kɛ́ yʋlʋ wei ɩ tewɑ tǝkpɑtɑɑ tɔɣɔ, nɑ ɩ pǝsǝɣɩ nɑ ɩ́ kpɑ ɩ tǝɣɩ pǝ tǝnɑ pǝ tɑɑ kɛ́. 3 Tǝ tʋɣɩ kpɑɣɑnʋkpɑsɩ kɛ kpɑɣɑnǝŋ nɔɔsɩ tɑɑ kɛ́ sɩ tǝ́ pǝsɩ nɑ tǝ́ ŋmɑkǝlɩ-ɩ nɑ ɩ́ nɩɩnɑ-tʋ, pɑɑ nɑ ɩ tɔɔʋ mpɩ pǝ tǝnɑ. 4 Ɩ́ nyǝnnɑ kpɩɩlǝŋ sɔsɔɔŋ wei heelim sɔsɔɔm tuliɣi tɔ nɑ ɩ́ nɑ́ tɔtɔ. Kpɑ́tʋ́ɣʋ́ sǝkpeluɣu nɑkʋlǝɣɩ sɑɑlʋ kɛɛsǝɣǝnɑ-ɩ nɑ ɩ́ pukinɑ-ɩ timpi tɔɔ ɩ sɔɔlɑɑ tɔ. 5 Mpʋ tɔtɔɣɔ pǝ wɛɛ nɑ yʋlʋ nsǝmlɛ. Yʋlʋ nsǝmlɛ kɛ́ pʋlʋ sǝkpem kɛ ɩ tɔnʋɣʋ tǝnɑ tɑɑ kɛ́. Amɑ tǝ pǝsǝɣɩ nɑ tǝ́ lɑ kɑlɑmpɑɑnɩ kɛ́ sɔsɔɔntʋnɑɑ tɑɑ.

Ɩ́ nyǝnɩ nɑ ɩ́ nɑ́ ɩsǝnɑ kɔkɔiyɑ pǝsǝɣɩ nɑ kɑ́ nɑŋ hɔtʋɣʋ ɑnɑɑm nɔɣɔlʋ tɔ. 6 Nsǝmlɛ wɛɛ kɛ́ ɩsɩɩ kɔkɔ. Tǝ tɑɑ kɛ́ ɩsɑɣɑtʋ mɑɣɑlɑɑ, nɑ tǝ wɛ tɑ́ tɔnʋɣʋ tɑɑ nɑ tǝ́ wɑkǝlǝɣɩ tɑ́ tɔnʋɣʋ tǝnɑ tǝpɑɩ. Tǝnɑɑsǝlɛ sɔsɔɔlɛ kɔkɔ kɛ tǝ heeki nɑ tǝ́ sɔkɩ mpʋ hɑlǝnɑ tɑ sǝm. 7 Yʋlʋ pǝsǝɣɩ nɑ ɩ́ ŋmɑkǝlɩ tɑɑlɛ wontu ntɩ tǝ tǝnɑ, nɑ sumɑsɩ tǝnɑ, nɑ wontu nti tǝ tuuki tǝ lotu tɔɔ tɔ tǝ looŋɑ tǝnɑ, nɑ lʋm tɑɑ nyǝm. Hɑlɩ yʋlʋ tɩɩ tɛmɑ pǝ tǝnɑɣɑ ḿpʋ́ɣʋ́ ŋmɑkǝlʋɣʋ mɛɛ. 8 Amɑ tuu tɔ nɔɣɔlʋ tɑ tɛntɑ nsǝmlɛ kɛ ŋmɑkǝlʋɣʋ. Pǝ kɛ́ ɩsɑɣɑtʋ nti yʋlʋ ɩɩ pǝsǝɣɩ nɑ ɩ́ kpɑ tɔɣɔ. Tǝ tɑɑ sɔtʋ toŋ fɛɩnɑ tɑkɑ. 9 Ntɛɣɛ tǝ sɛɛkǝnɑ Tɑcɑɑ Sɔsɔ kɛ ɩ́ nɑ tǝmlɛ, nɑ ntɛɣɛ tǝ tǝŋsǝɣǝnɑ mpusi kɛ́ yǝlɑɑ mpɑ Ɩsɔ ŋmɑwɑ nɑ pɑ́ nǝɣǝsǝnɑ-ɩ tɔ. 10 Nɔɣɔ kʋlʋmɑɣɑ ŋkɛ kɑ tɑɑ kɛ́ fɔɔ wɛɛ. Pǝyele kɑ tɑɑ kɛ́ ɑnyɑŋkɑ wɛɛ. Mɑ tɑɑpɑlɑɑ, pǝ tɑɑ wɛɛ mpʋ. 11 Hite kʋlʋmtǝlɛ tɑɑ lʋm kɑɑ wɛɛ leleŋ nyǝm kɛ sɑɑlʋɣʋ nɑ tǝsɑlɑʋ nyǝm kɛ sɑɑlʋɣʋ. 12 Mɑ tɑɑpɑlɑɑ mɛ, tʋɣʋ ŋkʋ pɑ yɑɑ sɩ fiki tɔ kʋ kɑɑ pǝsɩ nɑ kʋ lʋlɩ tʋɣʋ ŋkʋ pɑ yɑɑ sɩ olifi tɔ kʋ pee. Nɑ tʋɣʋ ŋkʋ pɑ yɑɑ sɩ lɛsɛŋ tɔ kʋ kɑɑ lʋlɩ fiki tʋɣʋ pee. Nɑ lʋm mpi pǝ wɛ tǝnyɑŋŋ tɔ pǝ kɑɑ pǝsɩ nɑ pǝ́ lɑ́ leleŋ nyǝm.

13 Nɔɣɔlʋ wɛ mǝ hɛkʋ nɑ ɩ kɛ́ lǝmɑɣɑsǝlɛ tʋ nɑ nyǝntʋ tɔtɔ? Pʋntʋ ɩ́ yele nɑ ɩ tǝmɑ hʋlɩ mpʋ, nɑ ɩ́ lɑkɩ ɩ tǝmɑ nɑ tɩ pɑsʋɣʋ nɑ lǝmɑɣɑsɛɛ. 14 Amɑ ye mǝ lotunɑɑ tɑɑ wɛ hɑŋɑɣɑ sɔsɔɣɑ nɑ ɩkǝllɛ pɛɛkʋɣʋ hʋwɛɛ, ɩlɛ ɩ́ tɑɑ nɔkɩ mǝ tǝɣɩ hɔm nɑ ɩ́ pǝsɩ pɔpɔtʋnɑɑ nɑ ɩ́ kpɛɛsɩ tɑmpɑnɑ. 15 Lǝmɑɣɑsɛɛ ɩsɩɩ mpʋ pǝ tɑkɑ tɑ́ lɩɩnɑ Ɩsɔ kiŋ se, pǝ kɛ́ ɑntulinyɑ ɩnɛ ɩ nyǝm kɛ́, nɑ yʋlʋwɛɛtʋ hʋʋlɛ, nɑ pǝ lɩɩnɑ ɩlɔɣɔʋ kiŋ. 16 Pǝ tɑɣɑ pʋlʋ tɔɔ, timpi tɑɑ hɑŋɑɣɑ nɑ ɩkǝllɛ pɛɛkʋɣʋ pǝ wɛɛ tɔ tǝnɑɣɑ liɣituɣu nɑ ɩsɑɣɑtʋ ntɩ tǝ tǝnɑ tǝ wɛ tɑm. 17 Amɑ ye wei ɩ hikɑ Ɩsɔ nyǝm pʋntʋ wɛɛ kɛ́ tǝcɛɩcɛɩ. Pǝlɛ pǝ pɑɑsi ɩ tɑ kɛ yoolu, ɩ kɛ́ suulu tʋ, nɑ pɛɛlɛɛ tʋ, nɑ kʋpɑntʋ tike kɛ ɩ lɑkɩ, nɑ ɩ tǝmɑ tewɑ. Ɩɩ fɑɣɑsǝɣɩ yǝlɑɑ sɩ mɑ nyǝmɑ́ ɑkele mɑ tɑ nyɩ ɑkele, nɑ cɛsʋɣʋ fɛɩ ɩ kiŋ. 18 Mpɑ pɑ lɑkɩ nɑ pɑ cɔlɔ nyǝ́mɑ wɛɛkǝnɑ leleŋ tɔ pǝ wɛ ɩsɩɩ leleŋ tɑɑ kɛ́ pɑ tuuki pɑ kʋtutuum, nɑ weesuɣu ŋku kʋ tewɑ tɔɣɔ pɑ kɔŋ hikuɣu.