105
Ɩsɔ kʋpɑntʋ tɔm
(Kʋkɑlətʋ 1-15: Kʋtɔɔsʋtʋ I 16:8-22)
1 Ɩ́ sɑ Tɑcɑɑ, ɩ́ yɑɑ ɩ hətɛ.
Ɩ́ yɔɣɔtɩ ɩ kookɑlənɑɑ tɔm kɛ yəlɑɑ tɑɑ.
2 Ɩ́ yoo-ɩ yontu nɑ ɩ́ sɛɛ-ɩ nɑ cəməŋ.
Ɩ́ yɔɣɔtɩ ɩ təmɑ sɔsɔɔnɑ tɔm.
3 Ɩ́ sɑ mə təɣɩ ɩ hətɛ nɑŋŋ nyəntɛ tɔɔ.
Tɑcɑɑ pɛɛkəlɑɑ mɛ mə lɑŋɑ ɩ́ hʋləmənɑ-ɩ.
4 Ɩ́ kɛɛsənɑ Tɑcɑɑ Tomɑ tənɑ tʋ tɔɔ,
ɩ́ pɛɛkəɣɩ tɑm sɩ ɩ́ wɛɛ Ɩsɔ ɩsɛntɑɑ.
5-6 Tɑcɑɑ təmlɛ tʋ Apəlɑhɑm lʋlʋɣʋ nyə́mɑ mɛ.
Yɑkɔpʋ piyɑ mpɑ mɛ Ɩsɔ ləsɑɑ tɔ.
Ɩ́ tɔɔsɩ ɩ təmɑ sɔsɔɔnɑ tɔm,
nɑ ɩ piti təmɑ nɑ ɩ hʋʋlɛ pə tɔm.
7 Tɑcɑɑ nyɑɣɑlɛ tɑ́ Ɩsɔ
nɑ ń hʋʋkənɑ tɛtʋ tənɑ.
8 Nn sɔɔkɩ nyɑ́ nɔɣɔ sɩɩʋ tɔɔ kɛ́ pɑɑ pəcɔ.
Nyɑ́ tɔm wɛ ḿpʋɣʋ hɑlənɑ lʋlʋŋ loosi iyɑɣɑ (1000).
9 N kɑ́ tɔkɩ nɔɣɔ ŋkɑ n kɑ sɩɩwɑ Apəlɑhɑm tɔ
nɑ n tɛləsɩ kɑ tɔm kɛ Ɩsɑɑkɑ nɑ tuunɑʋ.
10 Nɔɣɔ ŋkɛɣɛ n sɩɩ Yɑkɔpʋ.
N cɛlɑ-kɛɣɛ Ɩsɛɣɛlɩ kɛ tɑm tɔɔ.
11 N heelɑ-ɩ sɩ:
Mɑɑ tɑlɑ Kɑnɑɑŋ tɛtʋ kɛ nyɑnɑ nyɑ́ lʋlʋɣʋ nyə́mɑ
nɑ tə pəsɩ mə pɑɑ nyəm.
12 Sɑɑ ɩnɩ tɔ, Ɩsɛɣɛlɩ yəlɑɑ mɛ ɩ́ fɛɩ pɑɣɑlɛ kɛ pɑɑ pəcɔ.
Pəyele ɩ́ cɑɣɑ tɛtʋ tɑɑ tɔ pə tɑ leeli.
13 Nɑ ɩ́ puki piitimnɑɑ tɑɑ
nɑ ɩ́ cɔɔkɩ kɑwulɑsɩ tɑɑ.
14 Amɑ Ɩsɔ tɑ́ tisi sɩ piitim nɑpəlɩ pə́ tɔɣɔ mə ɩsɛ,
hɑlɩ ɩ́ nɑɑsɩ ɑwulɑɑ pɑɣɑlɛ kɛ mə nyʋɣʋ tɔɔ.
15 Nɑ ɩ́ tɔ sɩ: Ɩ́ tɑɑ tokinɑ mɑ kʋləsɑɑ.
Ɩ́ tɑɑ lɑ ɩsɑɣɑtʋ kɛ
mɑ kʋyɔɣɔtʋtʋ tɛləsəlɑɑ.
16 Ḿpʋɣʋ Ɩsɔ yelɑɑ nɑ nyɔɣɔsɩ lɩɩ tɛtʋ tɑɑ,
nɑ tɔɣɔnɑɣɑ lɑŋ.
17 Ɩlɛnɑ Ɩsɔ tɛləsɩ yʋlʋ kɛ mə nɔɣɔ tɔɔ.
Yʋlʋ ɩnəɣəlɛ Yosɛɛfʋ wei ɩ tɑɑlʋnɑɑ pɛɛtɑɑ tɔ.
18 Pɑ tʋwɑ ɩ nɔɔhɛɛ tɑɑ kɛ́ ŋkpɑsɩ
nɑ nyəɣəlʋɣʋ kɛ ɩ luɣu tɛɛ.
19 Hɑlənɑ pə́ tɑlɑ wɑɑtʋ wei Tɑcɑɑ kɑ sɩɩwɑ tɔ.
Ɩlɛnɑ Tɑcɑɑ tɔm hʋlɩ sɩ ɩ kɑ wɛnɑ tɑmpɑnɑ.
20 Ḿpʋɣʋ wulɑʋ hɑwɑ nɔɣɔ sɩ pɑ hɛtɩ-ɩ.
Wei ɩ tɔkɩ kɑwulɑɣɑ kɛ yəlɑɑ tənɑ tɔɔ tɔ sɩ, pɑ́ cɛpɩ-ɩ.
21 Nɑ wʋlɑʋ kpɑ Yosɛɛfʋ kɛ ɩ təyɑɣɑ tɔɔ nyənlʋ
nɑ Yosɛɛfʋ pɑɑsəɣənɑ wʋlɑʋ nyəm tənɑ,
22 sɩ ɩ́ sɛɣɛsɩ ɩ wɑɑlɩ nyə́mɑ ɩsɩɩ ɩ cɑɑkɩ tɔ
nɑ ɩ́ hʋlɩ ləmɑɣɑsɛɛ kɛ ɩ lɑɣɑtʋ tɑsəlɑɑ kʋpəmɑ.
23 Ḿpʋɣʋ Yɑkɔpʋ polɑ Icipiti tɛtʋ tɑɑ.
Ḿpʋɣʋ Ɩsɛɣɛlɩ polɑɑ nɑ ɩ́ cɑɣɑ Kɑm*fɑ* tɛtʋ tɑɑ. ɑ Kɑm: Kɑm tɛtʋ kɛ cənɛ, pə kɛ Icipiti kɛ. Pə tɑɣɑ tɛtʋ kʋfɑtʋ nɑtələɣɩ yem.
24 Ɩlɛnɑ Tɑcɑɑ ń yele nɑ nyɑ́ yəlɑɑ huki kɑtɑtəlɑɣɑ
nɑ pɑ́ kəlɩ pɑ kolontunɑɑ kɛ toŋ.
25 Nɑ n lɑɣɑsɩ Icipiti nyə́mɑ kɛ
hʋwɛɛ nɑ pɑ tɑɑ kpɑnɑ nyɑ́ yəlɑɑ.
Nɑ pɑ́ lɑ-wɛɣɛ nyəməŋ nɑ pɑ́ muɣuli-wɛ.
26 Ḿpʋɣʋ n tilɑ nyɑ́ təmlɛ tʋ Moisi
nɑ Alɔŋ wei n kɑ ləsɑɑ tɔ.
27 Nɑ pɑ́ lɑ piti təmɑ nɑ kɔkɔlɔ nyəm nɑ toŋ
kɛ Kɑm nyə́mɑ tɛtʋ tɑɑ.
28 Ɩlɛnɑ ń yele nɑ səkpɛtʋɣʋ nyɑlɑ nɑ ɑhoo yu.
Pɑ tɑɑ nɔɣɔlʋ tɑ kpɛɛsənɑ Tɑcɑɑ kʋyɔɣɔtʋtʋ.
29 Nɑ ń pəsɩ lʋm kɛ cɑləm,
nɑ ń kʋ pə tɑɑ tiinɑ.
30 Ḿpʋɣʋ sɑlɛɛ lɩɩwɑ Icipiti tɛtʋ tɑɑ kɛ́ kɑtɑtəlɑɣɑ
nɑ ɑ́ sʋʋ pɑ ɑwulɑɑ nɑŋŋ kʋhəntəŋ tɑɑ.
31 Ɩlɛnɑ Tɑcɑɑ ń yɔɣɔtɩ nɑ kɑcɔsɩ kʋnyɑsɑsɩ
nɑ pɔtʋ lɩɩ pɑ tɛtʋ tənɑ tɑɑ.
32 Nɑ ń yele nɑ tɔmpɛɛ nɩɩ-wɛɣɛ tɛʋ lonte
nɑ cɑlɑnɑɑ tii pɑ tɛtʋ tɑɑ nɑ tə́ nyɑɣɑ kɔkɔ.
33 Nɑ ń wɑkəlɩ pɑ tɩɩŋ wei pɑ yɑɑ sɩ fiki
nɑ lɛsɛŋnɑɑ tɔ.
Nɑ ń pɛlɩ pɑ hɔɣɔlʋɣʋ tɑɑ tɩɩŋ.
34 Ḿpʋɣʋ Ɩsɔ n tɑsɑ yɔɣɔtʋɣʋ nɑ kʋtoloŋ
lɩɩ kʋ fɛɩ kɑlʋɣʋ.
35 Nɑ kʋ kpiisi pɑ tɑwɑ tɩɩŋ pee
nɑ tɛtʋ tənɑ nyɩɩtʋ.
36 Ḿpʋɣʋ Ɩsɔ kʋwɑ pɑ tɛtʋ tɑɑ kɑncɑɑlɑɣɑ piyɑ tənɑ.
Nsɩ sɩ kɛnɑ pɑ kɑncɑɑlɑɣɑ piyɑ nsi pɑ lʋlɑ pɑ ɩfepile wɑɑtʋ tɔ.
37 Ɩlɛnɑ Ɩsɔ ń ləsɩ nyɑ́ yəlɑɑ nɑ liɣitee nɑ wʋlɑ.
Nɔɣɔlʋ tɑɑ seliɣi mpɑɑʋ tɑɑ kɛ́ ɩ kpekɑ tɑɑ.
38 Pɑ tɛɛwɑ ɩlɛnɑ Icipiti nyə́mɑ feesi təfʋʋ.
Mpi tɔ, pɑ tɛɛ sʋʋkɑɣɑnɑ-wɛɣɛ.
39 Ɩsɔŋmʋntʋɣʋ kɛ Tɑcɑɑ n kentɑɣɑɑ pɑ tɔɔ kɛ́ ilim tɑɑ,
ɩlɛnɑ nyɑ́ kɔkɔ nɑɑkɩ-wɛɣɛ ɑhoo.
40 Ḿpʋɣʋ Tɑcɑɑ n mʋ pɑ kʋsələmʋtʋ nɑ ń kɔnɑ-wɛɣɛ lɛɛsɩ,
nɑ ń hɑɣɑsɩ-wɛɣɛ ɩsɔtɑɑ tɔɣɔnɑɣɑ.
41 Ɩlɛnɑ ń tʋlɩ kʋkpɑmʋɣʋ nɑ lʋm kpe
wʋlɑɣɑ tɛtʋ tɑɑ ɩsɩɩ pɔɣɔ.
42 N tɑ sɔɔ nyɑ́ tɔm nɑŋŋ nyəntʋ nti
n kɑ heelɑ nyɑ́ təmlɛ tʋ Apəlɑhɑm tɔ.
43 Ḿpʋɣʋ n ləsɑ nyɑ́ yəlɑɑ mpɑ n yɑɑwɑ tɔ nɑ pɑ wɛnɑʋ
nɑ lɑŋhʋlʋmlɛ sɔsɔɔlɛ nɑ pɑ́ wilitiɣi.
44 Ɩlɛnɑ ń cɛlɛ-wɛɣɛ piitimnɑɑ tɛtʋnɑɑ
nɑ pɛlɛ pɑ́ tɔɣɔ yəlɑɑnɑɑ təmɑ kʋlʋlʋm.
45 N lɑpɑ ḿpʋɣʋ sɩ pɑ́ təŋ nyɑ́ kiiŋ
nɑ pɑ́ tɔkɩ nyɑ́ kʋsəsɩɩtʋ.
Ɩ́ sɑ Tɑcɑɑ.