1 Ḿpʋ́ɣʋ́ wulɑʋ sɔsɔ Tɑliyusi tʋ yǝlɑɑ sɩ pɑ́ pɛɛkɩ Pɑpiloni ɩcɑtɛ tɑɑ kɛ́ timpi pɑ sɩɩkɩ lɔŋ tɑkǝlɑsɩ nɑ wontu kʋpɑntʋ tɔ. 2 Amɑ Metii hɔɣɔlʋɣʋ koloŋɑ ɩcɑtɛ Ɩpɑtɑnɩ tɑɑ kɛ́ pɑ hii tɑkǝlɑɣɑ nɑkǝlɩ nɑ pɑ́ ŋmɑɑ kɑ tɑɑ sɩ:

3 Wulɑʋ Silusi kɑ kpɑɑlɑ ɩ kɑwulɑɣɑ pǝnɑɣɑ kɑncɑɑlɑɣɑ nyǝŋkɑ tɑɑ sɩ, pɑɑ tɑɣɑnɩ Ɩsɔ tǝsɛɛlɛ ŋmɑʋ kɛ tǝ kite kʋpǝntɛ tɔɔ kɛ́ Yosɑlɛm nɑ pɑ́ lɑkɩ tǝ tɑɑ kɛ́ kɔtɑsɩ. Tǝ kʋŋkʋlʋmǝŋ kɑ́ wɛɛ mɛɛtǝlǝnɑɑ hiu nɑ nɑɑnʋwɑ nɑ tǝ wɑŋ kɛ mpʋ tɔtɔ. 4 Pɑɑ ŋmɑ pɛɛ kʋsɑɑkɛɛ kɛ cɛɛsɩ tooso kɛ́, nɑ kpeŋkpelɑsɩ kɛ cɛɛɣɑ. Kɑwulɑɣɑ kpɑncoou liɣitee kɛ pɑɑ lɑnɑ. 5 Wʋlɑ nɑ nyǝɣǝtʋ kʋpɑntʋ wontu nti wulɑʋ Nepukɑnɛsɑɑ kɑ kpɑɣɑ Yosɑlɛm Ɩsɔ tǝsɛɛlɛ tɑɑ nɑ ɩ́ ponɑ Pɑpiloni tɔ, pɑɑ mǝŋnɑ-tɩ nɑ pɑ́ sɩɩ-tǝɣɩ tǝ lonɑ tɑɑ.

6 Mpʋɣʋlɛ Tɑliyusi ŋmɑɑ tɑkǝlɑɣɑ kɛ Ɩfǝlɑtɩ pɔɣɔ tɛtʋ nyʋɣʋ tʋ Tɑtǝnɑyi nɑ Setɑ-Posǝnɑyi nɑ pɑ tɑɑpɑlɑɑ hɔɣɔlʋɣʋ nyʋɣʋ nyǝ́mɑ sɩ: Ɩ́ yele tɔm ntɩ. 7 Pǝ wɛɛ sɩ pɑ́ yele Yutɑ nyǝ́mɑ kɛ́ tǝpɑmm nɑ pɑ́ ŋmɑ Ɩsɔ tǝsɛɛlɛ. Tɛtʋ tʋ nɑ Yutɑ nyʋɣʋ nyǝ́mɑ ɩ́ sǝnɑ nɑ pɑ́ ŋmɑ-tɛɣɛ tǝ lonte kʋpǝntɛ tɑɑ. 8 Mɑ cɑɑ sɩ ɩ́ sǝnɑ-wɛɣɛ tǝ ŋmɑʋ tɑɑ, nɑ ɩ́ feŋ nɑ ɩ́ lǝsǝɣɩ kɑwulɑɣɑ kpɑncoou tɑɑ lɑmpuunɑɑ mpɑ yǝlɑɑ fɛlɑɑ tɔ nɑ ɩ́ cɛlǝɣɩ-wɛ, nɑ tǝmlɛ ɩ́ tɑɑ sǝŋ. 9 Ɩ́ pɑɑsǝnɑ teu nɑ ɩ́ cɛlǝɣɩ Yosɑlɛm kɔtǝlɑɑ kɛ mpi pɑ nyɩɩlǝɣɩ tɔ, ɩsɩɩ lɑtǝcɛnɑɑ nɑ ɩwɑɑŋ nɑ ɩwɛɛsɩ nsi pɑ lɑkǝnɑ kɔtɑsɩ kɛ ɩsɔtɑɑ Ɩsɔ tɔ, nɑ tɔɣɔnɑɣɑ nɑ tɔm nɑ nim. 10 Wɑɑtʋ ɩnǝɣɩ pɑɑ pǝsɩ nɑ pɑ́ lɑkɩ Ɩsɔ kɛ́ kɔtɑsɩ nsi sɩ wɛ-ɩ sɔɔsʋŋ tɔ, nɑ pɑ́ sǝlǝmǝnɑ wulɑʋ sɔsɔ mɑ́ nɑ mɑ pǝyɑlɑɑ. 11 Ye wei ɩ tɑ tǝŋ mɑ tɔm tǝnɛ, mɑɑ yele nɑ pɑ́ lǝsɩ ɩ tǝyɑɣɑ tesikɑ nɑ pɑ́ siki nɑ pɑ́ hɔkɔ-ɩ kɑ nyʋɣʋ tɑɑ nɑ pɑ́ pǝsɩ ɩ tǝyɑɣɑ kɛ hute. 12 Ye wulɑʋ nɔɣɔlʋ yɑɑ piitim nɑpǝlɩ pǝ cɑɑ pǝ yɔkɩ Ɩsɔ tǝsɛɛlɛ ńtɛ́ yɑɑ pǝ kisi mɑ tɔm, Ɩsɔ wei ɩnɩ ɩ wɛ Yosɑlɛm tɔ ɩnɩ ɩ kɑ hɔnɑ pʋntʋ ŋkpɑŋʋɣʋ. Tɑliyusi mɑ́, mɑ sɩɩnɑ mpʋ. Ɩ́ tǝŋ tǝ tǝnɑ tǝtetete.

13 Ḿpʋ́ɣʋ́ Ɩfǝlɑtɩ pɔɣɔ tɛtʋ nyʋɣʋ tʋ Tɑtǝnɑyi nɑ Setɑ-Posǝnɑyi nɑ pɑ tɑɑpɑlɑɑ pɑ tǝŋɑ Tɑliyusi tɔm ntǝɣɩ teitei.

14 Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ Asee, nɑ Ɩtoo pǝyɑlʋ Ɩsɔ kʋyɔɣɔtʋtʋ tɛlǝsʋlʋ Sɑkɑlɩ pɑ tɑsɑ Yutɑ nyǝ́mɑ kɛ ɑpɑlʋtʋ nɑ pɑ́ tɛɛsɩ Ɩsɔ tǝsɛɛlɛ ŋmɑʋ nɑ ɑlɑɑfǝyɑ, ɩsɩɩ Ɩsɛɣɛlɩ Ɩsɔ kɑ sɩɩʋ nɑ Pɛɛsɩ ɑwulɑɑ sɔsɑɑ Silusi nɑ Tɑliyusi nɑ Atɑkǝsɛsɛɛ pɑɑ yɔɣɔtʋɣʋ tɔ. 15 Ḿpʋ́ɣʋ́ pɑ tɛɛsɑ Ɩsɔ tǝsɛɛlɛ ŋmɑʋ kɛ pɑ tɛ ɩsɔtʋ Atɑɑ kʋyɛɛŋ tooso wule kɛ Tɑliyusi kɑwulɑɣɑ pǝnɑɣɑ nɑɑtoso nyǝŋkɑ tɑɑ. 16 Ɩlɛnɑ Yutɑ nyǝ́mɑ tǝnɑ, pɑɑ kɔtǝlɑɑ nɑ Lefii nyǝ́mɑ lɛlɑɑ mpɑ pɑ lɩɩnɑ Pɑpiloni tɔ, pɑ tɔɣɔ Ɩsɔ tǝsɛɛlɛ tʋlʋɣʋ ɑcimɑ nɑ lɑŋhʋlʋmlɛ sɔsɔɔlɛ. 17 Nɑ pɑ́ lɑ Tɑcɑɑ kɛ kɔtɑɣɑ kɛ wʋlɛ ntɛɣɛ lɑtǝcɛnɑɑ nɩɩnʋwɑ (100), nɑ ɩwɑɑŋ kɛ ŋmʋnʋɣʋ (200), nɑ ɩwɛɛsɩ kɛ nɑsǝlɛ (400), nɑ pǝŋtʋlʋŋ kɛ nɑɑnʋwɑ nɑ nɑɑlɛ. Pɑɑ Ɩsɛɣɛlɩ kpekǝle nteɣe kʋlʋmʋɣʋ, sɩ Ɩsɔ ɩ́ hɩɩsɩ pɑ tǝnɑ pɑ ɩsɑɣɑtʋ. 18 Ḿpʋ́ɣʋ́ pɑ fɑɣɑ kɔtǝlɑɑ nɑ Lefii nyǝ́mɑ kɛ kpekɑ nɑ pǝ́ kɛɛsǝnɑ pɑ tǝmɑ kɛ Ɩsɔ tǝmlɛ tɑɑ kɛ́ Yosɑlɛm kɛ teitei ɩsɩɩ pɑ kɛɛsʋɣʋ Moisi tɑkǝlɑɣɑ tɑɑ tɔ.

19 Ḿpʋ́ɣʋ́ pɑ tǝnɑ mpɑ pɑ lɩɩnɑ Pɑpiloni tɔ pɑ tɔɣɔ Tɛɛʋ ɑcimɑ kɛ pɑ pǝnɑɣɑ nɑɑlɛ nyǝŋkɑ ɩsɔtʋ kɑncɑɑlɑɣɑ nyǝŋ tɑɑ. 20 Nɑ kɔtǝlɑɑ nɑ Lefii nyǝ́mɑ pɑ kpɛntɩ nɑ pɑ́ lɑ nyɔɔŋ tɔɔ ɑsilimɑ kɛɛlʋɣʋ kɔtɑɣɑ nɑ pɑ tǝnɑ pɑ́ wɛɛ tǝnɑŋŋ. Ɩlɛnɑ Lefii nyǝ́mɑ kʋ pɑ nɑ kɔtǝlɑɑ nɑ Ɩsɛɣɛlɩ nyǝ́mɑ pɑ tɔɔ kɛ́ Tɛɛʋ ɑcimɑ ɩwɛɛsɩ ɩsɩɩ pɑ tɩɩ lɑkɩ tɔ. 21 Ḿpʋ́ɣʋ́ mpɑ pɑ lɩɩnɑ Pɑpiloni tɔ, nɑ mpɑ pɑ kisɑ cefelitu nɑ pɑ́ kpɛntǝnɑ pɑ tɛɛtʋnɑɑ kɛ Ɩsɛɣɛlɩ Ɩsɔ sɛɛʋ tɑɑ tɔ pɑ tǝnɑ pɑ tɔɣɔ Tɛɛʋ ɑcimɑ. 22 Pǝ wɑɑlɩ kɛ́ pɑ tɔɣɔ kʋkʋsʋm fɛɩ kɑkɑlɑsɩ ɑcimɑ kɛ kʋyɛɛŋ nɑɑtosompɔɣɔlɑɣɑ nɑ lɑŋhʋlʋmlɛ. Pɑ lɑŋhʋlʋmlɛ nyʋɣʋ ntɛ́ sɩ Tɑcɑɑ kɑ lɑpɑ nɑ wulɑʋ lɑŋlɛ hɛɛnɑ-wɛ. Mpʋ pǝ hɑnɑ-wɛɣɛ ɑpɑlʋtʋ nɑ pɑ́ niki Ɩsɔ tǝsɛɛlɛ ŋmɑʋ.