ཕི༌ལི༌མོན༌ལ༌ པ༌འུ༌ལུའི༌ ཆག༌བྲིས༌།
ཕི༌ལི༌མོན༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌པོ༌ གཙོ༌བོ༌ ཡེ༌ཤུའི༌ སྐུ༌ཚབས༌ པ༌འུ༌ལུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌ བྲིའ༌ ཛད༌ཏེ༌ ཨིན༌ནོག༌, ཀ༌བོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ ལོ༌ ཉི༌ཤུ༌ ཙབ༌ རྡུན༌ནི༌ སྟིང༌ནེ༌ ཨིན༌ནོག༌།
པ༌འུ༌ལུའི༌ འི༌ ཆག༌བྲིས༌པོ༌ ཀོ༌ལོ༌སི༌ གྱལ༌ས༌ནེ༌ ཨིན༌ཁན༌ནི༌ མ༌ཤི༌ཀ༌པ༌, ཕི༌ལི༌མོན༌ལ༌ བྲིའ༌ ཛདས༌། ཁོའ༌ ཨོ༌ནེ༌སི༌མུས༌ ཟེར༌ཁན༌ནི༌ ཚེ༌ཡོག༌ཞིག༌ ཡོད༌པིན༌། འི༌ ཆག༌བྲིས༌པོ༌ གྱུད༌ཏེ༌, ཨོ༌ནེ༌སི༌མུས༌སི༌ ཕི༌ལི༌མོན༌ནི༌ ཀ༌ནེ༌ ནོར༌ རྐུས༌ཏེ༌ ཤོར༌ཁན༌བོ༌, ང༌དང༌ང༌ གྱུས༌ ཆའ༌ནོག༌། ༼ཏེ༌ཏུས༌སི༌ རོམ༌མི༌ ཁྲིམས༌ ནང༌ཞིན༌, ཨོ༌ནེ༌སི༌མུས༌ལ༌ འི༌ སྐྱོན༌ནི༌ ཕིའ༌ སྲོག༌གི༌ ཆད༌པ༌ ཕོག༌ཅེས༌ ཡོད༌པིན༌༽། ཤོར༌ཏེ༌ སྟིང༌ནེ༌ ཁོ༌ སྐུ༌ཚབས༌ པ༌འུ༌ལུ༌ དང༌ ཐུགས༌ཏེ༌, ཁོང༌ངི༌ ལབ༌ཞའ༌ གྱུད༌ཏེ༌ མ༌ཤི༌ཀ༌པ༌ གྱུར༌། ཏ༌ ཨོ༌ནེ༌སི༌མུས༌ མ༌ཤི༌ཀ༌པ༌ ཨིན༌ཅེས༌པོའེ༌ ཁོ༌རང༌ངི༌ སྤོན༌བོ༌, ཕི༌ལི༌མོན༌ ཡོད༌ས༌ ལོགས༌ཏེ༌ ཆའ༌ ཐད༌དད༌པིན༌། པ༌འུ༌ལུའི༌ ཨོ༌ནེ༌སི༌མུས༌ལ༌ གྱབ༌སྐྱོར༌ ཛད༌ཏེ༌, ཕི༌ལི༌མོན༌ལ༌ ཞུ༌ཝ༌ ཞུ༌ཨིན༌ ཁོའ༌ ཤགས༌པ༌ ཏངས༌ཏེ༌ མ༌ཤི༌ཀ༌པའེ༌ སྤུན༌ཞིག༌གི༌ ཚུལ༌ལ༌, གའ༌སུས༌ ཞུ༌ཅེས༌སི༌ ཕིའ༌ བྲིའ༌ ཛདས༌།།
1
པ༌འུ༌ལུའི༌ ཆོགས༌ནེ༌ ཇུ༌།
1:1 ནེ༌ 3
1 འི༌ ཨི༌གེ༌བོ༌ མ༌ཤི༌ཀ༌ ཡེ༌ཤུའི༌ ཏོན༌ལ༌ ཙོན༌པ༌ པ༌འུ༌ལུ༌ དང༌ ང༌དང༌ངི༌ སྤུན༌ ཏི༌མོ༌ཐིའི༌ ཆོགས༌ནེ༌ ཨིན༌།
ངའེ༌ ང༌ཞའ༌ ཉམ༌པོ༌ ལས༌ ཅོ༌ཁན༌ ཕྲོ༌པ༌ ཅེས༌པ༌ ཕི༌ལི༌མོན༌ལ༌ བྲིའད༌། 2 ཡང༌ ང༌ཞའེ༌ སྤུན༌མོ༌ ཨ༌ཕིའ༌, མ༌ཤི༌ཀའེ༌ ཕིའ༌ མག༌མི༌ ཕྲོ༌པ༌ སྤུན༌ ཨར༌ཀིབ༌པུས༌ དང༌ ཁྱོ༌རང༌ངི༌ ཁང༌པའེ༌ ནང༌ང༌ ཛོམ༌ཨིན༌ ཡོད༌ཁན༌ནི༌ ཆོས༌ཚོགས༌ལའང༌ བྲིའད༌།
3 ང༌ཞའེ༌ མོས༌ལམ༌ ཕུལ༌ལད༌, དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀ༌ གུན༌ནི༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌།
པ༌འུ༌ལུའི༌ མོས༌ལམ༌ དང༌ ཐུག༌རྗེ༌ཆེ༌ ཞུས༌།
1:4 ནེ༌ 7
4 ཕི༌ལི༌མོན༌ ཁྱོ༌རང༌ངི༌ ཕིའ༌ མོས༌ལམ༌ ཞུ༌ ཟ༌ནེ༌, ངའེ༌ ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌, 5 ཅིའ༌ཟེར༌ན༌ ཁྱོ༌རང༌ངི༌ གཙོ༌བོ༌ ཡེ༌ཤུའི༌ ནང༌ང༌ ཏད༌པ༌ དང༌, དཀོན༌མཆོག༌གི༌ མི༌ དམ༌པ༌ ཚང༌མའེ༌ ཕིའ༌ ཅེས༌པ༌ ཡོད༌ཁན༌བོའེ༌ སྐོར༌ལ༌ ཚོར༌། 6 མ༌ཤི༌ཀའེ༌ ང༌དང༌གུན༌ལ༌ སལ༌ལ༌ ཛད༌ཁན༌ ཅིན༌ལབས༌ ཚང༌མ༌ ཁྱོ༌རང༌ང༌ སྙིང༌ངི༌ ཐིལ༌ནེ༌ ཧ༌གོ༌ཏེ༌, ཞན༌མ༌གུན༌ ཉམ༌པོ༌ ཁྱོ༌རང༌ངི༌ ཏད༌པ༌བོ༌ བགོ༌ཉན༌ཅེས༌ལ༌ ངའེ༌ མོས༌ལམ༌ ཕུལ༌ལད༌། 7 ཁྱོ༌རང༌ངི༌ ཅེས༌པའེ༌, ངའ༌ སྤོས༌པ༌ དང༌ གའ༌མོ༌ སྲན༌ཏྲེ༌ ཏངས༌, ཅིའ༌ཟེར༌ན༌ ངའེ༌ སྤུན༌, ཁྱོ༌རང༌ངི༌ དཀོན༌མཆོག༌གི༌ དམ༌པའེ༌ མི༌གུན༌ནི༌ སྙིང༌ང༌ སྤོས༌པ༌ ཏང༌ཏེ༌ ཨིན༌ནོག༌།
པ༌འུ༌ལུའི༌ ཨོ༌ནེ༌སི༌མུས༌སི༌ ཕིའ༌ ཞུས༌།
1:8 ནེ༌ 22
8 ཏེ༌བོའེ༌ཕིའ༌ ཞན༌ཏ༌ མ༌ཤི༌ཀའེ༌ ནང༌ང༌ ངའེ༌ ཁྱོ༌རང༌ང༌ འོས༌པ༌བོ༌ ཅོས༌ ཟེར༌ཏེ༌ བཀའ༌ཏང༌ཅེས༌སི༌ ཝང༌ ཡོད༌ནའང༌, 9 ང༌དང༌ངི༌ ཅེས༌པའེ༌ ཞས༌ཏེ༌ ངའེ༌ ཁྱོ༌རང༌ང༌ འི༌ ཞུ༌ཝ༌བོ༌ ཨིན༌། ང༌ པ༌འུ༌ལུ༌ མི༌རྒན༌ཞིག༌ དང༌ མ༌ཤི༌ཀ༌ ཡེ༌ཤུའི༌ ཞབ༌སྟོག༌ ཞུ༌ཅེས༌པོའེ༌, དག༌ས༌ ཙོན༌པ༌ཞིག༌ ཨིན༌པ༌, 10 ཁྱོ༌རང༌ང༌, ངའེ༌ བུ༌ཚ༌ ཙོགས༌ ཨོ༌ནེ༌སི༌མུས༌སི༌ ཏོན༌ལ༌ ཞུ༌ཝ༌ ཞུའད༌། འི༌རུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌, ཏད༌པའེ༌ ནང༌ང༌ ང༌ ཁོའེ༌ ཨ༌བ༌ གྱུར༌། 11 སྔུན༌ལ༌ ཨོ༌ནེ༌སི༌མུས༌ * 1:11 གིརིས༌སི༌ སྐད༌དི༌ ནང༌ང༌ ཨོ༌ནེ༌སི༌མུས༌སི༌ ཏོན༌ཏག༌པོ༌ ཕན༌ཐོགས༌ཅན༌ལ༌ ཟེར༌ར༌ནོག༌། ཁྱོ༌རང༌ངི༌ ཕིའ༌ ཕན༌མི༌ཐོགས༌ཤིག༌ ཡོད༌པིན༌, ཨིན༌ནའང༌ ཏ༌ དག༌ས༌ ང༌དང༌ ཉིས༌ཀོའེ༌ ཏོན༌ལ༌, ཁོ༌ སྲན༌ཏྲེ༌ ཕན༌ཐོགས༌ཅན༌ཞིག༌ གྱུར༌ཏེ༌ ཨིན༌ནོག༌། 12 ཞན༌ ཁོ༌ ངའེ༌ སྙིང༌བོ༌ ཨིན༌ནའང༌, ངའེ༌ ཁོ༌ ཁྱོ༌རང༌ ཡོད༌ས༌ ལོགས༌ཏེ༌ ལམ༌ཅུག༌གད༌།
13 གའ༌མོའེ༌ ནས༌ཚུལ༌ ཤད༌ཅེས༌སི༌ ཞས༌ཏེ༌ ངའ༌ འི༌རུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌, ཁོའེ༌ ངའ༌ ཁྱོ༌རང༌ངི༌ ཚབས༌ ཅོས༌ཏེ༌ ཡ༌ཏོ༌ ཅོ༌ཅེས༌སི༌ ཕིའ༌, ཁོ༌ འི༌རུ༌ ང༌རང༌ ཉམ༌པོ༌ བོར༌ཅེས༌སི༌ དོད༌པ༌ རག༌། 14 ཨིན༌ནའང༌ ཁྱོ༌རང༌ངི༌ ཀ༌ནེ༌ གོངས༌པ༌ མེད༌པ༌, ངའེ༌ ཅི༌ཞིག༌གའང༌ ཅོ༌ཉིན༌ མེ༌རག༌། ཁྱོ༌རང༌ང༌ ཝང༌ ཏངས༌ཏེ༌ མན༌པ༌, ཐད༌པོ༌ ཉམ༌པོ༌ ངའ༌ ཡ༌ཏོ༌ ཅོ༌ཅེས༌སི༌ དོད༌པ༌ ཅོའད༌། 15 ཅི༌གྱུས༌, ཁོ༌ ཁྱོ༌རང༌ ཉམ༌པོ༌ ཏུས༌བན༌ཤིག༌ བེས༌ཏེ༌ དུག༌ཅེས༌སི༌ གྱུན༌ཚན༌བོ༌, ཁྱོ༌རང༌ང༌ ཏུས༌གྱུན༌ནི༌ ཕིའ༌ ཁོ༌ ལོགས༌ཏེ༌ ཐོབ༌ཅེས༌པོ༌ མན༌ན༌ཧེ༌? 16 ཏ༌ནེ༌ཕར༌ལ༌ ཁོ༌ ཁྱོ༌རང༌ངི༌ ཚེ༌ཡོག༌ ཙོགས༌ མན༌པ༌, ཚེ༌ཡོག༌གི༌ སང༌ ཁག༌ཅན༌, ཅེས༌པའེ༌ སྤུན༌ཞིག༌ ཨིན༌ནོག༌། ཁོ༌ མིག༌སལ༌ལི༌ ངའེ༌ ཕིའ༌ རིན༌ཅན༌ཞིག༌ ཨིན༌, ཨིན༌ནའང༌ ཁོ༌ མི༌ཞིག༌ ཡང༌ གཙོ༌བོའེ༌ ནང༌ང༌ ཕྲོ༌པ༌ སྤུན༌ཞིག༌ ཨིན༌ཅེས༌པོའེ༌, ཁོ༌ ཁྱོ༌རང༌ངི༌ ཕིའང༌ མང༌ང༌ རིན༌ཅན༌ཞིག༌ ཨིན༌ནོག༌།
17 ཏེ༌ནེ༌ གལ༌ཏེས༌ ང༌ ཁྱོ༌རང༌ ཉམ༌པོ༌ དཀོན༌མཆོག༌གི༌ ཆག༌ལས༌སི༌ ནང༌ང༌ ཕྲོ༌པ༌ཞིག༌ ཐེའད༌ན༌, ཁོའ༌ གའ༌སུས༌ ཞུས༌, ཀ༌ཟུག༌ ཁྱོ༌རང༌ངི༌ ངའ༌ གའ༌སུས༌ ཞུས༌ཏེ༌ ཡོད༌གྲོ༌། 18 གལ༌ཏེས༌ ཁོའེ༌ ཁྱོ༌རང༌ང༌ ནོར༌ཁྲུལ༌ཞིག༌ ཅོས༌ཏེ༌ ཡོད༌ན༌, ཡ༌ ཁྱོ༌རང༌ངི༌ ཀ༌ནེ༌ ཅི༌ཏོང༌ ཁྱེར༌ཏེ༌ ཡོད༌ན༌, ཏེ༌གུན༌ ངའ༌ བུ༌ལོན༌ལ༌ ཀལ༌ནའང༌ གྲིག༌། 19 ཏ༌ དག༌ས༌ ང༌ པ༌འུ༌ལུའི༌ ང༌རང༌ངི༌ ལག༌པ༌ནེ༌ འི༌བོ༌ བྲིའད༌, ངའེ༌ ཏེ༌ བུ༌ལོན༌བོ༌ ཤལ༌ཨིན༌། ཁྱོ༌རང༌ང༌ ཐའ༌མེད༌པའེ༌ མི༌ཚེ༌ ཐོབ༌ཅུག༌ཅེས༌སི༌ ངའེ༌ བུ༌ལོན༌ ཡོད༌ཁན༌བོ༌, ཨིད༌ཏུ༌ མི༌སྐུལ༌།
20 འོ༌ན༌ ངའེ༌ སྤུན༌ལེ༌, ཇུ༌ཇུ༌ གཙོ༌བོའེ༌ ནང༌ང༌ ངའེ༌ ཕན༌ཐོགས༌སི༌ ཕིའ༌ འི༌བོ༌ ཅོས༌། མ༌ཤི༌ཀའེ༌ ནང༌ང༌ ངའ༌ འི༌ སྤོས༌པ༌བོ༌ ཏོང༌།
21 ཁྱོ༌རང༌ང༌ ངའེ༌ ཅོ༌ཅེས༌ལ༌ ཟེར༌ཏེ༌ ཡོད༌ཁན༌ ཚང༌མ༌ གྲུབ༌ཅུག༌ཅེས༌ མ༌ཚད༌, ཏེ༌སང༌ མང༌ང༌ ཅོས༌སི༌ ལོ༌ཁྱེལ༌ ཉམ༌པོ༌, ངའེ༌ འི༌ ཨི༌གེ༌བོ༌ བྲིའད༌། 22 ཡང༌ སྤེ༌ར༌ཞིག༌, ཇུ༌ཇུ༌ ངའེ༌ ཕིའ༌ ནང༌ཞིག༌ གྲལ༌གྲིག༌ ཅོས༌, ཅིའ༌ཟེར༌ན༌ དཀོན༌མཆོག༌གི༌ ཁྱོ༌རང༌ངི༌ མོས༌ལམ༌མ༌ ལན༌སལ༌ཏེ༌ ང༌ གྱོགས༌པ༌ ཁྱོ༌རང༌ ཡོད༌ས༌ ལོགས༌ཏེ༌ ཡོང༌ ཅུག༌ག༌ ཛད༌ཅེས༌སི༌ རེ༌ཝ༌ རག༌།
པ༌འུ༌ལུའི༌ སྟིང༌ཇུག༌གི༌ ཇུ༌།
1:23 ནེ༌ 25
23 མ༌ཤི༌ཀ༌ ཡེ༌ཤུའི༌ ཞབ༌སྟོག༌ ཞུས༌ཁན༌ནི༌ ཨེ༌པ༌ཕའ༌རས༌, ངའེ༌ ཕྲོ༌པ༌ ཙོན༌པའེ༌, ཁྱོ༌རང༌ང༌ ཇུ༌ ཞུ༌རུག༌། 24 ཡང༌ ཏེན༌ན༌ ཟུག༌གི༌ ངའེ༌ ལས༌ ཅོ༌ཁན༌ ཕྲོ༌པ༌ མར༌ཀུས༌, ཨ༌རིས༌ཏར༌ཀུས༌, དེ༌མཱས༌ དང༌, ལུ༌ཀ༌ གུན༌ནིའང༌ ཇུ༌ ཞུ༌རུག༌།
25 ངའེ༌ མོས༌ལམ༌ ཞུའད༌, གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ང༌ ཐུག༌རྗེ༌ སལ༌ཤིག༌།།