JENESESE
Peparae Busiyamo Pii Doko
Busiyamo doko Jenesese lenge. Buku dakena Anatumi yuu neta kana buipi wasiyamo dokona lao pyasi palamo. Anatumi wambu dupwa wasiyamo dokope wambu dupwame yulu koo doko kanda soo piyami dokope randa andake kanda soo nyiyaminyi dokope dusipana lao pyasi palamo. Dee Anatumi namwa wambu dupwa apa pyuo rapu pyuo karenge dokona lao namwa suu pyarama lao buku Jenesese dakena pyasi palamo. Buku Jenesese lenge doko mendaki dokona arome pii lama liti pyuo pyasi palamo.
1. Rombo 1-11 Yuu ingiyamo dokope Anatumi wambu dupwa wasiyamo dokopa apa pyuo kareyaminyi dokope dolapona arome pii dolapo pyasi palamo. Dokonako Atame Ipipa dee Kene Apelepa lao dusipana pii palelyamo yaka lenge. Apunda ama reeko epeyamopa akali Noa pyuo nyiyamo dokonape wambu dupwame anda ama londe yuu ulu piyami dokonape arome pii dolapo opetaeko dokona pyasi palamo.
2. Rombo 12-50 Isaraele wamu dupwana rora ambasuwambo kareyaminyi dupwana arome pii dokona lao pyasi palamo. Dokopa wamba akali Aporakame karo baame poraiyuo Anatu kapa ingingi lao suu pyao warombo soo kareyamosa baa mupwa ingiyamo doko namwa silyamano. Banya ikinyingi Aisakena arome pii doko opetae palamo. Aporakamena kauwange Jekope banya kingi mende Isaraele lenge dokona banya arome pii opetae palamoko. Dee Jekopena ikinyingi akalisa ipisu lama dusipa Isaraele wambu dupwana rara akalisa ipisu lama dusipana rakange kyawa lao pepa pyao reteya. Jekopena ikinyingi mende Josepe lenge dokona lao pii malu mee pyasi palamo. Apa piyamosa Jekopemoo banya ikinyingi dupwape nakamana ree palu dupwa pipya yuu Isipi dokona pali peyami dokona lao pii renge andake palamo.
Buku dakena wambunya arome pii pyasi palipyamopape Anatumi banya yulu andake piyamo doko pii mupwa. Pii poraiyuo wambo palipyamo doko Anatumi yuu neta kana buipi peparae wasiyako. Pii otapyamo dokopa Anatumi banya wambu dupwa mona reto reke lao pyulu pyuo pyakaro lalu lao leyamo pii doko pyasi palamo. Buku dakena Kamongo Anatu baa mupwa ingyuo wambu koo piyaminyi dupwana yulu yapalyuo nyuo mana lao pyalana pyuo kareya doko palamo. Banya wambu dupwa lanyuo pao nyiso piya. Isaraele wambu dupwame Anatu keta kapa ingingi lao suu pyao karenge dokona lao akali mendeme pii dupwa pepa piya. Anatunya wambu dupwa apa pyuo kapa ingingi lao suu pyao kareyaminyi dokona lao pepa piya. Nakama Anatu kapa ingingi lao suu pyalu pyao pinya lao piya.
1
Anatumi Yuu Pandape Pyuo Ingiyamo
Pii Doko
Pii Doko
1 Kanda soo dokopa Anatumi yake pandape isayuupi peparae pyuo ingiyamo dokopa 2 yuu muu dupwana angi ingyapa nao kwao siyamopa ipwa kota pete kyuwae sepala iminjaro karalu kareya. Dokona Anatunya Imambu doko ipwa ketae romo romo pyuo papyuo kareya. 3 Dokopa Anatumi lao, Yuu doko yangena leya. Leyamo dokopa yango rali piya. 4 Pipala Anatumi kandeyamo dokopa yuu yangeya doko keyange lao suu piya. Suu pyapala Anatumi yuu doko lili pipala yangara kwuara pinya leya. 5 Anatumi iminja nayamo doko kingi korakama lao iminjiyamo doko kingi kukwa lao piya. Kwuapala yangapeyamo doko yuu gii mendaki ingiya.
6 Dokopa Anatumi lao, Yake doko ipwa pipa lili pyuo sinya leya. Leyamuli pyuo lili piya. 7 Dopa pyuo ipwa ketae isapana palyuo yake kanya koenya reteya. 8 Anatumi ketae doko Yake lapala kwuara yangara piyamo doko yuu gii lapo ingyuo piya.
9 Anatumi lao, Isa panda dokona ipwa pete lili mendaki dokona sinya. Yuu doko panembena olo sinyale leyamosa dopa pyuo ingyuo peya. 10 Anatumi yuu oo lasi siyamo doko kingi Yuu lao ipwa nyuo pyaso pete siyamo doko Ipwa Kota lapala doko keyange lamo lao suu pyao kandeya. 11 Dokopa Anatumi lao, Isako peparae yuunya pulinya. Kuku pingi dupwape jinginya kapa palenge isa dupwape andena, leya. Leyamuli pyuo ingiya. 12 Pyuo ingiyamo dokopa yuu dupwana isako rara wakale wakale pyuo andeya. Kuku pingi rarape isa jingi lyingipi pulyiya. Dokopa Anatumi doko keyange lamo lao kandeya. 13 Kwuara yangara piya doko yuu gii repo ingiya.
14 Yake dokona yanga paupau lao kukwa korakamape dolapona lili pyuo rao dokome kwai kanape yuu giipi ee kanape dupwa lasaka pinya, leya. 15 Yake dokona rao karo dokopa isa yuu dokona yanganyi pyambunya, leya. Leyamuli pyuo piya. 16 Anatumi yanga paupau lenge andake lama wasiya. Wasiyamodokona kamame andake yanga paupau lenge dokome korakama dokopa kando iso karenalao dee yanga paupau kukili ingyuo lenge dokome kukwa dokopa kando iso karena lao piya. Pipala baame bui dupwa wasiyako. 17 Nakama isa yuu dokona yanganyi peyo karena lao yake dokona sulu sinya lao piya. 18 Piyamo dokome kukwa korakamape dupwana iso karo dee yangara kwuara dolapo liti pirapu pinya, leya. Anatumi doko keyange lamo lao kandeya. 19 Kwuara yangara piyamo doko yuu gii kisima ingiya.
20 Anatumi lao, Ipwa dokona lee renge bange meeree ingyuo sinya lao yaka dupwa yake dokona ketae bii lao oko simu sae pyuo papyuo karena, leya. 21 Anatumi dopa pyuo kota petena oma bange kameya wakasape lete bange ipwa dokona kata papyuo mee ree inginya lao dupwa pyuo yaka peparaepe rara wakale wakale dupwa pyuo wasiyako. Anatumi doko keyange lamo lao kandeya. 22 Kandapala Anatumi mondo lao andena lao elyape keta pisinya pyambuo lao, Nakama jingi kapape pyao malu wai kisinya pyambuo kota pete dupwa kete pyao nyelapape. Dee yaka dupwa yuu dokona wai kiso pinya, leya. 23 Lapaladoo kwuara yangara piyamo doko yuu gii kingi paki ingiya.
24 Anatumi lao, Lete bange rara wakale wakale dupwa isa yuu dokona karena. Anda mena dupwape isakona nuli nao pyao nenge dupwape bange panga panga papingi silyamo dupwape sinya, leya. Leyamuli pyuo piya. 25 Dopa pyuo pipala Anatumi mena pyuo waso bange kuki yuunya panga panga papingipi rara mendaki mendaki lao wasiya. Doko keyange lamo lao kandeya.
26 Kandapala dokopa Anatumi lao, Enda akalipi namwa yale lama isa komba pyao wasamanale. Nakambame ipwa petena oma dupwapeyakena yaka dupwape mena dupwape yuunya panga panga papingi bangepe yuu muu dupwana peparae baa iso kando kararaŋa, leya. 27 Dopa lapala Anatumi enda akalipa baa yale pyuo wasiya. 28 Wasapala dokopa Anatumi nakamba elyape keta pisinyi pyambuo lao, Nakambame jingipi parape pyao raeyo yuu dupwa minyarambuo nyuo dee bange peparaena ketae ingyuo karo pirambi. Dopa pipala ipwa petena oma dupwape yakena yakape lete bange kata paenge semalama pelyamo dupwapena peparae rapu pyuo karena, leya. 29 Dokopa Anatumi nakamba lamaiyuo, Kandalapape, kuku pingipi jingi lyuo kapa palenge isa dupwape yuu muu ree laosilyamo dupwa peparae narambi lao jilyu, leya. 30 Isa yuunya mena rara dupwape yaka ketae papingi rara dupwape bange yuu dokona panga panga papingi dupwanape dee lete bange ŋeeŋae singi peparaepena lao nambame isako kyakange dupwa nakamana nenge ingyuo nena lao mailyuko, leya. Leyamuli pyuo piya. 31 Anatumi bange piyamo dupwa peparae ama keyange ingyuo peyasa kandeya. Kwuara yangara doo piyamo dokome yuu gii pakinyamange ingiya.