Na Etana KerekereꞋa Sa Paul Fuana Ngwae FaꞋamamana Ki ꞋI Tesalonika
ꞋI Tesalonika niaꞋa taꞋi fanoa ana abaꞋi kula Ꞌi Masedonia. Sa Paul talana naꞋa neꞋe leka Ꞌi Tesalonika ka faꞋarongo Ꞌania FaꞋarongoꞋa LeꞋa fuana ngwaꞋi toꞋa ana fanoa doe neꞋeri. Na ngwae Ꞌoro noaꞋa laꞋu Jiu ki, kira faꞋamamana, ma kika donga faꞋamanataꞋanga nia. Bore ma ka Ꞌiri tau goꞋo, ti ngwae Jiu, kira ka ogalaꞋa fuana sa Paul, osiꞋana ngwae Ꞌoro ki naꞋa kira saiana rongo sulia alaꞋanga leꞋa sa Paul. GoꞋo ma kira ka inamu ana sa Paul ka leka naꞋa faꞋasia fanoa neꞋeri, ma nia ka leka laꞋu Ꞌuana Ꞌi Berea (Acts 17:1-15).
Ti ngwae Ꞌi Tesalonika, kira sui faꞋasia raoꞋa ki, duꞋungana kira fia fasi na Aofia ke dao ꞋaliꞋali naꞋa maꞋi. Ti ngwae laꞋu kika manata Ꞌabera sulia na ngwae kwaima kira ki eta mae mala Ꞌi naꞋona olilana maꞋi sa Jesus. ꞋUnaꞋeri, saena buka neꞋe, sa Paul ka faꞋasaga manatada sulia olilana maꞋi sa Christ. Nia saea fuada fuana kira ke inaꞋu ana raoꞋa kira ki Ꞌania liaꞋi ngwae aroaro, leleka ka dao ana kaidaꞋi sa Christ ke baꞋa oli laꞋu maꞋi.
Na ru talingaꞋi ki saena buka neꞋe:
Sa Paul baꞋatafea ngwae Ꞌi Tesalonika fuana fitoꞋonga kira ma na raoꞋa leꞋa kira ki & 1:1—3:13
FaꞋamanataꞋanga sulia na abulaꞋanga neꞋe faꞋasaeleꞋa God & 4:1-12
FaꞋamanataꞋanga sulia olilana maꞋi sa Jesus Christ & 4:13—5:11
FaꞋamanataꞋanga Ꞌisi & 5:12-28
1
1 Kaimili sa Silas faꞋinia sa Timoti ma nauꞋa sa Paul neꞋe kami kerekere kwau fuamuꞋa na ngwae neꞋe kamu faꞋamamana ma muka tua Ꞌi Tesalonika, na ngwae God na MaꞋa kia ma na Aofia sa Jesus Christ.
Kaimili foꞋo Ꞌiri God ke kwaiꞋofe amuꞋa ma ke kwatea na aroaroꞋanga fuamuꞋa.
Na mauriꞋa faꞋinia na faꞋamamanaꞋanga na ngwae Ꞌi Tesalonika ki
2 Kami ꞋidufaꞋi baꞋatafea God fuaumulu taꞋifau, kaidaꞋi kami foꞋo fuamuꞋa. 3 OsiꞋana kaidaꞋi kami foꞋosia God na MaꞋa kia, kami ꞋidufaꞋi manata toꞋona na abulaꞋanga leꞋa kamu sulia na faꞋamamanaꞋanga kamu, ma na raoꞋa leꞋa neꞋe kamu sasia ki sulia na alafeꞋanga kamu ki, ma na fitoꞋonga ngangata kamu ana daolana maꞋi na Aofia sa Jesus Christ.
4 Ngwaefuta nau kina Ꞌae, kaimili saiana God nia alafe fuamuꞋa, ma ka fili kamu naꞋa fuana ngwae nia ki. 5 Ana etangilana ba kami faꞋarongo Ꞌani na FaꞋarongoꞋanga LeꞋa fuaumulu, noaꞋa kami kasi fata goꞋo Ꞌani alaꞋanga kaimili ki. Bore ma, kami faꞋarongo kamu Ꞌani ngasingasiꞋanga ana na AnoꞋi ru Abu, ma kami ka faꞋataꞋinia neꞋe kami saiana na FaꞋarongoꞋanga LeꞋa ba nia mamana taꞋifau. Ma kamu sai leꞋa goꞋo amuꞋa, ana kaidaꞋi kami tua faꞋi kamu, na falafala kami ki leꞋa taꞋifau fasi Ꞌiri mike Ꞌafi kamu Ꞌiri muke faꞋamamana ana alaꞋa lamiꞋa. 6 Ma kamu faꞋamamana ana FaꞋarongoꞋanga LeꞋa, ma kamu ka saeleꞋa goꞋo aumulu, osiꞋana na AnoꞋi ru Abu neꞋe faꞋasaeleꞋa kamu, sui bore Ꞌana ngwae ki kika kwatea na ꞋafitaꞋiꞋanga Ꞌoro ki fuaumulu osiꞋana kamu faꞋamamana ana sa Jesus Christ. Ma kaumulu ka sasi sulia na falafala kami taꞋifau naꞋa ma na falafala na Aofia sa Jesus logo. 7 Ma osiꞋana na abulalamuꞋa ꞋunaꞋeri, kamu ka diꞋia naꞋa na faꞋataꞋilana fuana na ngwae faꞋamamana ki taꞋifau neꞋe kira tua saena abaꞋi kula Ꞌi Masedonia ma abaꞋi kula Ꞌi Gris. Kira ka sasi logo suli kamu. 8 Ma faꞋasi kaumulu logo Ꞌi neꞋe, na faꞋarongoꞋanga sulia na Aofia ka talofia saena Ꞌi Masedonia ma Ꞌi Gris. Ma na ngwae ana fanoa ki taꞋifau neꞋe kira rongoa logo faꞋarongoꞋa sulia na faꞋamamanaꞋanga kamu ana God. DuꞋungana nia ꞋunaꞋeri, noaꞋa kami kasi faꞋarongoa naꞋa ti ngwae sulia kamuꞋa. 9 Na ngwae neꞋeri ki taꞋifau talada, kira ka fata naꞋa sulia na kwaikwaloiꞋanga kamu fuaimili, ana kaidaꞋi kami dao kwau ana fanoa kamu. Ma kira ka alaꞋa sulia na sakadola Ꞌanga kamu faꞋasia na foꞋosilana na mala mala god ki Ꞌiri muka foꞋosia naꞋa God neꞋe mamana ma ka mauri. 10 Kira saea logo neꞋe kamu masia naꞋa na olilana maꞋi na Ngela God faꞋasia Ꞌi langi. Nia naꞋa neꞋe sa Jesus neꞋe God taꞋea faꞋasia na maeꞋa. Ma sa Jesus ka loge kia faꞋasia na kwaꞋikwaꞋinga neꞋe God ke baꞋa kwatea maꞋi.