1 Noun Filemon,

Turuo Paulo, tunama na luguan o arubu, memani tume bais o bais ula mumuru ang Karisito Iesu. Me urio babam, turuo ga Timoti, irie papa buang la osagaing me noi Filemon. Nunuo migan ing ila mumuri la ubibuong iat. 2 Omiring gat urio babam me un Apia, urie la are ekelesia lou pang, ga me aun ekelesia Akipas, irie la dusong gat na danunumiap ga pava una urio ubi ula muru o bais o ties ula mumuru. Ga umirtung me ai irie gar ma ekelesiap la mime nebola ga okosar lotu na luguan nuang. 3 Mariktung me ai Morowa irie ira buang, ga Ila Kakani Iesu Karisito la eba lialang ubonuvarap ga malina miun.

4 Tie, Filemon, na tara la tume marik me ai Morowa ruang, tume busit agat me nulam ga tume tivo bonim nuo ga tume tivo temaieng me ai Morowa me nulam. 5 Memani, busit la tupto ties noime gare ro, Nume nagan migat ira Ila Kakani Iesu, ga nume na migat maime teip ga magaulap ganam am Morowa. 6 Mariktung me ai Morowa gare ro, Eba nanang maset meba ovaiknang nagan nung mai non ekelesiap, ga eba okanirang nagan nung, ga eba alang Morowa agat la uakap noun ga eba manera mirier pagap ganam mila murum la ualam Karisito buun. 7 Eva, papa, nume mangangas dalap ma a irie tavuk nuang o na. Are ratmat ga mitara teruba me irio tavuk la nume akosar ga ume maset maidang irio tavuk nuang dalap tuo.

8 Are ratmat ga tuga nomariktang meba akosarnang non paga. Migat, mating kaguma la uala Karisito toun meba noralava maranit meba onouluan ties tung. 9 Pa tale iga okosartang gare tiruo. Karuk. Tavuk o na la ume buipam iat, are ratmat ga nomariktung teteiliat. Migat, turuot Paulo, laipaktung ara ga man tunama ka na luguan o arubu. Memani, bais tung o ties ula mumuru ang Karisito Iesu. 10 Are ratmat ga nomariktung meba kadiknang migat aime Onisimas. Aime irie Onisimas, migana nuang o ubi, irie la betong gare poi ruang na tara la tunama na luguan o arubu ga asingtuala o nagan ga betong migana la naganong ira Iesu. 11 Tinan la tale kan okosarong ubi ba ula muru meba noagaalie. Pa titot la puoong meba okosarang ubi ula muru meba iat biagaalie.

12-14 Narung aime Onisimas le onang ga turuo meba toagaalie na tara la tunama na luguan o arubu me bais ula muru. Pa tala kan okosartung gare tiro. Karuk. Memani, tale iga akosartang paga ba ira a leba tale tokenala. Memani, tale narung meba noraranang ga nairang meba onang to ga turuo. Karuk. Narung meba akosarnang irie tavuk ila mumuri iro agat nung kan. Are ratmat ga titot la asagarung Onisimas, mepama dalap tuo ga irie, ga ina terigiong me noi. 15 Atabo muana la noulai kirat a tara ila papoi, meba ina alaginang ga eba onang ga nunuo mar mirie lap ganam. 16 Are ratmat ga nunuo le agatnang maset gare ro, Titot la tale ka betong gare migana o ubi o usaga tinan. Karuk. Irie la akurupinong ara migana gare tiro titot. Migat, titot la betong gare papa migat ira Karisito ga tume maset na aime na dalap tuo. Eva, agattung irie la migana o ubi nuang ga betong gare papa nuang ira Karisito gat, ga nanang migat aime na dalap nuo.

17 Are ratmat ga leba agatnang turuo migan nuang migat na ubi ang Karisito, tie ina alaginang Onisimas ga akosarnang irie tavuk ira a garet tie la nume akosar ira ruo na tara la muruo norup. 18 Pa leba akosarang tavuk ba ila kire ira nuo tinan, o leba amaning sinauan ba noun tinan, tie eba taving uro giginanim ga tapulang. 19 Me uriro babam, turuo Paulo la omirtung a kan kilan tuo. Naptang, turuo kan la eba tapulang urie sinauan ang. Pa tala kan nomariktung meba napulang sinauan toun. Migat, pa urie sinauan gare ro, Tinan la ovaiktung bais ula muru noi ga nagannung ira Karisito. 20 Are ratmat ga papa ruang, narung meba akosarnang tavuk ila muri ira Onisimas na tara la eba ina terigiang me noi. Leba are ba rie, tie me irie tavuk nuang le mangangasnang dalap tuo ira Ila Kakani ga maset maidangnang dalap tuo meba temeba ira Karisito. 21 Nagantung maranit meba onouluan urio ties tung. Are ratmat ga omirtung urio babam me noi. Tira ra eba akosarnang tavuk la akurupin migat iruo tavuk titot la norulo meba akosarnang.

22 Tie, tuga noralava a non gat paga. Nagantung gare ro, Ila Kani la eba aptang marik ming, ga eba arolaing luguan o arubu ga ina murang miroping. Are ratmat ga narung meba aranganang kabin ba na luguan nuang meba tonang ga nunuo ana. 23 Epafras irie la ualo “la ula muru” me noun. Irie la unama na luguan o arubu ga turuo me ira Karisito Iesu. 24 Non gat migap tuam gare Makos, Aristakas, Demas, Luk, mirie gat la maialo “la ula muru” me noun. 25 Narung ume ubonuvarap ang Ila Kakani buang Iesu Ila Kakani meba iot na muranap mi.