30
Ola wed blanga Agura
1 Wal dislot na ola wed brom Agura det san blanga Jeike. Sambodi jingat langa God, “Mi brabli nokap. Mi brabli nokap. 2 Mi brabli siliwan. Ai nomo sabi enijing. 3 Ai nomo bin len blanga jidan sabibala blanga jinggabat gudwei, en ai nomo sabi blanga God.
4 “Wal enibodi bin gowap langa hebin en kambek igin? Enibodi bin holdim det win langa im bingga? Enibodi bin majurrumap ola woda brom solwoda en makam ola bandri blanga ola graun langa dijan wel? If yu sabi enibodi hubin dum dislot ting wal yu dalim mi. Dalim mi olabat neim en olabat biginini neim.
5 “Ebrijing God bin tok im trubalawan. En God im maindimbat detlot pipul hu kaman langa im blanga jidan seifwan. 6 Nomo tjeinjim wanim God bin tok. If yu tjeinjim detlot wed im garra panishim yu en shoum ebribodi yu laiyinbala.
7 “Wal ai garra askim yu na God blanga dum dubala ting blanga mi bifo ai dai. 8 Yu meigim mi jidan brabli trubalawei, en yu nomo larram mi jidan brabli ritjwan o brabli powan, bat jis gibit mi naf daga ebridei. 9 If ai abum tumatj daga ai mait fogedabat yu. If ai nomo abum naf daga ai mait go stilimbat en bringim sheim langa yu neim.”
Mowa brabli gudwan wed
10 Yu nomo tok nogudbalawei blanga eni wekinmen langa im bos. If yu dum lagijat det wekinmen garra askim God blanga meigimbat trabul langa yu en yu garra abum bigiswan trabul.
11 Sambala pipul askim God blanga meigim trabul langa olabat dedi en mami.
12 Sambala pipul reken dei brabli gudbala, bat dei nomo jidan fri brom ola nogudbala ting weya dei oldei dumbat.
13 Sambala pipul oldei reken dei jidan brabli gudbala, bat dei oldei jidan brabli praudbalawei.
14 Sambala pipul jidan brabli gridibala en dumbat krulbala ting langa ola po pipul en langa detlot pipul hu nomo abum eniweya blanga silip.
15 Det gridibala garram dubala doda en det dubala garram seim neim, “Gibit Mi”.
Wal dislot fobala ting nomo jidan sedisfaid. Olabat na
16 det greibyad,
det wuman hu kaan abum biginini,
det graun weya wandim rein,
en det faiya weya kipgon barnbarn.
17 If yu meigimbat fan blanga yu dedi, en if yu nomo abum rispek blanga yu mami, detlot kro garra deigimat yu dubala ai en detlot igulok garra kaman en dagadagatbat yu bodi.
18 Ai kaan sabi dislot fobala ting. Olabat na
19 hau detlot igulok oldei flaiflaibat ontop langa skai,
hau detlot sneik oldei kraulkraulbat ontop langa ola ston,
hau detlot bout faindim olabat wei langa solwoda,
en hau boi en gel oldei laigim gija.
20 Det waif hu oldei silipsilipbat garram det men hu nomo im hasbin, im oldei tok, “Wen mi silip garram naja men, ai nomo dum enijing rong.”
21 Dislot fobala ting meigim dijan graun sheiksheik en det graun nomo laigim. Olabat na
22 det wekinmen hu jidan laiga prisana en dei meigim im king,
det silibala men hu oldei dagadagatbat tumatj daga,
23 det wuman hu nobodi laigim wen im faindim hasbin,
en det wekingel hu deigim pleis blanga im gelwan bos.
24 Dislot fobala brabli lilwan enimul jidan langa dijan wel, bat olabat brabli klebawan.
25 Jinggabat detlot ent. Olabat nomo strongbala bat dei oldei pudumwei olabat daga ebri hotwethataim.
26 Jinggabat detlot rok walabi. Olabat nomo garram pawa, bat olabat oldei jidan langa ola stoni pleis.
27 Jinggabat detlot grashopa. Olabat nomo garram king, bat dei wokwok jis laik ami.
28 Jinggabat detlot lisid. Yu gin holdim garram yu bingga, bat dei gin gowin snikinwei langa ola bigwan haus blanga ola king.
29 Dislot fobala ting oldei wokwok praudbalawei.
30 Jinggabat det laiyan. Im nomo bradin blanga enijing, en im jidan bos blanga detlot bush kantri.
31 Jinggabat det boiwan jukjuk. Im jingat praudbalawei.
Jinggabat det boiwan gout. Im oldei wokaran praudbalawei.
Jinggabat det king. Im wokwok lida langa im ami.
32 If yu oldei jidan praudbala en silibala en meigimbat nogudwan plen, yu garra stap dumbat lagijat. 33 Wen yu sheikimap milk, yu meigim bada. Wen yu hitim miselp langa nos, yu meigim blad kamat. En wen yu jidan einggriwan yu garra faindim miselp langa trabul.