12
Singim song en preisimbat YAWEI
1 Wal aibin kipgon tok, “Wal langa det taim na yumob garra sing,
‘Theingkyu YAWEI.
Yubin oldei wail langa mi,
bat yubin stap wailwailbat langa mi,
en yubin meigim mi jidan brabli gudbinjiwei.
2 YAWEI main God, mi oldei trastimbat oni langa yu blanga seibum mi.
Ai kaan neba bradin.
Mi fil brabli strongbala brom det pawa blanga yu.
Oni yu na bin seibum mi.✡ Eksa 15:2; Saam 118:14
3 Wen pipul dringgimbat springwoda olabat jidan gudbinji.
Seimwei, detlot pipul blanga God jidan brabli gudbinji wen im seibum olabat.’
4 “Langa det dei na yumob garra sing,
‘YAWEI, melabat brabli gudbinji langa yu.
Melabat sei theingkyu,
en melabat weship oni langa yu.
Melabat garra dalim ola pipul wanim yubin oldei dumbat,
en hau yu jidan brabli gudbala en haibalawan.
5 Dumaji yubin dum brabli gudbala ting,
melabat garra singsing en preisimbat langa yu neim ebriweya langa dijan wel.’
6 Singim song yumob brom Saiyan,
en preisim YAWEI det brabli holiwan God blanga Isreil pipul.
God im jidan iya blanga album im pipul olabat.”