1 Wal Hoseiya bin tok, “Ol yumob Isreil pipul, yumob garra kambek langa YAWEI det trubala God blanga yumob, dumaji det nogudbalawei blanga yumob bin meigim yumob gowei brom im. 2 Yumob garra kambek langa im en gibit miselp langa im, en yumob garra prei, ‘Yu larramgo melabat fri brom ol detlot nogudbala ting weya melabat bin oldei dumbat, en yu jinggabat langa melabat weya melabat prei langa yu. 3 Det kantri Asiriya kaan seibum melabat, en melabat ronwan hosis en ola wepan kaan album melabat. Wal melabat kaan tok langa detlot drimin sheip igin en gulum olabat God blanga melabat. Detlot drimin sheip nomo God. Oni yu na YAWEI det trubala God, en yu na oldei kain langa detlot pipul hu nomo garram enibodi blanga album olabat.’ ” Lagijat na Hoseiya bin tok.

4 Wal YAWEI bin tok, “Ai garra bringimbek main ronwan pipul olabat langa mi, en ai garra kipgon laigimbat olabat, en ai kaan wail langa olabat enimo. 5 Ai garra lukaftumbat ola Isreil pipul jis laik det rein weya im wodarimbat det draiwan graun, en dei garra jidan gudbalawei jis laik detlot purdiflawa weya dei gro gudwei. Dei garra jidan strongbala jis laik detlot bigiswan tri weya gro deya langa det kantri gulum Lebanan, 6 en dei garra abum bigismob biginini jis laik detlot grinwan bushis weya gro gudwei, en dei garra luk purdiwan jis laik detlot purdiwan olibtri, en pipul garra laigim olabat jis laik dei laigim detlot gudsmelwan tri deya langa Lebanan.

7 “Wen ai bringimbek main pipul olabat, ai garra kipgon lukaftumbat olabat, en ai garra meigim olabat gro jis laiga gadin, en ai garra meigim olabat abum bigismob biginini jis laik det greiptri weya im abum bigismob daga, en pipul brom ebriweya garra laigim olabat jis laik dei laigim det wain weya dei meigim langa Lebanan.

8 “Wal ol main pipul olabat brom Isreil kaan jinggabat ol detlot drimin sheip enimo na, en ai garra oldei irrim olabat wen dei prei langa mi, en ai garra kipgon lukaftumbat olabat, dumaji ai garra kipgon maindimbat olabat en meigim olabat jidan gudbinjiwei jis laik det grinwan tri weya im gibit gudwan sheid. Lagijat na ai garra kipgon lukaftumbat olabat en gibit olabat ola gudwan ting.” Lagijat na YAWEI bin tok.

9 Wal Hoseiya bin tok, “Ol yumob pipul hu garram gudwan main, yumob garra jinggabat dislot ting iya langa dijan buk. En ol yumob pipul hu sabi, yumob garra pudum dislot ting insaid langa yumob hat, dumaji det wei blanga YAWEI det trubala God im rait, en ola gudbala pipul garra bulurrum det wei blanga im. Bat ola nogudbala pipul kaan teiknodis langa det wei blanga im, en tharran na meigim olabat gowei brom im.”

Binij na.