Paul Nunda Reta Gitida, Tesalonaika Embokena Gefusira, Amo Eviri.
Paul reighi Tesalonaika aminda vironu sedo ainda amboda, nu eredo ira reighi Corinth aminda irise, reta evia gefusira. Amo avose, ghaeko 52 A.D. ainda jokáda gefusira. Bajari nange jovereghe furarira aindae, ne manamana etero gido, Paul reta evia gefusira.
Paul Nunda Reta Gitida Tesalonaika Embokena Gefusira, Ainda Mendo Mendo Mo Eviri.
1:1 Paul ne ategi usira.
1:2—3:13 Paul nenda tumondari a irari ava gosuse, ivuga use sakai sisira.
4:1-12 Ari eveva aoro dae sise, Paul dengoro indudusira.
4:13—5:11 Bajari jovereghe furari da sifo aminda rea sirorarira, aindae Paul sisira.
5:12—5:28 Tesalonaika embo nange fakina edo, Bajari da furari sifo kaifa aetera ainda geka sedo, Paul ne ategi edo, tano usira.
1
1 Arie, nanda nano namendi! Namane Paul, Silas, a Timothy de dabade ne ategi erera. Ne reighi Tesalonaika aminda irise, God Afa a Bajari Iesu Keriso da ekaresia+ edo ireva ava, namane ne ategi beká ava erera. Sonemba a dubo jama nemokena irare! Yari budo givu!
1:2-10 Tesalonaika Embo Ne God Tumonduse, Nunda Uju Ava Edo Ghuseri.
2 Namane evovodae nemo kotise, God kena nendae aiyakoe sise irera, a kotugo, nendae benunu sise irera. 3 Ne God tumonduse, nunda saramana use ireva, aindae namane God kena aiyakoe sise irera. A kotugo, ne God da dubo bari budo natofo sonembuse ireva, a ne fakina edo, Bajari Iesu Keriso tumonduse kaifa use ireva, aindae aiyakoe sise irera.
4-5 Namane era nemokena buvudo, God da Bino Eveva sisera amo, jo geka vanemboi saeri. Geka amo fakinaghaeri. God nunda Asisi Kakara mutiri budo, ne kasama e gogoghombusevu: geka amo geka bekári. Ava gido, namane evia kasama erera. Namanenda nano namendi, God ne dubo ruruse, nunda tofo aovo dae sedo, ne gategusira. Namonde sifo aminda dabade irise, ne namanenda irari ava gosusevu. Namane saramana edo ghusera amo, nene eveva itatamaovo dae sedo, aindae nembo saramana edo ghuseri. 6 O nemo, namanenda amboda amboda, a Bajari da amboda amboda use iriavu. Ne aindae sedo, dara a mema mindafugo ava itatamusevu. Avata kotugo, Asisi Kakara ivuga muturaira ava budo, ainghae dabade ne namanenda geka ningido tumondusevu. 7 Aminguse, ekaresia+ mendeni Frovensi Masedonia a Greece aminda irera aikena, ne ijugaboro eveva edo ireva. 8 Na aminge resena da susu mo eviri. Bajari da Bino nemokena ghedo ivegedo iri, evetu genembo Frovensi Masedonia a Greece aminda irera, aimi nininguseri. Kotugo, jo aminda ainembo ningoro dadabaeri. Ne nange God tumonduseva, ainda bino ava ira reighi isambuda buviri, evetu genembo ningido fakina ruruseri. Ava sedo, nenda bino aindae, namane jo osa sae eraera. Ainda beká mo: evetu genembo anakora nininguseri. 9 Ne nange namane bu kaifa use, nenda ove kevari ava ighagha e dodo God tumonduseva aindae, natofo isambu osa sise irera. Ne God beká jebuga irira ava tumonduse ireva aindae, osa sise irera. 10 A ne nange God da Mandi utuda ghe vose furarira ava kaifa use ireva aindae, osa sise irera. Nunda Mandi Iesu resena emo, God nune setiri ambarida ghe jebuge erorusira. A kotugo, Iesu da fakina a sonembaimi, God da janje eko furari dae erira ava, namonde darigarera.