HEBREW
Mi-ngaidiang Chemajia
Chonglamsaat
Hebrew larik hi Inzootna Maruo ah Pathian chongleiril ngai katamkhat kha Jisu'n huui mintung kha malarra malung masokna chemajia eii. Hiwahi chongpui inkhat angnga injia. Hebrew suungnga angtho thoa Jisu'n Pathian chongleiril kha huui mintungme khat-um Jihudi Thiampu Kalian chuontho ngai jarra Inzootna Maruo chongmun 60 chungtiang inthiangtak-ah amalar. Hiwa jarra hiwa larik hin Jihudi Christian ngai malung masokna ajar inkhat kha eii. Jisu'n angtho-thoa dan kha puimintungme halli thiampu ngai'n woikhat inlet-ah dooiphur ngaihi penunujei tijarra Hebrew in amalarjei. Jisu'n manu rakip sik-ah na-inphal piya nathipijei, halli woikhat bit ithi khan apha rakip sik-ah ejei. Eini Pathian kangamna sik-ah rahoi kanamasuok Jisu Christa nukjuili amadiang ngamnachak nasik Hebrew ngai diangnga chemajia hin awini eini pha-ah Christian ngai innum malung masokna kha nimu (12:2).
Tu-inkhat innum Hebrew hi tu imajiame jetmu takkha kasing-kathei ngai'n Tirton Paul, Luke emakli Barnabas lei-echa tia ngamna inda. Hiwa inmajiana apha um jetmu takkha hiwahi Christa inneisuonuk kum 70 tungmadet inleimajia lei-ete tia katam khat in inngamna. Jerusalem hi 70 AD ah inmakoi, takkha hiwa larik kamajiapa in Jerusalem jarra aril pha khawa kha lakakoimak angnga aril, Hebrew hi Rome khuopuiya inleimajia eii (13:24) halli koisuok katamkhat karra insem lei-ete.
Asuungnga kaom Chong
1. Injiapa in amalar khachu Jisu hi Pathian chongkachoi ngai khat-um marwaan tirton ngai neek-ah alok (1:1–4:13)
2. Injiapa in anuoikata ah amalar khachu Jisu hi Jerusalem Pathian biak-inn suungnga sepakatho thiampu ngai neek-ah alok (4:14–7:28)
3. Pathian in Moses diangnga ileipeii dan dungjuiya Pathian in ama mi ngaile inzootna maruo ileida khaneek-ah Jisu chuontho in alok (8:1–10:31)
4. Jisu hi alam rakip ah kalokkhet eii tia arilcheen suonuk, kamajiapa'n chuon tak-ah thosik minchuna katamtak aleipeii (10:32–13:17)
5. Ahekna-ah kamajiapa in malung masokna khat-um minpaakna chong lekkhat majia-ah larik hi aminhek (13:18-25)
1
Asapa diangnga inphut Pathian chong
1 Tiallaichu, Pathian chongkachoi ngai diangnga inphut amun angjet khat-um alam angjet-ah Pathian in nipi-nipu ngaidiang aleiril, 2 takkha hiwa ajuohekna nikhuoni ngai hinchu Asapa diangnga inphut eini na-inbiak puijei. Pathian in Asapa diangnga inphut nuoipilchung hi abool, halli ahekna-ah Pathian in ikadang ama kha angrakip mapu amin ejei. 3 Ama'n Pathian poina ra-ang kha ejei, halli Pathian tak omchan rathuul kha ama ejei, ama ranak neina chong khan manmasituol pumpui mahuumma aleida. Miring rakip manu ngai ngaidamna apesuoli, Ranak Kaneikhet Pathian changtiang marwaan khan ama in-ongjei.
Pathian Sapa lokna
4 Sapa kha marwaan tirton ngai neek-ah aminlok, halli Pathian in inmani ngai diangnga ipe raming neek-ah kalok kha amadiang apejei. 5 Ajarchu Pathian in ama marwaan tirton ngai inkhattak diang-um,
“Nang Kasapa na-eii;
awini kei Napa ka-ejei.” leitimak.
Emakli Pathian in marwaan tirton inkhattak diang,
“Kei ama Pa ka-esik eii,
halli ama Kasapa esik eii,” timak. Minpkla 2:7; 2 Sam 7:14; 1 Khang 17:13
6 Takkha Pathian in Asapa salutir kha nuoipilchungnga ajuotir siktiang, ama'n ati,
“Pathian marwaan tirton rakip in ama kha chubei inthosik eii.” Innidan 32:43
7 Takkha Pathian in marwaan tirton ngai jarra hintia aril,
“Pathian in ama marwaan tirton ngaikha ratha ngai amin-eii,
khat-um ama suok ngaikha meimachuon amin-eii.” Minpkla 104:4
8 Takkha Pathian in Sapa jarra hintia aril:
“Narengram kha, E Pathian, hektik-kaboi esik eii!
Nang in nami ngai chungnga katuunna wai naroonsik eii. Minpkla 45:6,7
9 Nang in katuun kha namanuom halli katuunmak kha namatir.
Khawajarra Pathian, Napathian in nang kha anakadangjei
halli nasap ngai diangnga ipekha neek-ah
kheella kayana kalok kahoi kha nangdiang anapejei.”
10 Ama innum aril,
“Pumi, nang in, inphutna-ah nuoipil nabool,
halli nakuttak in marwaan ngaikha nabool. Minpkla 102:25-27
11 Inmani rakip lamangsik eii, takkha nangchu mangnutin jei;
inmani rakip kha puondiar ngai angnga amaruosik eii.
12 Nang in inmani kha songkol inchuol angnga nathepsik eii,
halli inmani kha puondiar angnga inthuulsik eii.
Takkha nang chu pha rakip-ah inthuul makche,
halli naringkhuo um angtikniteii heknuni.”
13 Pathian in ama marwaan tirton ngai inkhattak diang:
“Kei'n nangni inhalpui ngaikha nakeii nuoiya
naketouna kamin emak laiseng,
kachangtiang hin in-ongro” leitimak. Minpkla 110:1
14 Hanle, marwaan tirton ngai ang in-eme? Inmani ngaihi Pathian sepa katho halli sanminringna kamusik ngai kasansik ah ama'n ijuotir ratha ngaikha in-eii.