8
Ri Jesucristo jari' xpa'e' chuvech ri c'ac'ac' ruvujil c'aslen
1 Vacami c'a, ri ruc'u'x ronojel ri nkutajin chubixic chive, ja chi roj c'o jun Nimalaj ka-Sacerdote ri xtz'uye-apu pa rutz'uyubal pa ru-derecha ri nimalaj rutz'uyubal ri Dios chicaj.* Ef. 1:20; Col. 3:1. 2 Y nu'on ri samaj ri can samaj vi richin jun sacerdote chila' chupan ri kitzij racho ri Dios, ri banon roma ri Dios y man coma ta vinak.* He. 9:11. 3 Roma ri ye'oc nimalaj tak sacerdotes pa quivi' ri israelitas, eyo'on richin yequicamisaj chicop y yequisuj sipanic* He. 5:1. chuvech ri Dios roma ri mac. Romari' ja jun ri Jesús xc'atzin chi c'o xusuj chuvech ri Dios. 4 Xa ta ri Jesús c'a c'o ta choch'ulef, rija' man ta sacerdote, roma c'a ec'o na sacerdotes israelitas ri yesuju sipanic chuvech ri Dios achel nu'ij chupan ri ley ri xyo'ox che ri Moisés. 5 Y ri samaj ri niqui'en ri sacerdotes ri' chupan ri jay vave' choch'ulef, xaxe yan jun ruvachibel ri nuc'ut-apu chikavech pa ruvi' ri kitzij samaj chupan racho ri Dios chicaj.* He. 9:23. Romari', tok ri Moisés ja nunojij nupaba' ri jay ri xti'an che tziek, ri Dios xu'ij che: Tatz'eta' chi ronojel ri xta'an che ri jay, junan-junan ntel riq'uin ri achel xc'ut chavech pa ruvi' ri juyu'.* Ex. 25:40; 26:30; 27:8; Nm. 8:4; Hch. 7:44. Quiri' xu'ij ri Dios che ri Moisés. 6 Pero vacami nik'alajin chi ri samaj ri nu'on ri Jesús, más q'uiy ruk'ij chuvech ri samaj xqui'en ri sacerdotes pa quivi' ri israelitas. Quiri' mismo, ri c'ac'ac' ruvujil c'aslen ri pa'el rija' chuvech, más q'uiy ruk'ij roma más utz ri nusuj ri Dios chupan, que chuvech ri ruvujil c'aslen ri c'o na'ey. 7 Roma xa ta ri na'ey ruvujil c'aslen xtiquer chi tz'akat xeruto' ri vinak chuvech ri quimac, man ta chic xc'atzin jun ruca'n ruvujil c'aslen.* He. 7:11, 18.
8 Pero can xc'atzin-vi jun ruca'n roma ri Dios quire' xu'ij richin xch'olin pa quivi' ri rutinamit:
Tiya' na pe pa cuenta chi xque'uka k'ij,
Tok xtin-en jun c'ac'ac' ruvujil c'aslen quiq'uin ri aj pa roch'ulef Israel y ri aj pa roch'ulef Judá.* Jer. 31:31.
9 Pero man achel ta ri ruvujil c'aslen ri xin-en quiq'uin ri cati't-quimama',
Chupan ri k'ij tok achel xinyukej-pe chiquik'a' richin xenvelesaj-pe pa roch'ulef Egipto;
Roma rije' xa man xcajo' ta xqui'en ri nu'ij chupan ri ruvujil c'aslen ri xin-en quiq'uin,
Y romari' yin xenxutuj can, xcha' ri Ajaf.
10 Roma c'a ri', quire' rubanic ri ruvujil c'aslen ri xtin-en quiq'uin ri aj pa roch'ulef Israel:
Tok xtuka ri k'ij,
Xtinya' ri nu-ley pa qui-mente,
Y xtintz'ibaj riq'uin ri cánima.
Yin xquinoc qui-Dios,
Y rije' xque'oc nutinamit.* Gn. 17:7, 8; Jer. 24:7; Ez. 37:27; Zac. 8:8; He. 10:16.
11 Y man chic xtiquitijoj ta qui' chi quivinak qui',
Nis-ta chi quichak'-quinimal qui' quire' xtiqui'ij chiquivech: Rat nic'atzin chi navetemaj chi ri Ajaf, jari' ri Dios, man xquecha' ta.
Roma chupan ri k'ij ri' conojel xque'eteman chi yin Dios,
Chi ch'uti'k chi nima'k.
12 Roma yin can xtinpokonaj quivech y xtin-en perdonar ri man choj ta ri yequibanala',
Y ri quimac y ri itzel quibanalo'n, man jun bey chic xtinc'uxlaj.* Jer. 31:31-34; He. 10:17.
Quiri' nu'ij ri Dios.
13 Tok xuc'uxlaj jun c'ac'ac' ruvujil c'aslen,* Lc. 22:20; He. 7:22. nu'ij tzij chi xa tzia'k chic ri na'ey ruvujil c'aslen ri xu'on ri Dios, y roma tzia'k chic, y nitziakir benak, man chic xtilayoj ta.