Beebaa Dabu Psalm 130

130

Talodalo dangidangi i di hagamaamaa*

1 Meenei Dimaadua, au e gahigahi Goe mai i lodo ogu haingadaa.

2 Meenei dogu Dagi, hagalongo mai gi dagu dangidangi,

Goe hagalongo mai gi dagu gahigahi bolo Goe gi hagamaamaa ina mai au!

3 Maa Goe gu hagailongo madau huaidu,

malaa, ma koai dela e mee di lele gi daha mo dau hagi aga?

4 Gei Goe gu dumaalia mai gi gimaadou, bolo gi mmaadagu gimaadou i di Goe.

5 Au e talitali huoloo di hagamaamaa a Dimaadua.

Au e hagadagadagagee gi nia helekai a Maa.

6 Dogu talitali Dimaadua la koia e damana i di talitali o digau hagaloohi boo

ma ga talitali di maalama o di luada.

Uaa, koia e damana i di talitali o digau hagaloohi boo

ma ga talitali di maalama o di luada.

7 Goodou go digau Israel, goodou gi hagadagadagagee gi Dimaadua,

idimaa dono aloho le e waalooloo,

gei Mee e hiihai e haga dagaloaha gidaadou i nia madagoaa huogodoo.

8 Mee ga haga dagaloaha ana daangada Israel gi daha mo nadau huaidu huogodoo.*

*^ Taahili dela e daahili go digau ala e hula gi Jerusalem belee daumaha i golo