7
Anumaya Koti kahegi kemoa tototimogami kemona agasemaine.
1 Nagoa Falasia vayaene kahegi kema havilinaya anagaene Yelusalemuti Yisasite emainae. 2 Emaineya agayana nagoa Yisasiene tokaeya nemaiya anagamoya amayana sese ohuya kavela nenageya amakemainae. 3 Falasia vayaagela omainagi mukia Yuta veamoyaene amakinagomoya humainaya kava akave maleya amayama sesema ohayana kavela onenagi sese huteyage nenae. 4 Situatega ugeyama enuya tima ofalesayana onegahagi tina faleteyage amaugafamoa hilato hutegeya kavela nenae. Ani yamaagelomagi nayona vayamoya kahegi kea tokiyaage huya humainaya kehe haviya masuene yopaene susufanene mukia sese nehae. 5 Falasia vayaene kahegi kema havilinaya anagaene Yisasife mage huya me hae “Naa higeya kagaienema tokaeya nemaiya anagamoya taginagomogami kavala neataleya ani kea atagaeya kavema negahena amayana sese nohae?” huya havigae. 6 Hageno Yisasia kenonaamia mage hie “Tamakaya vagala vaya mainae. Aisaiyaa Anumaya Koti aune kanomoa tamakaifena tamage huno Anumaya Koti autamafina mage huno humaineane
‘Ani nofi veamoya amavayaleti huya nagai nagia alisaga nehayanagi amakuamoa alulega hanegeya ania kavala nehae. 7 Amakaya ma mopafi veamogami amavayafiti humainaya kahegi kehe mage humainayane ‘Mani kea Anumaya Koti ke hanegi akave maleho.’ huya humainayanagi nagai nagia alisaga hisaya kavala ohuya afa kava maiya nehae.’ huno kaemaleneane.
8 Anumaya Koti kahegi kea ataletama veamoya malenaya kea akave nemalae.
9 Huteno nagoene mage huno hie “Tamakaitami tamakinagomogami kavama akave nemalaya yafe Anumaya Koti kahegi kea ago atalenae. 10 Mosesea mage huno humaineane
‘Tamakaya itatami afotamimogami amakia alisaga nehutama keamia veganokanola ohutama amaiyaafinaga maiho. Nagoa veamoya itaafoamimogamima kamugema vaimatesayana faligahae.’ huno humaineane.
11-12 Humaineanagi tamakaya mage hutama hae ‘Nago kanomoa itaafoamogani anaya hisia monema hanesigenoa itaafoamoganina anayama ohinunoa mage huno hisie ‘Ani monea Anumaya Kotina amisua yane huna humainoe.’ huno hinunofena itaafoamoganina nagoene anayama ohisiana kanalele.’ hutama nehae. 13 Ani kema haya yafe tamakinagomogami kavala akave malenayafe Anumaya Koti kehena ‘Afa yane.’ hutama mukia ani kavala nehae.” huno humaine.
Veamogami amakuafima oniyaage nehamaiya yane.
14 Yisasia kasagoya veala agaite esaya yafe nagoene ke higeya ageno mage huno hie “Tamakaya mani kea havilama hutama haviho. 15-16 Nagoa nesaya yamoma tamavayafi visia yamoa tamakuafina oniya otamahaugahigi tamakuafitima hatilavisia yamo ali falote hisigeno tamakuamoa oniyaagela hugahie.” huno hie.
17 Huteno neamataleno nopinaga haino mainegeya agaiaenema tokaeya nemaiya anagamoya Yisasife mage huya hae “Kagaya mani avame kemona aepaa hugeta havimano.” huya havigae. 18 Havigageno Yisasia mage huno hie “Tamakaienena havilama ohutama nehao? Tamakaya ohavinao mukia yana tamavayafima nesaya yamoa oniya otamahaugahie. 19 Tamavayafi nayaamoa tamakuafina ouno afaa tamaipafike taviteno haenagaa aifayolagafina taviteno afa ya kana nehie.” huno hie. Mani kema hiana mukia kavela afaa nesaya kavekeya hane huno hie. 20 Huteno mage huno hie “Nagoa yama tamavayafitima hatilavisia kemoa tamakuamona alino oniyaage nelamahaiye. 21-22 Veamogati taguafitima efalote hia yamoa maa huno ali falote nehie kanale ohunea tagu tagesa nehavuna yaene ane munanene kumai he yaene musufaya hu yaene vaya hamaefali yaene alu kanomo ane amavayu hu yaene alu kanomo yafe age haye hu yaene kefo yaene havige huno savale savala hu yaene age lamahaye nehaya yaene veamogami taipa havita haviya huneamatona yaene veafe havige humate yaene taugafa alita hai yaene kema ohavi yaene taguafitila ali falote nehie. 23 Mukia ani kefo yama nehaya yana tamakuafiti efalote hia yamo tamakuafina oniyaagela humaine.” huno hie.
Fonisia kotega amoa Yisasina agua amitafa humaine.
24 Yisasia ani kumala neataleno Taiya kumamo kaiyaga umaineno agaiama anilema emainea yafena veamoya ohavisae huno nago nopi haino maiyanagi afaa agaia falaokigahie. Veamoya ago haviye. 25 Aupaa nago amoa Yisasi avagea haviteno eno aiyafi aleya meyemaine. Ani amo munamona agupi Kefo Avamula mainea alagino. 26 Isaleli vea omainea alagino Kaliki ke nehuno Fonisia nofi ale. Silia kotega alagino munaamona agupi mainea Kefo Avamu anatitalesie huno aukaya huno havige. 27 Yisasia mage huno hie “Nafanemoya hagoteya kavela negahae. Havigu nafanemogami kavela hamanafaleta kalayagamogami amamisunana haviya hugahie.” huno hie.
28 Higeno ani amoa mage huno hie “Anumayamogae tamage hananagi nafanemoya nenageno osi atupaa sipaleti asaga hulavia yana kalamoya yogiya nenae. Kagaya ani kava huka nagaya Isaleli a omainoanagi osia nahamao.” huno hie.
29 Higeno Yisasia ani afena mage huno hapaiye “Kekaa ago hanagena havuafe nokalega vuo. Kefo Avamumoa munakamona ago ataleno vie.” huno humaine. 30 Higeno nomaalega viaamo mogeana Kefo Avamumoa ago ataleno vigeno munaamoa kanale huno sipale faemainegeno itaamoa mogemaine.
Yisasia nago aifo kanomo agesaene avayaene alino kanale hutene.
31 Yisasia Taiya kumala ataleno aiyahae huno Saitoni kumala agaseno viaamo tenia (10) kuma hanelega mogaseno Kalili ti agegayalega uvayi humaine. 32 Uvayi higeya veamoya nagola yuna aifo kanoa Yisasitega avaleya vayana ani aifo kanomoa hagifali ke nehatagegeya Yisasife mage huya hae “Augafale kayateti avate hisane.” huya havigae. 33 Yisasia ani kanoa neavaleno veala amataleno faitega anakaianige umaineana aya avoyaleti aifo kanomona agesafi vaiteno avetuna heno ayateti avefunale avatemalene. 34 Malegeno anafinaga agesaga huno “Vaeha ausonio.” huteno agaifena agaia kefiti mage huno hie “Efata.” huno hie. Tagai kefina “Kagesa akalo hino.” huno hapaiye. 35 Higeno agesamoa akalo higeno avefunamoa kanale higeno aikalo huno kea kea hie. 36 Yisasia mage huno hie “Nagoa veala mani yafena hamaopaiho.” huno kahegi mateanagi ani kea huya atile male huya mukia veamogami amakesale mohu mehu humainae. 37 Hageya haviya veamoya tusia amamayo aigeya mage hae “Mukia yana aligeno kanale kanale nehie. Yuna aifo vayala aya malegeya kea nehaviye. Aifo vayala keamia ali falote huneamamie.” huya nehae.