1 Yisasia mage huno hie “Nagaya tamage huna vaini alagamo nofi maugeno Nenafaa ani vaini alagamo nofi hoyalela yagai-maine. 2 Agaya mukia nagai vaini nofi akopamoa alagama oayea akopayaga atagi neataleno alagama ayea akopayaga ‘Nagoene alaga ayesie.’ huno aia alino hagalo nehie. 3 Tamaha-pai-mainoa kemoa tamakaila ago alino hagalo higeno oniyatamia omalenegi kanale tamahau-maine. 4 Tamakaya nagaienema ai-gamaesayana nagaya tamakaienena ai-gamaena maigahue. Nago vaini alagamo nofimo akopamoma nofitema ai-okamaesiana alaga oayegahie. Naa hu-maineafe tamakaya nagaila navaalema ai-okamaesayana tamakaya alaga oayegahae.

5 Nagaya vaini alagamo nofi maugetama tamakaya ani vaini alaga nofimo akopaa mainae. Tamakaya nagaienema ai okamaesayana nagoa kanale kavala ohugahae. Kanale kavama hinutamahena nagaiene ai-kamaetama maiho. Nagoa veamoyama nagaienema ai-gamaeya maisagena nagayama amakaienema ai-kamaena maisuana kasagoya nofi alagamo kavea ayegahae. 6 Nagoa veamoya nagaienema ai-okamaesayana oayea vaini nofimo akopama atagiya hagayu hu-talagenoma hagage nehia kava nehae. Ani akopayaga alitalu huya atafi kae-talenae. 7 Tamakaya nagaienema aigamaetama maisayana nagai kemoa tamakupina hanesigetama nagoa yafema naha-vi-gesayana naha-vi-gesaya yana hu-lama-tegahue. 8 Tamakayama kasagoya nofi alagamo kavema aye-gasagoma hisaya yateti Nenafaa ala agia aligahie. Alinagetama-nagitama tamakaya nagaienema tokaeya nemaiya anaga maigahae. 9 Nenafaa nagaifena hau ayamopafi hau-mainea kava huna tamakaifena ania huna nahau nayamopafi nenahaiye. Nahau nayamopafima nenahaiya yamo aguafinaga faletama maiho. 10 Nagaya Nenafama hu-mainea kahegi kema havinama akave maloa yafe Nenafaa nagaifena hau ayamopafina nehaiye. Tamakaya ania hutama hu-mainoa kahegi kea havitama akave malesayana tamakaifema nahau nayamopafi nenahaiya yamo aguafinaga faletama maigahae.

11 Nagai naguafima muse yama hanea yana tamakai tamakupi male hava-telama-tesua yafe mani kea tamaha-pai-mainoane. 12 Nahau-mainea kavala mage huna nehue ‘Nagaya tamakaifema nahau nayamopafima nahaiya kava hutama nelama-fugamifena tamahau tamayamopafi tamahainageno ania huya amakaya tamakaifena hamau amayamopafina hamaino.’ huna tamaumonola nemaloe. 13 Nago kanomoma nefufema ‘Kagai kaugafama ali-gatisua yafene huna nagaya faligahue.’ hunoma hisiana mukia veamogami hamau amayamopafima nehamaiya kavala amakasegahie. 14 Nagayama nehua kema akave malenutamahena nagaini nenafugatama maigahae. 15 Nagaya tamakaifena ‘Aliya vayanimogatama mainae.’ huna nagoene ohugahue. Nago aliya kanomoa kava kanoamoma aliyama alia aepaa oagenegi nagaya mukia yama Nenafama naha-pai-mainea kea ago tamaha-pai-mainoa yafe ‘Aliya vayanimogatama mainae.’ huna ohugahugi agoma tamaha-nepauva yafe ‘Tamakaya nagai kanapa mainae.’ huna nehue. 16 Tamakaya nagaila nagetama hu-yookinagi nagaya hagotena tamakaila tamakena hu-yogitena tamakaitami utama Anumaya Koti haisia kava hisaya yafe hu-yogilama-tenoe. Aniama hisaya yapiti alagaa falote huteya agola mainesagetama nagai nagilema Nenafatega havigesayana mukia havigesaya yana tamamigahie. 17 Kahegi kea mage huna tamaumonola nemaloe nelama-fugamifena tamahau tamayamopafi tamahainageya ania huya tamakaifena hamau amayamopafi hamaino.”

18 “Ma mopale yafema amaugafama aliya nehaiya veamoya tamakaila kamema hu-lama-tesagetamahena tamakesa hao hinagetama haviho. Hagoteya nagaila ania huya kamea hu-na-tenayane. 19 Tamakaya ma mopale veamoya nehaya kavama hutama mainaleasipa mani mopale veanemoya hamau amayamopafi tamakaifena hamaileasinagi nagaya ma mopafi vayapiti tamakena hu-yogi-malenoafe tamakaya mani mopale vea kana veane omainae. Na yafe ma mopale yafema amaugafama aliya nehaiya veanemoya amakesa nehaviya kamea hu-nelama-tae. 20 Nagaya mage huna ago tamaha-pai-mainoe ‘Aliya kanoamoa kava kanoamona oagasene.’ huna hu-mainoane. Ani kehe tamakesa havitama maiho. Nagoa veamoya nagaima, tamakai kava kanotamimonima, aliya haviyama hu-na-taya kava huya ania huya tamakaila aliya haviya hu-lama-tegahayanagi nagoa veamoya nagai kema haviya akave nemalesaya veamoya tamakai kea ania huya haviya akave malegahae. 21 Hu-na-tenea kanomona havilama huya ohavinaya yafe ani kavala hu-lama-tegahae. Tamakaya nagai veanema mainaya yafenagiya ani kavala hu-lama-tegahae. 22 Nagaya enama kema hama-opauleasina ‘Kefo katia hane.’ huya ohaleasine. Afaa ago me hama-pauvanagi kefo yama hu-mainaya yafena kalagi aiteya agasesaya katamia omalene. 23 Nagaima kamema hu-na-tesaya veanemoya Nenafaene kamea hu-neatae. 24 Nagaya amakaipima mainenama nagoa veamoyama tokiya kavama ohuleasina ‘Kefo yatia hane.’ huya ohaleasinagi ago alugeya ageteya nagaiene Nenafaenena kamea hu-nelaa-tae. 25 Amakai kahegi kema kae-malenaya kemoa nagaifena mage hu-mainayane ‘Havi kavala ohunegeya kamea afaa hu-nea-tae.’ huya kae-malenayane. Mani kemoa ago falote huno tamage hisia yafe nagaila kamea hu-nena-tae. 26 Nenafategati tamaya hisia vekaa hu-tesugenoma esiana tamageage ke huno tamaha-paisia vekaa, Alu Aotage Avamula Nenafategatima esiana nagaifena tamaha-paigahie. 27 Tamaha-paigahianagitama nagaya aliyama aepa hena ali-mainoa kanaleti tamakayama nagaienema mainaya yafe nagaifena veamogamina hama-paigahae.”