1 Fipia tusia kanaleya huno Yisasina agua aminea tasatimoe, Senikalia maineya Yisasina amakua aminaya veamogamina kanaleya huno amaya humaine. 2 Anumayatimoene ailokaetama mainayafe Fipina avaletama amunotamifi atesageno maisie. Anumaya Koti nafanemogatama naa hisunana kanale yane. Nagi nagoa yamoma kanama haisigetama kanaleya hutama aya hiho. Fipia ania huno hagotenoa nagayaene kasagoya veanene taya humaineane.

3 Yisasi Kalaisi aliyama nahamaeana nealia alavelafena Palisilagani Akuvilaganina hutama falu fala hunateho. 4 “Kagaima kahaesagetaa faligahune.” huana humainaafe nagayake musena hunoanatogi mukia Yuta vaya omainaya Yisasi anagamoyaene huya musena huneanatae.

5 Anakai nopima Yisasi kema havigahe melitaluma nehaya veanene nagaila hu falu fala kenia humateho. Epainetasina, Esia kotega mainaya veamogamina hagoteno amakaseno Kalaisi kea havino agupi malenea kanoa maineanagino nahau nayamopafi nenagea nenafuna nagaila hu falu fala kenia huteho. 6 Ania hutama Maliaa, tamakaienema mainenoa tamaya hugahena tusi aliya ali-mainea alagi hutama falu fala huteho. 7 Atalonikusigani Yuniasiganina ania hutama nagaila hu falu fala kenia hunateho. Nagaya Yisasi kema ohavinoa kanafina ani kanolatana Yisasife haviana anakupi maleteana Aposolo vayamogami amunoamifi anaki hanea kanolata maineana nagaiene Yuta nofi vaya mainonanagita nagaiene Yisasi kema humainona yateti nofila hulatenayane.

8 Ampiliatusina Anumayamoene ailokaeyaagena nagua aminoa nenafuagi nagaila hu falu fala kenia huteho. 9 Tamakaya Upanusia Anumayamo aliyana tokaetaa nealua kanoene Setakisina kanaleya huna nagua aminoa nenafuene nagaila hutama falu fala kenia huneanatetama hiho. 10 Apelesia Kalaisina akavema nemaliafe agia hanegi nagaila hu falu fala kenia huteho. Alisitopulusi afamomogamina nagaila hu falu fala kenia humateho. 11 Helotionia nagai nofi vayalagi nagaila hu falu fala kenia huteho. Anumayamoene ailokaeya mainaya tafu-taganagamina Nasisusi afamomogamina nagaila hu falu fala kenia humateho.

12 Talifinagani Talifosagania Anumayatimo aliya tusiya huana nealia kanolatanagi nagaila hu falu fala kenia hunateho. Pesisia nahau nayamopafi nenagea alagi Anumayatimo aliyana ali-maineafe nagaila hu falu fala kenia huteho. 13 Lufusia kanaleya huno Yisasina akave nemalea kanoene itaamoenena nagaila hu falu fala kenia hunateho. Lufusina itaamoa itanimo kana huno nahanemaeyane. 14 Asinakalitusima Falegonima Hemisima Patolopasima Hemasima amakaienema tokaeya mainaya nafunaganagamina nagaila hu falu fala kenia humateho. 15 Filologusiene Yuliaene Neleusiene asaamoa Olipasiene amakaiene mainaya Yisasi anagaene nagaila hu falu fala kenia humateho.

16 Anumaya Koti anagamogatama nehuna kava hutama tamahaote tamahaote mukia tafu-taganagamina tamayana amamitama ali falu fala humateho. Mukia kumate maineya Yisasi anagamoya “Mainafio?” huya hu falu fala hulamatae.

17 Mukia nafunaganagatama tamakesa alisua kea haviho. Nagoa vayamoya emaineya tamahapai-mainoa kemona amakaveno huteya neatagaeya tamakaya mono kema havigahe alitaluma nehaya yapi melifako hisaya kema nehaya vayamogamifena kayetama mainetama ani kema nehaya vayamogamina tamakaveno humateho. 18 Ani vayamoya Anumaya Kalaisi aliyafena amakesa ohaviya amakaiami age hamaye hisaya yafekeya akave malesaya amakesa nehae. Hagalama-haisifa ke huya masave amake neaiya amaipafi ayegesageya kanale amakesama nohaviya veanea ayemavataga huya alihaviya humategahae. 19 Tamakaya Yisasima hulatenea yafena havitama tamakupi maletama atafa hulinaya kea mukia veamoya ago havimainaya yafena havitena tusia muse nehue. Kanale auava yamo aepaa havilama hutama nagoa kefo yamofe tamakesa ohavisae hunahe nehue. 20 Anumaya Kotia, taipa falu hisia yamona aepaagino, aupa kanafi Satanina taiyafinaga ayeno tatapegahie. Yisasia Anumayatimona kayone yamaamoa tamakayaene hanesie huna nehue.

21 Nagaiene aliya nealia kanoa, Timotia, huno falu fala hulamate. Ania huya Lusiusima Yesonima Sosipatama nagaini Isaleli nofi nafunagaya “Mainafio?” huya hu falu fala hulamatae.

22 Nagaya Tetiusina Polo avayafiti ke alina mani avona kaena Anumayamo agile “Felugae.” huna hu falu fala hunelamatoe.

23-24 Kaiyusia “Felugae.” huno hu falu fala hunelamate. Nomaafina kanaleya huno yagainategena mainogeya Yisasi anagamoya Anumayamo kema havisaya yafena agai nopina melitalu humainae. Elasatusia ani kumaalate Kamanimo kusi kusi kanoene Kavotusia tafu-taganaene “Felugae.” huana hu falu fala hunelamatae.

25-26 Anumaya Koti agia tusiya huta alisaga higetao. Yisasima hulatenea kanale mono kema hu-halena nelamamua keleti Anumaya Kotia hetitama tokiya vaitama maisaya tokiya tamamigahie. Mani kea hagoteno ayaaya kanagefa falakino haneanagino menia Anumaya Kotia ago alino falote humalene. Anumaya Kotia maige maige nehia kanomoa mage huno humaine “Mani kea hufalote hiho.” huno humainea ke amaune vayamoya kae-malenaya kefiti “Mukia alu nofi veamogamina hamapaisageya haviteya amakupi maleya amametiti huya nagaila nahaisia kava hisae.” huno humaineane.

27 Anumaya Kotia nagokemo mukia kanale havi haviyaami hanea veala amakase-mainea kano maineafe Yisasi Kalaisia hulateneafene huta agola mukia kanafina agia alisaga hisune. Tamage.