1-2 Yelusalemua aupate hanegeya tole osi kumatalana Petafasiene Petaniene hanea kumate umainae. Ani kumatalana Olivi yosa hanea agoyamo agegayalega hane. Anile maineya Yisasia tole agaiaenema tokaeana nemaia kanolatana hunateno mage huno hanapaiye “Atu kumate utetana atupa note hosi kana afumo agia tokimo nafanea ayetenayanagitana agegae. Ani tokimo nafanea vayala oamavalenea tokie. Kalu hetana avaletana male eo. 3 Neeageya nagoa vayamoya ‘Naa higetana naa kavala nehae?’ huya hisagetanahena mage hutana hio ‘Kava kanotimoa nago aliya aligahe higetaa neoanagino aliyamaa aliteno aupaa eteno tamamigahie.’ hutana hamapaio.” huno hie. 4 Higeana ani kanolatana uana ani tokimo nafanea no fiate ayetageno ka agegayale hetino mainegeana mogefalote huteana nofila alikalu hemainae. 5 Nehaageya nagoa anile hetimainaya vayamoya mage huya hae “Naa higetana tokimo nafanea kalu nehae?” huya hae. 6 Hageana Yisasima “Nage hutana hio.” hunoma hia kea hamapaiageya ani vayamoya “Afaa tokia avaletana vio.” huya hae. 7 Hageana ani tokimo nafanea Yisasite avaleana evayi huteana kenaania anaugafaleti hateana ani afumo agupile yakaimalaageno Yisasia anile haino maine. 8 Maigeya mukia veapiti nagoamoya amaugafaleti kenaamia hateya via katela yakaigeya nagoamoya haisa hanete hanete yosayaga kofanafa huya katela yakaimalageno Yisasia ani kate afumo agupifina maiteno umaine. 9 Hagoteya vaya veamoyaene haenagama vaya veamoyaene ala kenake kefiti mage huya hae “Alamogae taugafa aligatisana kanoa kanaleya huka neane. Anumayamo aliya alisana yafe hugategeka emainana kanomoga Anumaya Kotia kanale manu kamino kaya humaine. 10 Taginagomoa Tevitie nayona kava hunoma yagaimainea avamete kavala eteno ania huno falote hugahie. Ani yafena muse higetao. Anafinaga Anumaya Kotia taugafa aligatisia kanohe muse hisune.” huya humainae.

11 Yisasia Yelusalemu uvayi huteno ala mono nopi umaineno mukia mono nopima hanea yana ako huno ageliteno huno ageteno neataleno hani kisia avamete higeno ataleno tuelufua (12) anagaaene Petaniga vae.

12 Faeteya kotigeya Petania ataleya nevageno Yisasina agatemaine. 13 Agategeno nagola haisa afaa hanea fiki yosamoa aluale hanegeno ageteno alagaahe mogegahe ani yosamo aepale uno mogeana alagaa omalegeno haisayagaage hane. Ani fiki yosamoa alagaama neayea kanamoa yaufa falote ohune. 14 Mogeteno Yisasia ani yosahena mage huno hie “Namo yosa hetika maiyo. Agola kagai kaugafa veamoya nagoene onegahae.” huno huhaviya hutegeya agaiaenema tokaeya nemaiya anagamoya ani kea havimainae.

15 Yelusalemu evayi huteya Yisasia ala mono nopi haino mone aliya nealiya veanene afaa miyama nehaya veanene “Maihaleho.” huno amanatineataleteno nagoa veamoya alu kotegama nehanea monea nealiya ani kotegama nehanea monea neamamiya veamogami folomoa alitalegeno aige helafige higeno kugofa kana namama miya nehaya veamogami sipaamia ania huno alitalegeno aihelafilavimaine. 16 Afenoma aliliteya nehaya veafena mage hie “Ala mono no kumapina afenona alitama ute ete ohiho.” huno hie. 17 Huteno mage huno hamapaiye “Anumaya Kotima humainea kemoa autamafina mage huno kaemaleneane

18 Higeya mono note kava vayamoyaene kahegi kema havilinaya anagamoyaene Yisasima hia ke haviteya muki veamoya Yisasima hamapaiya kema haviteya amamayoma aiya yafe koli huteya “Hanaa huta haesune.” huya humainae. 19 Hayanagi Yisasia anagaamoyaene hani kigeya Yelusalemua ataleya umainae.

20 Yisasia faeteno natena agaiaenema tokaeya nemaiya anagaaene kate vayana anima alaga oayenea fiki yosa mogayana hafuyayagafiti amagino haisamoa amagiteno fayo temaine. 21 Yisasia ani yosahema humainea kehena Pita agesamoa hao higeno haviteno Yisasife mage huno hie “Humavenelina kanomogae ago fiki yosama huhaviya hutana yosamoa ago fayotemaine.” huno hie. 22-23 Higeno Yisasia mage huno hamapaiye “Anumaya Kotifena mage hutama hiho ‘Kagaya mukia yana hateasine.’ hutama tamakupi maletama tamametiti hisayana tamage huna tamahanepauve Anumaya Kotifena tole lamakesa ohavitama ‘Havigesua yana falote hugahie.’ hutamama hisagenofena ani yamoa falote hugahie. Ani kavama hisia kanomoa ma agoyahena ‘Ma agoyamoga kofa hulavika ala tikotumo amunopi ufaemaiyo.’ huno hapaisigenofena akave maleno ania hugahie. 24 Ani yafe mage huna tamahanepauve mukia yafena Anumaya Kotitega havigesayana ‘Anumaya Kotia kanaleya huno lamigahie.’ hutama tamakesa havisagenofena afaa tamamigahie.

25-26 Tamakaya hetitama Anumaya Kotitegama ke hutama havigegahena hagotetama kefo yama hulamatenesaya veafena aigeamatetama kefo yaamia atalematesagenofena ikapinaga mainea Nelamafaa kefo yatamia aigetamateno atalelamategahie.

27 Yelusalemu alehate evayi hayana Yisasia ala mono no kumapi ute ete nehigeya mono note kava vayamoyaene Yuta vayatamaene kahegi kema havilinaya anagaene agaitega evayi hae. 28 Evayi huteya mage huya hae “Hana augafa ala kanomo hugategeka mani kavala me nehane? Himamu yakaa ta kamine?” huya havigae.

29 Hageno Yisasia kenonaamia mage huno hie “Nagaya hagotena nago yafena tamahavigesugetama nahapaisagena nagaya ani yama talo nehua himamunima hanea navagea tamahapaigahue. 30 Yonia tima fale neamatea yana Anumaya Koti hutegeno ani kavala me nehifi afa vayamoya hutageno lina faleneamate? Tamakaya hufalote hutama nahapaiho.” huno hamavige. 31 Higeya “Naa maa hugahune.” huya mohu mehu huteya mage hae “Anumaya Koti hutegeno emaine.” huta hisunagenoa Yisasia “Naa higetama agai kea havitama tamakupina nomalae?” huno hugahie. 32 Hugahianagita mukia veamoya Yonifena “Anumaya Koti aune kano maine.” huya tokiyaage kema nehaya yafe tagaya “Afa vayamoya hutageno emaine.” huta hisunagenofena kelamakigahie huta koli nehune.” huya hae. 33 Kolia nehuya Yisasifena mage huya hae “Tagaya ohavinonanagita hufalote huta kahaopaigahune.” huya hageno Yisasia mage huno hie “Nahaopaisayana nagayaenena ania huna hufalote huna ani yama taloma nehua himamunima hanea navagea tamahaopaigahue.” huno humaine.