1 Yisasia ani kola neataleno Yutia kotega viaamo Yotani timoa ame kaiyaga uvayi huno mainegeya mukia veala agaite melitalu hageno nehia kava huno nagoene hamapaiye.

2 Hamanepaigeya nagoa Falasia vayamoya Yisasite eya ase ohisea kema hisiafene huya nagola ayevataga hisaya kea mage huya havigae “Nago kanomoa aama atalesia agesa hisigenoa kahegi kemoa ‘Afaa atalegahie.’ huno humaineo?” huya havigae. 3 Hageno Yisasia kenonaamia mage huno hamavige “Mosese kahegi kemoa ani yafena naane humaine?” huno hamavige. 4 Higeya mage huya hae “Mosesea nagola kahegi kefina mage huno tahapaimaine ‘Vemoa aamona avo kaeno neamino hutesigeno hano huno ugahie.’ huno humaineane.” huya hae. 5 Hayanagi Yisasia mage huno hamapaiye “Tamakaya ke ohavitama veganokano haya yafe Mosesea ama atalesaya kea kaemaleneane. 6-8 Kaemaleneanagi Anumaya Koti avopina mage huno humaineane

10 Mani kea huteno nopinaga haino maineno agaiaenema tokaeya nemaiya anagamoya ani kehena havinegae. 11 Havigageno mage huno hie “Nago kanomoa aama ataleno alu ama aliana ani kanomoa kumai kava huno hagote aamona ali haviya huneate. 12 Nagi nago amoma anauamoma ataleno alu velema viana ani amoa kumai kava nehie.” huno hie.

13 Veamoya nafaneamia avaleya Yisasite “Aya malese.” huya neageya agaiaenema tokaeya nemaiya anagamoya “Naa ohiho.” huya kemamakimainae. 14 Yisasia kema amamakiya yana ageteno haivaimateno mage huno hie “Nafaneyaga amatalegeya nagaitega eho. Ka heakioamateho. Nafane avamete maiya veamoya mage nehae ‘Tagaitige maunana tokiyatia omalegi Anumaya Koti kava yagailatesie.” huya hae. 15 Tamagelafa huna tamahanepauve nafane avamete maisaya veamoya ‘Tagaitige maunana tokiyatia omaleafe Anumaya Kotia kava yagailatesie.’ huya ohisayana Anumaya Kotia kava yagaimainea kumatela ougahae.” huno hie. 16 Huteno Yisasia ani nafaneyaga amavaleno amanukilineno “Anumaya Kotia kanale manua tamamisie.” huno amaugafale ayana malene.

17 Yisasia katega ugahe nehigeno nago kanomoa aiyayeno eaamo aule aleya meyeno mage huno havige “Kagaya kanale ya huka humavenelina kanomogae hanaa hutena agola maige maige hisua nahaimula alisue?” huno hie. 18 Higeno Yisasia mage huno hie “Naa higeka nagaifena ‘Kanale kano mainane.’ huka nehane? Anumaya Kotia agaiage kanale kanoa maine. 19 Kagaya Anumaya Koti kahegi kea havilinane ani kemoa mage huno humaine ‘Vayala haegeno ofalino. Kumai he yana ohuo. Musufa yana ohuo. ‘Ma kanomoa havi kava nehie.’ huka havigehena kena ovalo. Havigea ayevataga huka alu veamo yana oalio. Itakafokamo kea ‘Kahaoteyakaae.’ ohuo.” huno hie. 20 Higeno ani kanomoa mage huno hie “Hulavenelina kanomogae nagaya nafanema mainoa kanaleti aepa hena mukia ani kema hana kea akave nemaloane.” huno hie. 21 Higeno Yisasia ani kanoa ageana agaifena hau ayamopafima haiya yafena ageteno mage huno hie “Nagoa yafena kosa heokatene. Nago kavaene huo. Mukia malenana mone afenoyakaa alika fako huka moneamima omalenesia veanema amamisanagenoa Anumaya Kotia ikapinaga afenoyana kamigahie. Afenoyakaa fako huka amamite amamite huteka nakave eno.” huno hie. 22 Higeno ani kanomoa ani kea havianagi mone afenomaama kasago humainea yafe oatalesia agesa haviteno augosamoa atili kaegeno aipamoa tusi kanaage higeno ataleno umaine. 23 Vigeno Yisasia agaiaenema tokaeya nemaiya anagala moge mege huno neamakeno mage huno hie “Mukia mone afenoyaamima hanesia veamoya kasageke humaiya humaiya Anumaya Kotife ‘Kava yagailato.’ huya hugahae.” huno hie. 24 Higeya agaiaenema tokaeya nemaiya anagamoya ani kehena amamayoa aiyanagi Yisasia nagoene mage huno hie “Nafanenimogatama veamoya kasageke humaiya humaiya Anumaya Kotifena ‘Kava yagailato.’ huya hugahae. 25 Nagola pulumaka kana afumo agia kemolumoa nekayamo kapima haifalesiana afaa yoyo huno haifalegahianagi mukia mone afenoyamaa hanesia kanomoa Anumaya Kotifena ‘Kava yagainato.’ huno kasageke huno haifalegahie.” huno humaine. 26 Haviya anagamoya tusia amamayo aigeya mage huya hae “Naama humainesiana hana veamogami amaku amame Anumaya Kotia aligatigahie?” huya hae. 27 Hageno Yisasia amakeke huno amakemaineno mage huno hie “Veamogamina tokiyaamia omaleneanagiya ohugahayanagi Anumaya Kotia mukia kava hisia tokiyaa haneanagino afaa aligatigahie.” huno hie.

28 Higeno Pitaa mage huno hie “Havio tagaya mukia yatia ataleteta kagai kakavela neone.” huno hie. 29-30 Higeno Yisasia mage huno hapaiye “Tamage huna tamahanepauve mukia veamoya nagaifema huya nagai kanale mono kema veamogamima mo hamapaigahena noamiene nepuamiene amasaamiene itaamiene neamafaene nafane-amiene mopaamiene amataleya visagenoa Anumaya Kotia mopale mainaya kanafima atalenesaya noamiene nepuamiene amasaamiene itaamiene nafaneamiene mopaamiene nagoene nagoene ohavunamaa ya aliteya huhaviyama humatesaya yaene aliteyagi haenagaa maige maige hisaya hamaimula amamigahie. 31 Meni kanafima hagoteya mainaya veala ani kanafina haenagalafa maigahayanagi meni kanafima haenagalafa mainaya veala ani kanafina hagoteya maigahae.” huno humaine.

32 Yelusalemu haigahena katega neuya Yisasia hagoteno vigeya agaiaenema tokaeya nemaiya anagamoya amamayo aiya nevageya amakave vaya veamoya koli nehageno Yisasia eteno nagoene tuelufua (12) anagaamogamina amahaote amavaleno momateneno haenagama agaila hutesaya yafena hamanepaiye. 33 Mage huno hie “Haviho tagaya Yelusalemu haisunageya ikapinagati emainoa kanoa vayamo natenea kanomonia natafa huteno mono note kava vayamogami amayapiene kahegi kema havilinaya anagamogami amayapiene natesigeya nagaifena ‘Afaa falisie.’ huya Yuta vea omainaya vayamogami amayapi navaleya nategahae. 34 Natesageya nagaye hisifa ke hunateya amavetuna henenateya hegi kayoteti haifu namiteya nahaesagena yafaga yosale faligahue. Falisugeya hevainatetesagena tole yupa komufinaga maitena tagufa (3) kanale falimainesufitila hetigahue.” huno hie.

35 Sepeti nafanelatana Yemesiene Yoniene Yisasite eana mage huana havigae “Hulavenelina kanomogae nago yafe kahavigesuageka ani yana hulaato.” huana havigae. 36 Haageno Yisasia mage huno hanavige “Naa hulanatesue?” huno hie. 37 Higeana mage huana hae “Tokiya hale yakaafima umaisanagetaa taagaya kavate mainesuageka ‘Nagomoga tamaga nayatega maiyo.’ huteka ‘Nagomoga hauga nayatega maiyo.’ huka hulaato.” huana havigemainae.

38 Havigaanagi Yisasia mage huno hanapaiye “Nahavigaa yafena ohavinae. Falisua yana satuage humainea ti kana humainea ti hanea keayopitila negahugi tanakaya naaleasino onaaleasine? Nagaila falenatesaya yamoa, nagatama aisia yatetila tanakaila ani yateti falelanatesagetanahena afaa aligao?” huno hie.

39 Higeana “E, tokiyatia haneanagitaa ania hugahue.” huana haageno Yisasia mage huno hie “Tamage satuage humainea tina negaanagi falenatesaya yamoa nagatama aisia yateti falelanategahae. 40 Falelanategahayanagi ala vayama mainalega tamaga nayategaene hauga nayategaenena siale maisaya yana nagai yana omalegi Anumaya Kotia agaia ani yana ago nagoa vayafe huno talo tala huno ali fatago humatene.” huno hie.

41 Higeya tenia (10) anagamoya ani kea haviteya Yemesigani Yoniganina amaipa haviya haviya hunatenae. 42 Yisasia “Nagaitega eho.” huno higeya ageno mage huno hie “Ma mopafi ala kava vayamoya ‘Tusia ala vaya mainone.’ huya Yuta vea omainaya veafe ke amamakiya aliya ke humateya kava vayamo nehaya avamete kava nehae. 43 Naa nehayanagi tamakaya ania kavala ohiho. Tamakaipima ‘Nagi hanea kanoma maigahue.’ huno hisia kanomoa aliya kanotami maino. 44 ‘Uhagotena maigahue.’ huno hisia kanomoa miya oali aliya kanotami maino. 45 Nagaya ikapinagati emainoa kanoa vayamo natenea kanomona veamoya naya huya ali kanale hunatesaya yafene huna omenogi nagaya amaya huna aliya kanoami maisuafene huna emainena mukia veamoya kefo yama nehaya yamo aigagimatenea yapiti alikalu hematesuafe miya atalesue huna faligahe emainoe.”

46 Yisasia agaiaenema tokaeya nemaiya anagaene kasagoya veanene Yeliko kumate uvayi huteya ani kumala mogaseya ugahe nehageno nagola aulaga asu humainea kanomo agia Patimeusia Timeusi nafanegino ka agegayale mopale maineno monehe aukaya huge huge huno maine. 47 “Nasaleti Yisasia ago nee” huya haya kea haviteno ke huno mage huno hie “Yisasigae, Tevitina aginagomogae nagaila kahau hunato.” huno hie. 48 Higeya kasagoya veamoya kemakiya “Ke ohuka maiyo.” huya hayanagi nagoene ke huno “Tevitina aginagomogae nagaila kahau hunato.” huno hie. 49 Higeno Yisasia anile mo hetimaineno mage huno hie “Hapaigeno eno.” huno higeya ani kanohe ke huya mage huya hae “Kagua ali lokiya vaika aupaa hetio. Kagaife ke nehie.” huya hae. 50 Hageno ayaaya yasi kenaa asagi neataleteno aupaa hetino Yisasite vie. 51 Vigeno Yisasia mage huno hie “Naa hugatesue?” huno higeno aulagama asu humai kanomoa mage huno hie “Humavenelina kanomogae naulaga agesue huna nehue.” huno hie. 52 Higeno Yisasia mage huno hapaiye “Afaa vuo nagaifema havika kagupi maleka kametitima hana yateti ago alina kanale hugatoe.” huno higeno aupaa aulagamoa kanale higeno Yisasi akave umaine.