1 Yisasia mage huno hamapaiye “Tamage huna tamahanepauve malema hetiya mainaya veala nagoamogatama ofalinesageno hagoteno Anumaya Koti kava yagaisia yamoa himamu yamaaene efalote hinagetama agetetama haenaga faligahae.” huno hamapaiye.

2 Yisasia sikisia (6) kana maiteno Pitana Yemesina Yonigamina amavaleno ayaaya agoyafi haiya amakaiamige maineya agayana Yisasi augafamoa alino alu augafa kalimaine. 3 Kenaamoa mopafima mainaya veamoya sese nehageno efeage nehia avamete ohunegi tusiya huno efeage huno alave alave humaine. 4 Tole kanolatana Moseseene Ilaiyaene evayi huana Yisasiene kaiyeke nehaageya agemainae. 5 Pitaa Yisasife mage huno hie “Hulavenelina kanomogae tagaya male maunana kanale nehie. Tagaya katega nona tagufa (3) kilamatesune kagaila nagolagi Mosesena nagolagi Ilaiyana nagolagi huta kilamatesune.” huno hie. 6 Tusiya huya kolima haya yafe Pitaa ‘Naane ke hisue?’ huno agesa havigeno mani kea humaine. 7 Ani kea hanepaigeno agola siamoa evayi huno melino aiso humategeno ani siapinagati age aino mage huno hie “Mani nafanea nagai nafanegi naguafifena nenahaiya nafanegi agai kea haviho.” huno siapinagati humaine. 8 Higeya aupaa moge mege huya agayana nagoa vayala omaigeno Yisasia agaiage mainegeya agemainae.

9 Ageteya agoyafitila enelaviya Yisasia kahegi maleno mage huno hamapaiye “Manima agaya yafena nagoa veanea hamaopaiho. Haenagama nagaya ikapinagati emainoa kanoa vayamo natenea kanomona falimainesufiti hetisua yupa hamapaigahae.” huno hie. 10 Higeya ani kemo akave maleya hamaopainagi “Falimainesufitila etena hetigahue.” huno hia kemo aepaahe atiyeya amakaiami huge havige hae. 11 Mage huya Yisasina havigae “Naa higeya kahegi kema havilinaya anagamoya Ilaiyaa hagoteno etesigeno Anumaya Kotia hutesigeno taugafa aligatisia kanoa egahie huya humainae?” huya havigae. 12 Hageno Yisasia mage huno hie “Tamage Ilaiyaa hagoteno eno mukia yana melino talo tala hugahie. Ania huya nagaifena Anumaya Koti autamafina kaemalenayane “Ikapinagati emainoa kanoa vayamo natenea kanomonina amakaveno hunateya ali haviya hunatesageno naugafa nagata aigahie.” huya nagaifena humainayane. 13 Tamahanepauve Ilaiyaa ago egeya Anumaya Koti autamafina kaemalenaya avamete huya amakaiamia hamaiya avamete agaila havi kavala hutenae.” huno humaine.

14 Nagoa agaiaenema tokaeya nemaiya anagatega evayi huya agayana kasagoya veala anile alitalu humainageya kahegi kema havilinaya anagamoya Yisasienema tokaeya nemaiya anagaene mo huhaviya me huhaviya huya kea vaiye. 15 Nevaigeno mukia veamoya Yisasina ageteya tusi muse nehuya amaiyayeya moli falu fala hutenae. 16 Yisasia mage huno hamavige “Naafene hutama mo huhaviya me huhaviya nehae?” huno hamavige. 17 Higeno nagola anile maiya kanomoa mage huno hie “Humavenelina kanomogae Kefo Avamumoa nafanenimona agupi haimaineno nafanenimo avayale maihiya humainegena kagaitega avalena neoe. 18 Neogi Kefo Avamumoa atafa huteno atalegeno takatino faemainegeno agalemoa selu selu nehigeno ave kume neganeno augafamoa apipupapu nehigena kagaienema tokaeya nemaiya anagafe ‘Kefo Avamula anatitaleho.’ huna huana ya hugeteya anatioatalenae.” huno hie.

19 Higeno Yisasia mage huno hie “Ae meni kanafima mainaya veamogatama nagaifena havitama tamakupina omalenetama tamametitia nohaya veamogatama namagi kanafi tamakaienena mainesugetama havigahae? Ohaviya yafena kasalo nenahae. Namagi kanafi tamakaienena kanaleya huna ako huna maisue? Nagaitega avaletama eho.” huno hie. 20 Higeya avaleya ageno Kefo Avamumoa Yisasina ageteno ani nafanemona alino kigepagige hia kava huteteno ali takatitalegeno ani nafanemoa mopafi asaga hulavino kasegase nehigeno agalemoa selu selu humaine.

21 Higeno Yisasia nefafena mage huno havige “Namagi kanafi ania haumaine?” huno havigegeno nefaa mage huno hie “Osi nafane mainegeno ania haumaine. 22 Mukia kanafina Kefo Avamumoa ayelakatitalegeno atafiene tipiene haefalisia kava nehigena kagaya kanale humainenuka kahau hulateka tahamao.” huno hie. 23 Higeno Yisasia mage huno hie “Naa higeka nagaifena kanale humainenuka nahamao huka nehane? Nagaifema agupi maleno ametiti nehia kanomoa mukia yana alu ya alu yana afaa hileasinagi.” huno hie. 24 Higeno aupaa ani nafanemona nefaa mage huno hie “Nagaya kagaifena nagupi malena nametiti nehuanagi nagupi malena nametiti hua yanimoa aupa nehigi alika ayaaya hunato.” huno hie. 25 Hanepaigeya veala tusiya huya amaiyayeya elitalu hageno Yisasia neamakeno Kefo Avamufena kemakino mage huno hie “Kagaya Kefo Avamumogae agesama ailileka avaya alilu kimainana Kefo Avamumogae hai kahapauve agupitila hatilavika vuo. Nagoa kanafina nagoene agupina haiofalo.” huno hutene. 26 Higeno Kefo Avamumoa ala kenake nehuno ani nafanemona tusiya huno alino kigepagige hia kava huteteno hatilavino ataleno vigeno ani nafanemoa fali vaya kana huno faemainegeya kasagoya veamoya “Ago falimaine.” huya hae. 27 Nehageno Yisasia ayate alino avalesaga hutegeno hetimaine.

28 Haenaga Yisasiene nopinaga haino mainegeya agaiaenema tokaeya nemaiya anagamoya amakaiamige maineya mage huya havigae “Tagaya ya hugetonana ani Kefo Avamula naa higeta anatioatalenone?” huya hae. 29 Hageno Yisasia mage huno hamapaiye “Maa augafa Kefo Avamula alu yatetila oanatigahagi Anumaya Kotitega ke huta havigesaya yatetike anatigahae.” huno hamapaiye.

30-31 Ani kumala neataleya Kalili kotegama vayana “Veamoya visua kumafena ohavisae.” huno higeya ako huya falakiya nevageno agaiaenema tokaeya nemaiya anagala Yisasia mage huno humavenelie “Ikapinagati emainea kanoa vayamo atenea kanoa agaila atafa huya avaleya vaya amayapi atesageya haesageno faligahie. Faliteno hevaitesageno tole yupa komufi maiteno tagufa (3) kana falimainesifitila hetigahie.” huno hamapaiye. 32 Anima hamapaiya kea havilama ohaya yafe kolia huya haviokenae.

33 Kapaneamu evayi huteya Yisasia nopi haino maineno amakaife mage huno hamavige “Katega naane kea kea hume hume emainae?” huno hamavige. 34 Katega neeya ma ke hume emainae “Kagaya ala kano mainapi nagaya kagasena ala kanoa mainoe?” huya huge havige hume aya kehenagiya kea ohuya mainae. 35 Mainageno Yisasia mopale maineno “Egena tamahapaino.” huno higeya tuelufua (12) anagala ageno mage huno hamapaiye “Nago kanomoa ‘Ala kanoma maisue.’ hinunofena haenagalafa maineno mukia veala kayo kayoma humatesiana ala kano maigahie.” huno hamapaiye. 36-37 Huteno nagola okasi nafanea avaleno amunoamifi hetiteneno avalesaga huno anukilineno mage huno hie “Nagoa veamoya nagaifema haviya maa augafa osi nafanema avaleya falu fala hisayana nagaiene navaleya falu fala hunenatae. Nagaima navaleya falu fala hisayana hunatenea Nenafaene avaleya falu fala huneatae.”

38 Yonia mage huno humaineane “Hulavenelina kanomoga tagaya agonana nago kanomoa kagai kagile Kefo Avamula vea amakusafinagatila anatineatalegeta neageteta takavema nohia yafe ‘Ania ohuo.’ huta ‘Aao.’ hutenone.” huno hapaiye. 39 Yisasia Yonife mage huno hapaiye. “Ani kanoa alitama ‘Aao.’ huoateho. Nagoa veamoya nagai nagile tokiyaage aliyama alisayana aupaa nagaifena huhaviyana huonategahae. 40 Veamoya kamema huotatesayana tagai kanapa maigahae. 41 Tamage tamahanepauve nagoa veamoya tamakayama Kalaisi nafanema mainaya yafe yasi tima tamamisagetama nesayana anonaa kanale miya aligahae.”

42 “Nagola osi nafaneni, nagaife havino agupi maleno ametiti nehisia nafanehema nagoa veamoya ‘Kefo yama huo.’ huya havi kapima avaletesayana tusia havi kava nehayanagina tusia kana ya amamigahue. Ala yafagefaleti ani kanomo ageyafi maleya nofi kiteteya hage lipi hagayu hutalesayana afa ya kana kana ya haneanagi nagaya tusia kana ya amamigahue. 43-44 Kayamoa ‘Kefo yama huo.’ huno kavaleno havi kapima katesigekahena ani kayana aifakalitalo. Aifakalitalesanana kanale hugahie. Kaugafamoa haviya humainesia kanoma maisanana hano ohisia kahaimula hanesia kano maigane. Havigu tole kaya hanenageka kefo ya hisana kagesa kaminegeka kefo yama humainana yafe kavaleno hani yapi agola tegelege nehia atafi hagayu hugatalegahie. 45-46 Kaiyamoa ‘Kefo yama huo.’ huno kavaleno havi kapima katesigekahena ani kaiya aifakalika atalo. Aifakalitalesanana kanale hugahie. Kaugafa haviya humai kano maisanana hano ohu kahaimula hanesia kano maigane. Havigu tole kaiyamoa kefo ya hisana kagesa kaminegeka kefo ya humainana yafe kavaleno hani yapi agola tegelege nehia atafi hagayu hugatalegahie. 47 Kaulagamoma agea yafema kefo yama hisana kagesa kaminagekahena ani kaulaga ali fayika atalo. Ali fayitalesanana kanale hugahie. Nagoke kaulaga hanesigeno Anumaya Kotia kava yagaimainea kumatela umaigananagi havigu tole kaulagamoa kefo ya hisana kagesa kaminegeka kefo ya humainana yafe hani yapi tegelege nehia atafi kavaleno hagayu hugatalegahie. 48 Anima ata legelege nehia kumapi veamoya ani atafi mainageno kani kafaamimoa ofalisigeno atamoa asua ohugahie.

49 Hagema kavete falea avamete huno veala mukiamogatamina ataleti falelamategahie. 50 Hagea kanale ya haneanagi hagaagema nehia yamaa hanoma hisiana hanaa hutama hagaagema nehia yamaa ali falote hugahae? Hage kana yana tamakuafi hanesigetama alava hutama nagoke tamaku tamakesale kigi yokalo hutama maiho.” huno humaine.