1 Anumaya Kotima kava yagai-mainea yamo aepa hesia kanamoa maa hugahie Yisasia avame kea mage huno hie nago kanomoa anea meni kanoa ali-mainea kanoa egahe higeya tenia (10) vele omainaya munanemoya lamuamia nealiya katega neuya avalegahe umainae. 2 Vayana faefua (5) munanemoya aifonafo hageya faefua (5) munanemoya kanale havi haviyamia hane. 3 Ani aifonafo munanemoya kanaleya huya lamua aliya vayanagi ata kaesaya tina oaliya umainae. 4 Vageya kanale havi haviyaamima hanea munanemoya kanaleya huya lamuma hanagalisaya tina keayopi taki-liya lamuamiene aliya umainae. 5 Umainageno ani ama alisia kanoa aupaa omegeya ani munanemoya agava-mainageno amau lokotoko higeya faeya mainae.

6 Faeya mainageno kege amunona nagola ala kemoa mage huno hie “Ama alisia kanoa ago neegi tamakaya kategati movaletama eho.” huno hie. 7 Higeya mani tenia (10) velema omainaya munanemoya hetiya lamuamia hanagaliya talo tala hae. 8 Hageya aifonafo munanemoya kanale havi haviyamima hanea munanehena mage huya hae “Tagai lamumoa ago asu hisia kava nehigi atama nelea tina keayopitamifiti takitama tamiho.” huya hae. 9 Hageya kanale havi haviyamima hanea munanemoya kenonaamia mage huya hae “Tagaiene tamakaienema aye halesuna timoa kosa ohenegi tamakaya afeno nopiti mo miya hiho.” huya hama-paiye. 10 Hageya ani timaa miya hugahe vageno ama alisia kanoa anile egeya talo talama hu-malaya munanemoya agaiene ala kave negahe nopinaga hai-falageno fita agola ki-malene.

11 Ki-malenegeya haenaga aifonafo munanemoya mage huya me hae “Ala kanomogae ala kanomogae fita yaki-la-to.” huya me hae. 12 Me hageno ama alisia kanomoa mage huno kenonaamia hie “Aao tamage huna tamaha-nepauve no-tama-koa anaga emainae.” huno hie. 13 Yisasia mage huno hie “Nagayama esua yupamona kanaaenena ohavinaya yafe menia kava yagaiho.” huno hie.

14 Yisasia Anumaya Kotia kava yagai-mainea yamoa maa hu-maine “Nago kava kanomoa ayaaya kotega ugahe nehuno aliya vayaamofena ke higeya ageno monea ali fako huno amamite amamite hie. 15 Aliya aepaamia ageteno nago kanomona faefu tauseni kina (K5,000) amino nago kanomona tole tauseni kina (K2,000) amino nago kanomona vani tauseni kina (K1,000) amino huno amamite amamite huteno alu kotega umaine. 16 Umainegeno faefu tauseni kinama (K5,000) amigeno ali-mainea kanomoa ani moneleti aliya aligeno ava monea nago faefu tauseni kina (K5,000) aliteno teni tauseni kina (K10,000) higeno ali-maine. 17 Ali-geno tole tauseni kinama (K2,000) ali-mainea kanomoa ani moneleti aliya aligeno ava monea nago tole tauseni kina (K2,000) aliteno foa tauseni kina (K4,000) higeno ali-maine. 18 Ali-geno vani tauseni kinama (K1,000) ali-mainea kanomoa ani monea alino mopafi kafino kava kanomo monea he-vai-malene.

19 Ani aliya vayamogami kava kanomoa ayaaya kanagefa umaiteno eteno eno mage hie ‘Monema fako huna tamaminoa monea namagi mone malenae?’ huno hama-vige. 20 Hama-vigegeno faefu tauseni kinama (K5,000) aminea kanomoa teni tauseni kina (K10,000) alino neeno mage huno hie ‘Kava kanomogae musekaa nehugi faefu tauseni kinama (K5,000) naminapitila etena ava monene alugeno teni tauseni kina (K10,000) hane.’ huno hie. 21 Higeno kava kanomoa mage huno hie ‘Kagaya kanale kano maineka kanaleya huka osi mone kanoa kaminofitila efi efi huka aliyana alinageno ala hu-maineafe ala yakefa kagaila kava yagaisanafe kamigahue. Nopinaga ehaigetaa tokaetaa muse hutaa maiano.’ huno hie 22 Higeno tole tauseni kinama (K2,000) aminea kanomoa mage huno me hie ‘Kava kanomogae musekaa nehugi kagaya tole tauseni kina (K2,000) naminapitila ava monene tole tauseni kina (K2,000) higena alina neoe.’ huno hie. 23 Higeno kava kanomoa ani kanomofena mage huno hie ‘Kagaya kanale kano maineka kanaleya huka osi mone kanoa kaminofitila efi efi huka aliyana alinageno ala hu-maineafe ala yakefa kagaila kava yagaisana yafe kamigahue. Nopinaga ehaigetaa tokaetaa muse hutaa maiano.’ huno hie. 24 Higeno vani tauseni kinama (K1,000) aminea kanomoa eno mage hie ‘Kava kanomogae musekaa nehugi kagaya keage kanoa alu kanomo yana alika kaugafa hegeka omai kano mainane. Nago kanomoa hoyaafima kali-malenea yaene alika negeka omai kano mainane. 25 Mainanafe kolikaa huna vani tauseni kinama (K1,000) naminanamaga mopafi kafina he-vaina ka-tenoanagina menia kagaikaa yanagina negamue.’ huno hie. 26 Higeno kava kanomoa ani aliya kanohena mage hie ‘Kagaya havi kanoe. Feluage aliya kano mainane. Kagaya ago nehavine nago kanomoma hoyaafima kali-malenea yaene alina negena omai kano mainoa yafena kagaya ago havimainano? 27 Naa higeka monema nemalaya nopina monenima malenateasina menia nagaya nagoa ava monene aluleasine. 28 Vani tauseni (K1,000) kinania hafaletama teni tauseni kinama (K10,000) malenea kanomona amiho. 29 Nagaya tamaha-nepauve nagoa yaamima hanesia veamogamina nagoene amamisigeno kasago hu-ma-tegahianagi nagoa yaamima omalenesia veamogamina ali-linesaya yamaa hamana-falegahie. 30 Ani havi kavama nehisia aliya kanomona hani yapinaga avaletama hagayu hu-talesageno tusiya huno avia neateteno avekemoa hugahie.’ huno hie.”

31 Yisasia nagoene mage huno hie Ikapinagati emainoa kanoa vayamo natenea nafanemona kava yagaigahema esuana tokiyaage hale yaniaene ensole vayaene tokiyaage hale yanialeti kava yagaisua siale maigahue. 32 Mainesugeya mukia kotega veamoya nagaite melitalu hisagena sipi sipile neyagaiya kanomoma memene sipi sipiene ali fakoma nehia avamete huna mukia veala ali fako hugahue. 33 Ali fako hutena sipi sipiyaga tamaga nayatega neamatena memeyaga hauga nayatega amategahue.

34 Amatetena ala sauve kanomona tamaga nayategama amatesua veafena mage huna hugahue “Nenafaa kanale manua tamaminea vealagi eho. Ma mopama taloma hu-mainea kanaleti aepa heno tamakaife huno talo tala hu-maleteno kava yagai-mainea kumatelagi emaiho.” huna hugahue. 35 “Nagaila nagama tegetama kavela naminae. Tifema nagegetama afaa naminae. Natu kanoma ogetama navaletama falu fala hu-natetama notamifina na-tenae. 36 Kenanima omalegetama kena fai-natenae. Kalima alugetama navaletama yagai-natenae. Kinafima mainogetama nagegahena emainayane. Naa kavama hu-mainayafe talo hu-lama-tenea kumatela emaiho.” huna hugahue.

37 Hugeya tamaga nayategama fatago kavama nehaya veamoya mage huya hugahae “Anumayamogae na yu kagala tegeta kageteta kavela kaminone? Na yu tifena kagegeta tina kaminone? 38 Na yu natu kanoa evayi hanageta alita kanale huta ka-tenone? Na yu kenakaa omalegeta kena kaminone? 39 Na yu kalia alinageta kage-mainone? Na yu kinafina mainanageta mo kage-mainone?” huya hugahae. 40 Huya hisagena ala kava kanomona kenonaamia mage hugahue “Tamagelafa huna tamaha-nepauve tamakaya amakima omale nagananimogamima ani kavama hu-ma-tayana nagai ani kavala hu-natenae.” huna hugahue.

41 Hugahuanagi haoga nayatega veafena mage huna hugahue “Tamakaya hu-haviya hu-matenoa kefo kavakeya nehaya veamogatama mai-haletama viho. Sataniene aliya vayaaenena agola tegelege nehia atafi maisaya kumala ago talo hu-malenogi ani kumate agola umaiho. 42 Nagaila nagama liana kavela onaminae. Tifema nagegetama tina onaminae. 43 Natu kanoma ogetama navaletama falu fala hu-ona-tenae. Kenanima omalegetama kena fai-ona-tenae. Kalima alugetamao kinafima maugetamao me onagegenayane.” huna hugahue. 44 Hisugeya kenonania mage huya hugahae “Anumayamogae na yu kagala tegeta kage-mainone? Na yu tifena kagegeta kage-mainone? Na yu natu kanoa anageta kage-mainone? Na yu kenakaa omalegeta kage-mainone? Na yu kalia alinageta kage-mainone? Na yu kinafina mainanageta kage-mainone? Tagayama kage-mainoteasina ago kaya hu-mainoteasine.” huya hugahae. 45 Hisagena nagaya etena amakaifena mage hugahue “Tamagelafa huna tamaha-nepauve tamakaya amakima omalenea nagananimogamina ani kavama hu-oama-tayana namona nagaiene hu-ona-tenayane.” huna hugahue. 46 Huteno kefo yama nehaya anonaamia hu-ma-tenageya agola amakata aisia hani yapi maisaya kumate ugahagi fatago kavama hu-mainesaya veamoya ofaliya agola maige maige hisaya kumate ugahae huno hie.