1 Yisasia mage huno hu-maine “Havigu tamakaya veamogami amaufima kanale kava nehisageya ‘Nageteya kanale kano maine.’ huya hisae.” hutama nehae. Ani kavala hisayana anonatamia hai ali-mainagi ikapinaga mainea Nelamafaa kanale kava haya yafe anonatamia otamamigahie.

2 Ani yafe tamakaya kafuma hisaya veala amaya hutamama amamigahena ala kefiti keha keha hutama oamamitama kesi ako hutama amamiho. Nagoa vagala vayamoya mono nopiene kategaene “Veamoya tageteya ‘Kanale kava nehae.’ huya takia alisaga hisae.” huya keha keha huteya vaya amaya nehayanagi nagaya tamagelafa huna tamaha-nepauve kanale anonaamia hai ali-mainayanagino Anumaya Kotia nago yana oamamigahie. 3 Kagaya kafuma hisaya veama amaya hugahena tamaga kayamoa hauga kayamo hisia yana oagesigeka kesi momaya huo. 4 Kesi ako huka veamoya onagesagi huka amaya hisanana ani yakaa Anumaya Koti, Negafaa, kesi kavama nehaya yana neagea kanomoa age-maineanagino kanaleya huno anonakaa kamigahie.

5 Nunamuma hutama havigegahena vagala vayamoya nehaya kava hutama Anumaya Kotina havi-okeho. Ani vayamoya mono nopiene ka agegayaleene “Muki veamoya tagesae.” huya hetiya Anumayamotega havinegae. Nagaya tamagelafa huna tamaha-nepauve vayamoya anonaamia hai ali-mainae. 6 Ali-mainagi kagaya oagesaya kava huno mainea Nelafana Anumayamotegama havigegahena nokafinaga fita ki-maleteka maineka falakika havigesanageno Negafaa kesi kavama haya yama neagea kanomoa ani yana ageteno anonakaa kamigahie.

7 Nunamuma hugahena Anumayamo kema nohaviya veamoya havinegaya kavala hutama kasagoya afa keyaga hutama havi-okeho. Ani veamoya ayaaya nunamu ke nehuya mage huya amakesa nehaviye “Ayaaya ke huta havigesunageno havigahie.” huya nehae. 8 Nehagi amakaya nehaya kavala amakave omaleho. Nelamafama havi-oketama maiya kanafina nago yatamima omalene hutama haya yatamia ago havimaineafe nagoene tutu hu-oateho. 9 Anumayamotega havigenutamahena mage hutama havigeho “Ikapinaga mainana Nelafaga kagai kagimoa alu aotage huno hanesie. 10 Kava yagaisana kanamoa efalote hisie. Kahaisia kavala ikapinaga nehagi mopaleenena kahaisia kavala hisae. 11 Meni kanafina nesuna kavela tamio. 12 Tagaya havi kavama hu-la-tenaya veala aige amateta kefo yaamia atale-ma-tona kava huka kefo yatia aige-tateka atale-lato. 13 Kana yapiene Satanima aye-lavataga hisia yapiene tavaleka otato. Satania ‘Kefo kava hiho.’ hunoma hu-la-tesigeka tahamaika tavalesaga huo.” huno hu-maine. 14 Huteno mage huno hie tamakaya havi yama hu-lamatenaya veala aigeama-tetetama kefo yaamima atale-ma-tesayana ikapinaga mainea Nelamafaa ania huno kefo yatamia aige-tamateno atale-lama-tegahie. 15 Atale-lama-tegahigi tamakaima ali-havi yama hu-lama-tenaya veafena aigeama-tetama kefo yaamima atale-oama-tesayana ikapinaga mainea Nelamafaa ania huno kefo yatamia aige-tama-teno atale-otamategahie.

16 Tamakaya Anumaya Kotitegama havigegahena kavela mositama mainutama tamaugosa kalagunagu ohiho. Vagala veamoya ani kava huya amaugosafina hapaene tanefaene faleteya mage nehae “Veamoya tageteya kavema mosi-mainona kavala tagegahae.” huya nehayanagi tamagelafa huna tamaha-nepauve naa kava nehaya veamoya anonaamia hai ali-mainae. Tamakaya ania kavala ohiho. 17-18 Tamakaya Anumayamotegama havigegahena kavema mositama nemainutama titeti tamaugosa alitama masavema falesayana mukia veamoya kavema mosisaya yafena ohavigahagi mai falakino mainea Nelamafaa falakino hanea yana agaiage neageafe anonatamia tamamigahie.

19 Monetamiene afenoyatamienena ma mopale halaya ohiho. Halaya hu-malenesageno toto ayeno hakanomoya ali haviya higeya veamoya notamifi haiya ani yatamia musufa aligahae. 20 Naa hugahagi ma mopafi yafena tamakesa havi havi ohutama haenagama ikapinaga kanale yama alisaya yafe meni kanafina Anumayamofe tamakesa havi havi hutama maiho. Ikapinaga mukia yama malesayana totona ayeno okasaligahie. Hakanomoa ali haviya ohugahie. Nagoa musufa veamoya ani kumatela musufa yana ohugahae. 21 Muse yatamima malenesaya kumatefe tamakesa havi havi hutama ani kumate umaigahae.

22-23 Tamaulagamoa tamakupinaga aye halesia lamu hane. Tamaulagamoa kanale yama huno agesiana tamakupinaga ai-hale-mainegi tamaulagamoma kefo yama agesiana tamakupinaga hani-ki-maine. Ai-hale mainesia yamoa tamakupima asu hisigenoa hani kiteno ala hanikefa kino aye-talako hu-maine.

24 Nagoke kanomoa “Tole kava kanolatamo aliya kanoania maisue.” huno ohisie. Naama hisiana nago kava kanomofena “Nahaiya kano mainane.” huno hu-tegahianagi nago kava kanomofena “Hai vaiteno naipa nagata aiya kano mainane.” huno hugahie. Nago kava kanomona agua amiteno nago kanomofena “Falote onahaiya kava nehane.” huno hugahie. Tamakaya ania hutama Anumaya Kotifeene moneheenena ali lokaeana “Kava yagai-natesae.” hutama ohiho.

25 Ani yafe nagaya tamaha-nepauve kanaleya hutama maisaya yaene kave nesaya yaene ti nesaya yaene tamakesa havime havime oviho. Tamaugafale kena failisaya yafeenena tamakesa havi havi ohiho. Kave neyana aifa letale yanagi tamahaimula kanaleya hutama maisaya ya hane. Kena fai-lisana yana amegale yanagi veanea tokiyaage ya mainae. 26 Haleyama vaiyatete nehaya namayaga ageho. Amakaya avina yana nofaiye. Kavela hoyafinagati aliya nopina mo nomalagi ikapinaga mainea nelamafaa kavela neamamigi tamakaya Anumaya Koti aulagafina namayaga amakasetama mainaya veane mainayafe tamakaienena kava yakai-lama-tegahie. 27 Tamakaipitila nago kanomoa “Ofalina nagoene maime maime haigahue.” huno tokiyaage agesama havisiana anima havisia katela hanaa huno falote hugahie? Aao falote ohugahie.

28 Naa higetama kenatamihena tamakesa havi havi nehae? Ageho talapinaga vilasiyamoya haiya ausea nehae. Aliyana aliya kenaamia talo huya fai-noaligi kanale kenaamia hanegeya mainae. 29 Nagaya tamaha-nepauve nayoma mainea ala sauve kanotamia Solomonia kanale kenaa fai-lianagi ma vilasiyamoa kanaleya huno agase-maine. 30 Tala yana meni kanafina hoyafina haneanagi ega hataga huya atafi kae-talegahagi Anumaya Kotia ani tala yana kava yagaigeno kanaleya huno hanegi tamakaya mukia veamogatama nagaifena tamakupi maletama tamametitia osi kanoa nehayanagi Anumaya Kotia ania huno tamakaila kenatamia alino hilato hu-lamategahie.

31 Ani yafe “Kaveene tiene na ya negahune?” hutama tusia tamakesa havi havi ohiho. “Na kena fai-ligahune?” hutama tamakesa ohaviho. 32 Ani augafa yafena Anumaya Koti kema nohaviya veamoya amakesa havi havi huya nemaigi ikapinaga Nelamafaa nesaya yaene kena fai-lisaya yaenefena ago havimaine. 33 Havimaineafe tamakaya hagotetama Anumaya Kotima kava yagaisia kumate visaya yafeene agaiama nehaiya fatago kavama hisaya yafeene tamakesa havi havi hisayana Anumaya Kotia ani yaene mukia kavetamiene kenatamienena tamamiteno ani kumatela tamavaleno tamategahie. 34 Naa hu-maineafe “Ega hanaa hugahune?” hutama tamakesa ohaviho. Egama efalote hisiana tamakesa havi havi hisaya yaenena efalote hugahie. Nagoke yupa falote hisia kana yana ani yupa kanoage tamakesa haviho.