1 Nago yupa Yisasia nago kotega maineno Anumaya-motega ke huno havige-maine. Havigeteno agaiaene tokaeno nemaiya anagapiti nago kanomoa mage huno havige “Anumayamogae Yoniene tokaeya nemaiya anagamogamina humavelimainea kavala huka ‘Naa maa hutama nunamuna hiho.’ huka hulavelio.” huno hie.

2 Higeno Yisasia mage huno hie “Nunamuma hinutamahena mage hutama hiho ‘Nelafaga kagai kagimoa alu aotage huno hanesie. Kava yagaisana kanamoa efalote hisie. 3 Mukia kanafima nesuna kavela tamio. 4 Tagaya havi kavama hulatenaya veala aigeamateteta kefo yaamia atalematona kava huka kefo yatia aigetateka atalelato. Satanima ayelavataga hisia katela tavaleka otato.’ hutama hiho.” huno hamapaiye.

5 Hamapaiteno mage huno hie “Hana kanomoga kege amunona negafute uka mage huka hugane ‘Nenafugae talia (3) maya yoka namisano? 6-7 Nago nenafua kategati eana nesia yana omalegi kanale namisano?’ hukama hisanageno negafua nomaafinagati make huno kahapaisio ‘Kasalo nenahaegi natalo. Fita ago ki-maletena nafaneyaganiene ago fae-mainonanagita nagaya hetina nahavigana yana okamigahue.’ huno hisio? 8 Aao tamahanepauve ‘Negafuma mainoe.’ huno hisia yafena oamigahigi tutuma hia yafe hetino havigea yana amigahie.”

9 Ani yafe tamahanepauve Anumaya Kotitega nago yafema ke hutama havigesagenoa ago tamamigahie. Nago yafema atiyesagenoa afaa tamaveligahie. Fitalema akalu-kaluma hisagenoa Anumaya Kotia yakilamategahie. 10 Mukia havigesaya veamoya aligahae. Atiyesaya veamoya ali falote hugahae. Fitalema akalu-kalu hisaya veamogamina fita yakimategahie. 11 Hana kanomoga nafanekamoa noyamehema kahavigesigeka nefaga osifavea alika amigano? Aao ani yana alika oamigane. 12 Kokole amufema kahavigesigeka yapavena alika amigano? Aao ani yana alika oamigane. 13 Oamiganagi tamakaya havi veane mainayanagitama nafanetamimona kanale ya amamiyanagi ikapinaga mainea nelamafaa tusiya huno tamakase-maineanagitama havigesageno Alu Aotage Avamua tamamigahie.

14 Nago kanomona Kefo Avamumoa aguafi mainegeno avefuna alino aiyahae higeno agea noaiyane. Yisasia ani Kefo Avamula anati-talegeno vigeno ani kanomoa age aino kea kea higeya alitalu hu-mainaya veamoya ageteya tusia amamayo aimainae. 15 Amamayo neaigeya nagoa veamoya mage hae “Pielesepulia Kefo Avamuyagale kava hu-mainea kanomoa tokiyaa amigeno Kefo Avamumona anati-neatalie.” huya hae. 16 Hageya nagoa vayamoya aye-vataga hugahe mage hae “Monafinagati avame yana hugeta tokiyakaa agamano.” huya hae.

17 Hageno Yisasia amakupinagama ma haviya amaku amakesa ago haviteno mage hie “Nagoke kotega veamoya aye fako huya tuma hisayana ani kotega veanene haviya hu-lavigahae. Nago afamo aye fako huya ‘Alu vaya mainone.’ huya tuma hisayana ani afamola haviya hu lavigahae. 18 Satania anagaaenema aye fako huya ‘Alu vaya mainone.’ amakaiami tuma hisayana Satani kava yagaisia tokiya hanaa huno hanegahie? Aao tokiyaa omalegahie ani yafe tamakaya nagaifena ‘Pielesepulimoa tokiya kamigeka ani yateti Kefo Avamula neanatine.’ hutama nehayanagi havige nehae. 19 Nagaifena ‘Kagaya Pelesepulimo tokiyaleti anati neatalane.’ hutama hayanagi tamakaitami anagatamia Kefo Avamula amanati-talageno Pielesepulimo amakaila amaya nehio? Ani anagatamia amakaiami manima haya kea ali fako huya tamaveneliye. 20 Tamage nagaya Anumaya Koti tokiyaleti ani Kefo Avamula anati neataloe. Ani yafe Anumaya Kotia kava yagaisia yana tamakaitela ago emaine.

21 Nagola tokiyaage kanomoma nomaafima ati kevea alino yagai-maleno maisiana mukia yamaamoa kanale huno hanegahie. 22 Nagola tokiyaage kanomoma eno ani tokiyaage kanoenema tuma hisaana tokiyaage kanomoa agasesiana hagote kanomoma ametitima huno mainea ati kevea melino ani kanomo afeno yamaa musufa alino vayaamogami amamite amamite hugahie. 23 Nagoa veamoya nagai kanapa veane omaisayana kame vayania mainae. Nagoa veamoya sipi sipiniama naya huya ali-taluma ohisayana amanati neatalae.” huno hie.

24 Nago Kefo Avamumoa vaya aguafi haino maineleti ataleno viayamo hau hu-mainea kopinaga mo vaiyatete huno mai-faluma hisia kumafe ati neaye. Ati ayegeteana mai-falu hisia kumala omalegeno “Hagotena maigena emainoa aguafi etena mo maigahue.” huno hie. 25 Uno mogeana ani agupi ago sese huno kanaleya hu-malenegeno mogemaine. 26 Mogeteno eteno viayamo sevenia (7) kefo kavaamimoma agase-mainea Kefo Avamuyaga momavaleno egeya ani agupi hai-faleya mainageno hagotenoa ani kanomoa nagoke Kefo Avamumoa aguafima mainegeno haviya huno maineanagino menia mukia Kefo Avamumoya aguafina haiya maigeno tusia kefo ya hutafa huno maine.”

27 Mani kema higeya anifima alitalu hu-mainaya veanefiti nago amoa ala kefiti mage huno hie “Katetenoma numa kaminea amona Anumaya Kotia tusia muse huno haiya yana amine.” huno hie. 28 Higeno Yisasia mage huno hie “Ani amoa musena hugahianagi Anumaya Koti kema haviya akave malesaya veamoya tusia muse hugahae.” huno hie.

29 Mukia veala agaite melitalu hageno mage huno hamapaiye “Menia ma kanafima mainaya veamoya tusiya huya kefo veane mainae. ‘Tokiyaage avame yana tavelio.’ huya hayanagi Anumaya Kotia ani yana oamamigahigi nagoke avame yana nayoma mainea aune kanoa Yonama hutenea tokiya avame yana tamaveligahie. 30 Yonana noyamemoa asaga huno nakaigeno talia (3) yupa aipafinaga maineafe Ninive mainaya veamoya avame yana amaveli-maineane. Nagaya ikapinagati emainoa kano vayamo natenea kanomona menia ma kanafima mainaya veamogamina nagaya ania kavala hisua kavania avame yana tamaveligahue.

31 Nagola alu haupalegati emainea sauve amoa mopamona atupaleti eno Solomonia kanale agu agesaene kanomo kea havigahe emaineanagi haviho Solomonina agase-mainea kanoa ma mainegetama tamakaya agai kea nohaviye. Nohaviyafe Anumaya Kotia kaiyekema hulamatesia yupa ani amoa hetino menia ma kanafima mainaya veafe kefo kava hutama agai kema ohavinaya yafena hu falote hulamategahie. 32 Ninive kumate mainaya veamogamina Yonaa Anumaya Koti kea hamapaigeya kefo yaamihena amaipa aiyahae hu-mainagi haviho menia Yonana agase-mainea kanoa ma mainegetama tamakaya kefo yatamihena tamaipa aiyahae nohae. Tamaipa aiyahae nohayafe Anumaya Kotia kaiyekema hulamatesia kanamoa Ninive kumate nayoma mainaya veamoya hetiya menia ma kanafima mainaya veamoya havi kava hu-mainayafe hu falote hulamategahae.”

33 “Veamoya lamua hanagaliteya nopinaga hanesia komufinaga omalegahae. Susufaneletila aiso ohugahagi ani nopima hai falesaya veamoya agesayafe sipale nemalae. 34 Tamaulagamoa tamakupinaga aivasa hisia lamu hane. Tamaulagamoa kanale yama agesiana tamakupinaga aivasa hu-mainegi tamaulagamoa kefo yama agesiana tamakupinaga haniki-maine. 35 Tamakesa havilama hiho ‘Nagupinaga aivasa hu-maine.’ hutamama hisayana asu huno haniki-mainesia yafe hisagi kava yagaitama maiho. 36 Mukia tamaugafa aivasa hisigeno nagoke kaiyaga hanima okisiana lamumoma aivasa hia avamete mukia lamakupinaga tusiya huno aivasa hugahie.” huno hie.

37 Nagola Falasia kanomoa Yisasifena mage huno hie “Menia kagaya nagaiene kavela me negane.” huno higeno Yisasia kave mo negahe Falasia kanomo nopi haino mopale maine. 38 Mainegeno ani Falasia kanomoa mogeana Yisasia kavema negahena ayana sese ohuno mopale maiya yafena agesa havi havi huno maine. 39 Mainegeno Yisasia mage huno hapaiye “Tamakaya Falasia vayamogatama amega kava hutama masutamiene yopatamiene amega kaiyagaa sese nehagi tamakupina musufa yaene kefo yatamiene hiya hulamatenegetama sesela nohae. 40 Tamakaya aifonafo vaya mainageno Anumaya Kotia amega kaiyagaage talo nehuno agusafinaga talo ohuneo? 41 Masutamiene yopatamienema hanesia kavela kasagoya yaamima omalenesia veamogamima amamisayana tamakuamoa oniyaage ohugahie.

42 Avonio Falasia vayamogatama kayeho. Tamakaya supu tala yaene atuene hefi kana yaene osi osi yana alitama tenia (10) malenafiti nagoke Anumaya Kotina neamitama nehayanagi fatago hutama maisaya yaene Anumaya Kotifema lamahaisia yaene ago atalenae. Hagotetama fatago hutama mainetama Anumaya Kotifena tamahau tamayamopafi tamahau-maineanagitama haenagaa supu tala yaene atuene hefi kana yaene tenia (10) malenafiti nagoke Anumaya Kotina amisayana kanale hugahie.

43 Avonio Falasia vayamogatama kayeho. Mono nopima neutama ‘Kava vayayaga nemaiya sialefekeya maigahune.’ hutama veane atagu nefaya kumapina ‘Nagaifena ala kano mainane huya hisae.’ hutama nehae. 44 Avonio tamakaya kayeho. Tamakaya vaya hevaimatenaya komu kana hutama mainae. Tamakuamoa oniyaage higetama falaki-mainageya veamoya oniyaage yama hanea komufi vaya hevaitenaya komule oageya ute ete nehae.” huno hie.

45 Higeno nagola kahegi kema havilinea kanomoa kenonaa mage huno hapaiye “Hulavenelina kanomogae ani kema hanana tagaienefe tagaye hia ke nehane.” huno hie. 46 Higeno mage huno hie kahegi kema havilinaya vayamogatama tamakaifeene nehugi avonio kayeho. Tamakaya kahegi ke malenaya ke hutama tusia kanaage ya mukia veamogami amayonale malenetama amaya hugahena nagoke tamakinagoa maletama amaya ohageya tusia kana yakefa nealiye.

47 Avonio kayeho. Tamakinago-moya Anumaya Koti amaune vayaa hamayageya fali-mainayanagitama tamakaya anima fali-mainaya amaune vayamogami komulega vilasi hoya maitama nehae. 48 Vilasi hoya maitama nehayafe “Tamakinagomoya amaune vayala hamayageya fali-mainaya yafena kanale kava humainae.” hutama nehae. 49 Anumaya Kotia kanale agu agesaene kanomoa mage huno humaine “Nagaya nagaini amaune vayaene Aposolo vayaene amakaipina visageya nagoa veamoya ali haviya humateya nagoa veamoya hamaesageya faligahae.” 50 Hamayageya fali-mainaya yafe ma mopama talo hu-mainoa kanafina aepa heya mukia kafua amaune vaya hamayageya fali-mainagi tamakaya meni kanafima mainaya veamogatama amakaima humatenaya havi kavamo anonaamia aligahae. 51 Hagoteno Epolona haegeno fali-maineane. Nagoa hamaeme hamaeme ageno hano hutegeya haenagalafa Sekalaiyana ala mono no kegiyamo amunopi yafa folamole heti-mainegeya hayageno fali-maineane. Nagaya tamage huna tamahanepauve hamayageya fali-mainagi tamakaya menima mainaya veamogatama hu-mainaya havi kavamo anonaamia aligahae.

52 Avonio kahegi kema havilinaya anagamogatama kaye ho. Mukia Yisasi kea havimainayanagi veamoya ohavisae hutama fita ki-maletetama yakisaya ki nofila ago alitama atalenae. Tamakaya “Ani nopi ohaigahune.” hutama haleti nagoa veamoya “Hai falegahune.” huya haya veamogamife “Hai ofalegahae.” hutama katile neamatae huno hamapaiye.

53-54 Yisasia ani nopiti hati-lavigeya mukia kahegi kema havilinaya anagaene Falasia vayaene akave neuya tusiya huya amaipa kafa heteteya amata huya alu yafe alu yafe agaila havige havige nehuya mage hae “Agaiama hisia keleti atafa huta kaiyekea hutegahune.” huya humainae.