1 Polofe “Lomu kumate tipi kalefi ugane.” huya huteya avaleya nagoa nofipi mainaya vayaene amavaleya ati vayate kava kanomo ayapi amatenae. Ani ati kanomo agia Yuliusie. Ani kanoa Sisaa, Sauve kanomo, ati kanoa maineane. 2 Nagaya Lukunae Alisatakusiene Poloene umainone. Alisatakusia Masetoniati kanoe. Osi kumaamo agia Tesalonaika kanogino tagaiene vigeta nago Atalamitiumu kumate tipi kalefi haisaga humaunageno tipi kalemoa Esia komo haopalega haigahe higeta hai-mainone. 3 Nehaunageno kotigeta ega Saitoni kumate hai vayi hunageno Yuliusia Polona ali kayone huneateno “Kanalelagika vayakamogamitega visanageya ali kanale hulamatesae.” huno tatalegeta umainone. 4 Umaigeta Saitoni kumala neataleta yasimoa tusiya huno alino halage higeta yasimoa osima hisiafe nago hagelimo amunopi hanea kumamo aupate eumainone. Ani kumamo agia Saipalusie. 5 Hagelipi Silisiaene Pamafilia kumaene mogaseta Maila euvayima hunana ani kumamona ala agia Lisia eumainone. 6 Maila mainonageno kava humainea ati kanomoa nago Alekasatalia tipi kalea ageteno ani tipi kalemoa Lomu ugahe higeno tavalegeta ani tipi kalefi haisaga humaita eumainone.

7 Tipi kalefima unana aiyayeno ounegi kasagoya kanagefa hako hako huno vigeno osi yasi kanoa aligeta Nitusi umainone. Yasimoa osi higeno nagola timo amunopi hanea kotega Kaliti komo aupate unana Salamone kumala aupaale hane. 8 Kaliti limo agegayalega hako hako huta unana nago kumamo agia Kanale Ti kahaepatele huya nehaya ti agegayalega euvayi humainone. Ani agegayalega ala kumamo aupate Lasie huno hane.

9 Hako huta una yafe ayaaya kanagefa katega neunageno Yuta vayamoya kave monesiya kanamoa ago falote hianagi timoa ayamufa aigeno Poloa ani vayafe mage huno hamapaiye, 10 “Nagaya nagesa havuana tipi kalefina kasageke huta nevisunageno afenoyatiene tipi kalene tagaitiene tusiya huno alihaviya tahaugahie.” huno hamapaiye. 11 Hamapaiyanagi ati vayate kava kanomoa ani kea havino agupina omaleanagi tipi kalemo kayomaalema nealia kanomo kene tipi kalemo nefa kene havino akave malenegi Poloma hia kea havino akave omalene. 12 Akave omalegeya ani kumala tusia yasima alia kanafinagiya kanale huya maisaya kumala omalegeya tipi kalema nealiya vayamoya ke huge havige huteya “Ani kumala neataleta Finikisia, Kaliti kumamo haupalega nagola tipi kalema malesuna kumafe avame huta visune. Ani kumatela yasima alisia kanalela mo maigahune.” huya humainae.

13 Amuko yasimoa ako huno aligeya “Kanalelagita ugahunagi afaa vigetao.” nehuya tipi kalema atafa hulino nemaiya yana alisaga huteya ani lipi kalea Kaliti limo agegayalega eumainae. 14-15 Enevageno Kaliti kumateti tusia yasimoa alino egeta “Eteta ani kumate ugahune.” huta hunanagi ani yasimoa tipi kalea melino haviya huno aiyahae huno atalegeno ani yasimoa ayetufegeta emainone. 16-17 Onana nagola hage limo amunopi hanea kumala osi kumamo avate eumainone. Ani kumamo agia Kautae. Neonageno yasimoa osia alino laga higeta tusi aliya aliyaamoya hevayu huya osi tipi kalea alisaga huya ala tipi kalefi maleneya ani ala tipi kalemoma kofa-nafa ohiseafene huya nomo aiyafi nofila kitafa humalenae. “Yasimoa ayetufesigeta Afelika komo ti kahaepatega mo haviya hugahune.” huteya anale asai-malenaya kena yasimoma ayetu-nefea kena kalu heya afepi maletageno yasimoa ayetu-fegeta emainone. 18 Neeta mo faonageno koma neliana timoa ayamufaage higeya ani lipi kalefima hanea afenoyayaga aliya kalemoa yoyo huno visiafene huya hage lipi hagayu hagayu hu-talenae. 19 Tagufa (3) kanale tipi kalemo aliya yamaa amakaiami amayapiti aliya tipi hagayu hagayu hutalenae. 20 Kasagoya kanagefa yagene kanefienena oagogeno limoa tusiya huno ayamufa aigeta taugafa aligatisia yafema tametiti nehuna yana ago ataleta “Ani lipi fanane hugahune.” huta maita humainone.

21 Nehuya vayayaga ayaaya kanagefa kavela oneya maigeno Poloa amunoamifi hetino mage huno hie “Nafunaganagatama tamakaya havi kava hutama hagotenama tamahapauva kea ‘Kaliti kumala oatalesune.’ huna hua kea ohavinae. Tamakayama havileasina ma ma ali haviyama hulatea yana falote ohigeno afenoyatienena ovayagileasine. 22 Nagi menia tamahanepauve kolia ohutama tokiya vaitama maiho. Tagaipitila nago kanoa ofaligahigi tipi kaleage haviyana hugahie. 23 Nagaya Anumaya Koti nafane mainoanagina mukia kanafina agia alisaga hume hume neogeno meni kegela agaia ensole kanomoa navate me heti-maine. 24 Heti-maineno mage huno nahapaiye ‘Pologae kolia ohuo. Kagaya Sisa aulela mo hetigananagino Anumaya Kotia mukia mani lipi kalefi kagaienema nevaya vayamogamina amaugafa aligatigahie.’ huno nahapaiye. 25 Nahapaiyafe tamakaya mukiamogatama kolia ohiho. Anumaya Kotia nahapaiya avamete huno ani kate hugahie huna nagupi malena nametiti nehue. 26 Nehuanagi yasimoa ali haviya hisigeta nagola ti amunopi hanea kumate vailagailita ugahune.” huno humaine.

27 Ani tipi kalefina tole sota onageno timoa ayamufaage higeta Metiteleniani hage li amunopi onageno kege amuno higeya tipi kalefi aliya vayamoya “Kumate uvayi hugahe aupa nehune.” huya humainae. 28 Huteya augelifipi amegafi huya nofimo atupale tumo tumo yana kanaage ya ayeteya atalageno tipinaga lavitegeya alisaga huya agayana augelimoa ayaayaamoa fotia (40) mita humaine. Nagoene osia utonageya ania huya tipinaga ani nofila ataleteya agayana ti augelimoa tetia (30) mita humaine. 29 Higeya “Havigu yafa agupifi visunageno yafamoa tahaiyafene.” huya koli huteya foa (4) tipi kalema atafa hulino maisia yana tipi kalemo aia kapiti tipi atalageno lavi-mainegeno yagemoa aupaa evayi hisiafene huya nunamuna humainae. 30 Nehuya tipi kalefi aliya vayamoya koli huya “Faleta ugahune.” nehuya osi tipi kalea ali-talageno lipi lavigeya mage huya vayala ayemavataga hae “Tagaya kalema atafa hulino maisia yana agosisinapalega atalenone.” huya ayemavataga humainae. 31 Hageno Poloa ati vayafeene amakaiami kava kanomofeene mage huno hamapaiye “Mani vayayagama ala tipi kalefima omaisayana tamakaila tamaugosamoa fanane hugahie.” huno humaine. 32 Nage higeya ati vayamoya osi tipi kalema atafa hulinea nofila taga hutalageno osi tipi kalea tipina umaine.

33 Yagemoa evayi hugahe aupa higeno Poloa mukia vayamogamife mage huno hie “Tole sotana koli hutama kavela mositama onenagi menia kavela neho. 34 Lokiyaage ke nagaya tamahanepauve ‘Kavela neho.’ huna nehue. Kavela netetama tokiya aligahae. Tamage lamahanepauve mukiamogatama kanale hutama uvayi hugahae. Nagoke kanoa fanane ohugahae.” huno humaine. 35 Mani kea nehuno maya alino amaulagale Anumayamotega muse nunamu huno havigeteno kolino nemaine. 36 Negeya ageteya amaipamoa kanale higeya amakaienena ania huya kavela ne-mainae. 37 Tagaya lipi kalefima mainona vayala tu hataleti seveti sikisia (276) vaya mainone. 38 Kavela nemamu huteya tipi kalemoa kanaagela ohisie huya viti avinayaga tipi aliya atalenae.

39 Yagema vayi higeya agayana noagaya kotega uvayi huteya agayana nagola timoa moyetagena humainea yatela kanale ti kahaepa hanegeya ageteya “Lipi kalemoa anile aupaa visie.” huya humainae. 40 Huteya tipi kalema atafa hulino nemaiya nofila hekano hutaleteya aliya moli kagi meli kagi nehaya kayote kimalaya nofila aliya kaleyo humaleteya yasi alisia kena anale maleya atafa humalageno tipi kalemoa aiyayeno ti agegayalega ugahe nehie. 41 Vianagi tipina kahaepamoa agoyagefa hai-mainea kahaepate haino anifi mo vailino agoyamona atafa huno tokiyaage huligeno kanagela ohuno hanegeno timoa tokiyaage huno aia katega aino kofanafa humaine.

42-43 Kofanafa higeya ati vayamoya nofima humatenaya vayafena “Hamaesunageya falisae. Havigu nago kanomoa tipiti faleno visigi.” huya hayanagi ati vayate kava kanomoa Poloa ofalisia agesa nehavino “Naa ohiho.” huno huneama-teno mukia tipi nagosa neaiya vayafe “Nagosa aitama ti agegayalega viho.” huno humaine. 44 Higeta mukiamogata tipi kalemoma haviya hia yosamo ayamufa alita agupile maiteta ayetufeta ti agegayalega umainone.