1 Poloa Kanisole vaya amaulagafi agesagali-maineno mage huno humaine “Nafunaganagatamae nagaya kanale ka vai neayena mukia kanafiene meni kanafiene Anumaya Koti aulagafina naguamoa nagola havi kavala ohune huna nehue.” huno humaine. 2 Higeno mono notema uhagote mainea kava kanomo agia Ananaiyasie avatema hetiya maiya vayafena mage hie “Avayale kayo aikoliho.” huno humaine. 3 Higeno Poloa agaifena mage huno hapaiye “Kagaya nagaifena ‘Haeho.’ huka nehananagi Anumaya Kotia kagaila kahaegahie. Kagaya haviya hia kegiyamo agupile efe peni fale-malenea kana augafa kava nehuka kaguafina havi omaleka amegati savale kanomogae. Kagaya kahegi kefiti kaiyeke hunategahe nehuka ‘Haeho huka nehananagi ani kea ali neatagayane.” huno humaine. 4 Huno higeya Polo avate hetiya mainaya vayamoya mage hae “Kagaya Anumaya Koti mono note uhagote mainea kava kanomofena kanale ohunea kea nehano?” huya humainae. 5 Hageno Poloa mage hie “Nafunaganagatama musetami nehugi nagaya havi kava hue. Agayama mono note hagote kava kano maine kema havimainoleasina mani kea ohuleasinagi. Anumaya Koti autamafina mage huno kae-maleneane ‘Kava kanotamimofena kanale ohunesia kea ohiho.’ huya kae-malenagena age-mainoane.” huno nehie.

6 Huteno Poloa haviana nagoa Kanisole vayala Satiusi vayalagi nagoa Kanisole vayala Falasia vayalagi huya mainageno haviafene huno mage huno hamapaiye “Nagaya Falasia kanogina nenafaa Falasia kanomo nateneanagina nagaya ‘Fali-mainaya vayala hetigahae.’ huna nametiti nehua yateti kaiyekea hunategahe nehae.” huno humaine. 7 Mani kema higeya haviteya Falasia vayaene Satiusi vayaene amunoamifi tusia ke vaiteya ani Kanisolefitila tolefi ali fako faka humainae. 8 Naafene? Satiusi vayamoya mage huya nehae “Vayayagama fali-mainesafitila heotigahae.” huya nehuya “Ensole vayaene avamuene omainae.” huya nehayangiya Falasia vayamoya ani yayagahena “Lamage mainae.” huya nehayane. 9 Anileti ala kefiti tusia ke nevaiya nagoa Falasia vayapiti nagoa kahegi kema havilinaya vayamoya hetiya mage hae “Ma kanoma agonana havi kavama nehia yana omalene. Ensole kanofi avamumoafi hapai-mainesia kea havigu Anumaya Kotiene tu huyafenagita afaa atalesune.” huya humainae.

10 Nehageya kasagoya kema vaiya yateti ati vayate ala kava kanomoa Polona aluga alugati avayu hisalega amunopiti aiya aya ali akalupeyafene huno ati vayamogamife “Lavitama amunoamifiti Polona avalesaga hutama tokiyaage notifinaga avaletama moteho.” huno higeya movaleya umainae.

11 Ani kegela Anumayamoa Polo avate me heti-maineno Polofe mage huno hapaiye “Kolia ohuka kagu kamena ali lokiya vaika maiyo. Kagaya Yelusalemuma maineka nagaifema hamapai-mainana kava huka Lomua mo huhaleka hamapaigane.” huno humaine.

12 Faeteya koma neliana nagoa Yuta vayamoya alitalu huya mage hae “Polona haesunageno falisie. Anumaya Koti aulagafina tamagelafa nehune menia tiene kaveene mosita maineta falisia yupa hataka huta negahune. Haesunagenoma ofalisiana Anumaya Kotia ali-haviya hulatesie huya hulokiya vai-mainae.” 13 Ani kema hulokiya vai-mainaya vayala fotia (40) vayamoya humainae. 14 Ani vayayagamoya mono note kava vayateene soka vayateene uya mage huya mo hamapaiye “Lagaya Polona haesunageno falisie huta menia tiene kaveene mosita maineta falisia yupa hataka huta negahune huta Anumaya Koti aufina hulokiya nevaune. 15 Nevaunafe menia tamakayaene Kanisole vayaene ati vayate kava kanomofe ke hutama mage hutama hiho ‘Kaiyeke hutegahunagi Polona tagaite avaletama eho.’ hutama higeya yaufa tamakaitega evayi ohuneya katega avaleya neesageta hayamano.” huya humainae.

16 Hageno Polona asaamo nafanemoa ani kea haviteno ati vayamogami nopinaga haino Polona hapai-maine. 17 Hapaigeno Poloa nagoa ati vayate kava kanomofena ke higeno egeno mage huno hapaiye “Ma nafanea mukia ati vayate kava kanomotega avaleka visanageno nago ke hapaisie huna nehue.” huno humaine. 18 Hapaigeno mukia ati vayate kava kanomote avaleno vigeno mage huno mo hie “Nofipi kanoa, Poloa, ke higena ugeno ‘Ma nafanehe nago ke kahapaigahigi kagaitefe avaleka vuo.’ huno higena avalena eneoe.” huno hapai-maine. 19 Hapaigeno mukia ati vayate kava kanomoa ani nafanea ayate alilino avaleno agegayalega anakaianige umaineana mage huno havige “Naane ke nahapaigahe emainane?” huno havige. 20 Havigegeno ani nafanemoa mage huno hapaiye “Yuta vayamoya ke huya haya kiteya kagaifena mage huya kahavi-gegahe nehae ‘Ega Polona Kanisolete avaleka esanageta nagoene kemo aepaa havisune.’ huya kahavi-gegahe nehae. 21 Huya hugahagi amakai kea havika akave omalo. Ani vayapiti fotia (40) vayaene nagoa vayaene Polona haekahe kafo maleneya mage huya hae ‘Menia tiene kaveene mosita maineta falisia yupa hataka huta negahune. Haesunageno ofalisigenoa Anumaya Kotia ali-haviya hulatesie.’ huya Anumaya Koti aulagafina hulokiya vaiteya menima kagaya avalekama visanafene huya kagava mainae.” huno humaine. 22 Higeno mukia ati vayate kava kanomoa ani nafanemofena mage huno hapaiye “Manima nagaima hufalote huka nahapaina kea nagoa vayala hamaopaiyo. Nagi kagaya nagaitegatila ago vuo.” huno hutegeno umaine.

23 Tole kanolatana ati vayate kava yagai-mainaa kanolatafe ke higeana aageno mage huno hanapaiye “Talo tala hutana meni kegela naeni (9) kiloki tu hataletia (200) ati vayaene sevetia (70) hosi agupifi nevaya ati vayaene tu hataletia (200) keve nehaya ati vayaene Sisalia ugahae. 24 Poloma maino visia hosi afuene talo tala hutetana aluya hutana kava yagaitana Polona fatago hutana avaletana ala Kamani kava kanomo ayapi moteo. Ani kanomo agia Filikisie.” huno humaine.

25-26 Huteno avona kaeno mage huno humaine “Nagaila nagia Kolotiusi Lisiasinae tusi kanale Kamani kava kanomoga Filikisigale mani avona kaena hu falu fala hunegatoe. 27 Yuta vayamoya mani kanomona atafa huya hae falisaya kava hayanagi agaya Lomu kanoma mainea ke havitena ati vayaniene ani vayamogami amayapitila mo-vale-mainoe. 28 Kaiyeke hutesaya kemo aepaa havigahe Kanisole vayaamile avalena lavimainoe. 29 Avalena lavi-mainena havuana amakaiami ‘Kahegi kea atagae-maine.’ huya hayanagi falisia augafa havi kavala ohune. Nofi hutesua augafa kefo yaenena tamage huno ohune. 30 Ohunegi nago kema havuana nagoa vayamoya ‘Kesi falakita haesunageno falisie.’ huya haya ke me nahapaigena havitena aupaa kagaitega hutogeno vie. Vigi kaiyekema hutesaya vayamoya kagaitega mo hufalote huya hu fatago hisageka havisane huna hamapaugeya nevae. Kenia male hano hie nagaini nagia Kolotiusi Lisiasinae.” huno avopina kae-malene.

31 Ati vayamoya kava kanomo ke akave maleya kege Polona avaleya Atipatalisi kumate umainae. 32 Mo faeteya nagoa ati vayamoya eteya ageya hosimo agupifi nemaiya ati vayamoya Polona avaleya umainae. 33 Sisalia uvayi huya ani avona ala Kamani kava kanomona mo-miteya Polona agai aule avaleya mo hetitenae. 34 Mo heti-mainegeno ala Kamani kava kanomoa ani autama alino hapalino haviteno Polona mage huno havige “Kagaya hana kotega kano mainane?” huno higeno “Silisia kano mainoe.” huno humaine. 35 Higeno haviteno mage huno hie “Kaiyekema hugatesaya vayama evayi hisagena kaiyekekaa havigahue.” huno nehuno ati vayafe “Helotima kimalenea Kamani nopi avaletama kava mo yagaitegeno maino.” huno humaine.