1 A kum tistising, a ururop na wasiso ri, a tumusi torom mot: Mot in gasgas uni mot anun a Labino. A gas sur an tumus melet a kum utna ra a sa tumus tari munung torom mot, sur in warut mot.

2 Mot in tumarong mot gusun a kum ngalngalia na pap, a taro ra det pampam a sakino, ma det tok laulau a pinpinin a taro, ma det ususer det lena, ra ka di tok talilis a pinindet, ka din ulaun det.* A tinotok talilis i a ukinalong di pami sur in ese i lena a musano i ara tagun a taro anun o God ra det mur a kum Warkurai anun a taro Juda. 3 Dat ra dat lotu torom o God nama dekdek ina Niono, dat kut ra, a taro mulus anun o God, i elar nami ra di sa tok talilis tar a pinindat. Ka dat nurnur una pinapam ra a taro det pami, awu. Dat gas kut una pinapam ra o Karisito Iesu i sa pam tari un dat. 4 Ra gunuk a pinapam anun a taro i ulaun dat, iau ut an pet lar pasi sur an nurnur uni. A kum pinapam ra det nurnur uni, iau a wakak doko taun det. 5 Iau a te Israel, tagun a kabotaro Benjamin, a te Ibru ma a mur anundet a kum petutna. Ra i sa tiwal na bung bat iau, di tok talilis a pining. Iau a Parisi ma a ser mur wakak a kum Warkurai anun o Moses. 6 A dekdek doko sur an mur kodos pas a pinapam anun o God, ma una nung a pinapam ra, a banlaulau a kum tene lotu anun o Karisito. Ra gunuk taio in tokodos uni i mur rop a kum Warkurai, katu etakun in los iau.

7 Ikut a kum utna rop ri, ra numugu i labo torom iau, uniri i utna oros mukut torom iau, i kibino un o Karisito. 8 Lingmulus, a kum utna rop ri, det a kum utna oros mukut torom iau. Ara utna kut ra i labo i lenri: an tasman o Karisito Iesu anung a Labino. Kibino un o Karisito, a sa ubek ru a kum utna rop ri. Det elar mukut nama beren umatang, sur an los pasi mukut o Karisito una nung a nilaun, 9 ma an patop tomo nami. Ma ausur iau a tene tokodos uni a mur a kum Warkurai, awu, kibino kut uni a nurnur una Karisito. O God i watung dat a kum tene tokodos uni dat nurnur una Karisito. 10 A nemi sur an tasman o Karisito ma a dekdek ina nun a katkatutur melet gusun a minat, ra a nemi lena, an tur tomo nami una nun a kum ngunungut, ma an elar ut nami una nun a minat. 11 I lenkutra, a nurnur lena, iau kai an katutur melet gusun a minat.

12 Ausur a nuki lena, a sa utur ukai a kum utna rop ra, ma ka tokodos mulus utmakai. Ikut a dekdek utmakai sur an utur ukai a utna ra o Karisito Iesu i kabo pas iau suri. 13 A kum tistising, ka nuki lena, a sa utur ukai i. Ikut ara utna ra a pami, ka nuknuk melet sur asau ra tagun numugu, a dekdek mukut sur asau ra kuri numugu tang. 14 A kalabor usa numugu sur a ururopino sur an los pas anung a ikul. A ikul, i a kakabo anun o God torom iau sur a nilaun sapat una langit, kibino una Karisito Iesu.

15 I wakak sur dat, ra dat tur dekdek, a nuknukindat in lenra. Ikut ra a nuknukimot in senene un tu utna, o God ut in utalapori torom mot. 16 Ikut dat in mur a wakak na nilaun ra dat sa utur ukai pasi.

17 A kum tistising, mot in mur anung a kum ngas na petutna, ra a sa pam larlar tari torom mot, ra i wakak sur mot in tamtama murmur det ra det muri. 18 Uni a susut na dino a sa inanos tar mot lena, a susut det laun elar nama kum ebar anun in nanai kutus anun o Karisito. Ra uniri a inanos melet mot, ma a lurlur na matang i puku. 19 Det wan mukut sur a iniru, a nemnem na pinindet i anundet a god. Det uman nama kum petutna ra din maimai uni. A nuknukindet i kis kut una kum utna taginin upiso. 20 Ikut dat, a taro tagisapat una langit. Ra dat kis langlang nama labino nemnem sur a Tene Ulaun, ra in nan pirso tagisapat netes, a Labino o Iesu Karisito. 21 In pukus pas a pinindat ra ke dekdek, sur in elar nama pinino ra i bukus nama minamar. In pukusi nama dekdekino. A dekdekino ra i papam nami sur in ubek tar a kum utna rop utuntudu ina nun a warkurai.