1 Tane Israel apanawa bola Sitim bedewe waimoie apana mona nina dewawa Moab iotopa do dewasaie. 2 Tane Moab iotopa Israel apanawa nisomoieno mo godiu mampe pulontoia bedewe odeiena. Ita do nana naie mo godiu wadaposimoie. 3 Mo epe dewantone Baal-Peo godiwa wadaposisaie, sa baiwa Iawe God mo mampo nuawa kadiidaleno nuakadiwa wanaubeno ien.

4 Ita Iawe God Moses mampe wane wanase, “E ne emanawo walamo sabamo apana uwauntoia apanawa uduudu bomoa. Ita ne nuakadina Israel apanawa osouwo iena epa, mai dewasapa, dia.”

5 Sa baiwa Moses Israel apanawa uwauntoia diamone wanase, “E deadea wainilana bedelawo mo mida nomone antone Baal-Peo godiwa wadaposisaiena bomonatuwapi.”

6 Tane Moses ita Israel apanawa ape kakaiwa moape ke waie waimoie. Ita mo eweio Israel apanawa dea Midia iwa banlene me wandia apewa bedewe alen. 7 Tane Aron atawa Piniasi Eliesa otopa pirisi nolawa dewasadia dewa ema ewene apana auweia emone nosene alene e waden, 8 ita Israel apanawa sa wawe alene ape bedewe oden. Ita me e mampe apana eine ita i bupa dosane eino bontoiena. Ita walama sawo Iawe God matangelawa kero kadiwaida wanaubeno iena dialen. 9 Tane matangela sa bedewe apana wisiawa 24,000 kero wadamono bontoiena.

10 Mape Iawe God Moses diene wanase, 11 “Aron atawa Piniasi, pirisi nolawa dewasadia Eliesa otopa ne insedina ruaida dewasan. Me epe dewasana mampe apana mai god lagawaa wadaposisapu, dia. Tane ne os wadaposineampa. Ne mo mampo nuana kadileno kadimopona saiwa me diasan. 12 Sa baiwa e me diaa, ne wanwan euda obasa sauawa badowa me mampe itudina. 13 Me nuawa kadileno ebona wiwirawantompa baiwa Israel apanawa kadiu riasan ita mo kadiu insadabuamona. Ita tauma sauana badowa me ita me nosinosiwa do osouwo itudina. Mo pirisi nolawa dewasampe ita akasantopu.”