Taiya dle so
Taiya dle so buka ya꞉ dulu koko
Lukta ka꞉yapa ya꞉ buka dla ka꞉dle yu Yesu Keliso kokoye ilipame matle Taiya dle so buka iye ilimuwapo.
Oplami Luk iye ka꞉yapa tuwale siyomalalo tiyama tle dokota oplami halemama ya꞉mkale Polota God yu hamsela꞉lati ya꞉ mate sela꞉iyo.
Buka itapo Yesuta popo sila꞉time Pepele di dla hetlati alotle sosta kotiyamale kokoye atlapo. Taiya dle so buka dulu hema atlamale kokoye sokomoko 30 epapele dulu dla pumama wowoyampuaiyo.
Epapedeme di sapta 1-7 edla natipo ka꞉yapa ka꞉dle yuye Yu so siyapo miyelo Yelusalem dla hame ha꞉ha꞉uwapo. Amasiyama sapta 8-12 dla di natipo, ka꞉dle yuye Yu so opi Yelusalem alikili dla ha꞉ha꞉le so dla hamtaleye. Epame ma sapta 10 edla di natipo po-Yu sota ka꞉yapa ka꞉dle yu dalepame mikadepe dleye. Epame alotle sapta 13 tle tame mosukulu dla di natipo Polota mo meyelope meyelope dle hapuloma Yu so dla epo po-Yu so dla ka꞉dle yu hamtale kokoye.
Luktapo Taiya dle so buka dulu hema ilimale koko patoto dapiyamte ipo.
Ka꞉dle yuye opa hapuloma mo meyelope meyelope dle dla ha꞉ha꞉mta so yiolepo. Adipalati, Godtapo Ka꞉dle yu i hamiwaye hatlo Yu so dla pohamina, hao, po-Yu so watle ma hamiwapo.
Epame ma koko haleye ipo. Taiya dle so bukata ka꞉yapa Hela꞉dle Sokota mikadepe dle so dla tulli kokoye imapo. Epame etle kotiyapame puame wata oloma hema Hela꞉dle Sokota sos hapuloma dla gademhalemama itiyamale hapimhalapo.
1
Yesu Pepele dimo dla hamamhetale
1-2 Tiyopoles namkale,
Na꞉ta buka ka꞉yapa ilipo wa꞉ watle hamiwa dulu dla Yesuta koko hamsela꞉le mate imale mate ma-ilimuwapo. Epame ya꞉ye Pepele di dla hamamhetlowe mape ma-ilimuwapo. Epedeme Yesu ya꞉ ala pohamame hetlalo halemama Hela꞉dle Sokota itiyamale tle Taiya dle so ya꞉ta hohomale watle molo atlale yu atlamuwapo. 3 Ya꞉ epame wabasi tle sila꞉time 40 alila dulu dla sela꞉mama Taiya dle so watle tame wowoyamsela꞉uwapo, ya꞉tapo ikadepe ma pasakalo dle koko dla yia꞉ta mikadepe dlepo depame. Epo yia꞉ mate sela꞉mama God ya꞉ mo kokoye atlamsela꞉uwapo.
4 Epedeme alila haleta Taiya dle sota Yesu mate yimkata Olipi tamali di dla tame alupo popa꞉lati Yesuta yia꞉ watle yu itiyamale mate ipo atlaiyo, “Wua꞉ Yelusalem meleme tamiyo. Amasiyama na꞉ Ata atlale koko eta puluwe dla dalemha꞉ha꞉mama omha꞉ha꞉iye. Adipalati, na꞉ta yu iye wua꞉ watle ma-atlamuwapo. 5 Epapedeme, Yonta opa yú siyapo dla ka꞉ka꞉timuwapo. Amasiyama alila mateka꞉pi dla wua꞉ye Hela꞉dle Soko dla ka꞉ka꞉timelepe,” diyo.
6 Epalati yia꞉ta Yesu watle epo atlaiyo, “Lod, wa꞉ Isalael sota mo hapuloma ma omha꞉ha꞉lepo depame itiyamale wata ma hamipa꞉?” diyo.
7 Amasiyama Yesuta yia꞉ watle epo atlaiyo, “Hatlo Atapo alila epapeleye ya꞉ta itiyamale tle hatitimdepo. Epedeme wua꞉ta alila epapeleye malamolowe poka꞉dena. 8 Amasiyama Hela꞉dle Sokota wua꞉ dla tullupiye, wua꞉ itiyamale halepe. Epame wua꞉ na꞉ kokoye opa hapuloma dla atlamtelepe, Yelusalem tle kotiyapame Yudiya mo pato dla epo Samaliya dla epame ta꞉lamo pato sukulu gugudle dla,” diyo.
9 Yesu yu i atlepo hallati Pepele dimo dla hamame hetaiyo, yia꞉ me-omha꞉ha꞉lati. Epalati wualata puame Yesuye bopudemama yia꞉ta natilowe kukomaiyo. 10 Amasiyama yia꞉ ala me-omha꞉ha꞉lati opa dapiyamte tluka kamkamale didiyeleta pakasiyamalalo yia꞉ mateka꞉pi dla woyapo ha꞉ha꞉mama epo atlaiyo, 11 “Ga꞉lili so, wua꞉ adipapalati omapla di dla ala me-omha꞉ha꞉ma꞉? Wua꞉ inoma dali tle hamame hetale Yesu iye matle ilame pumama mepo mallepe,” diyo.
Taiya dle oplami hale Matiyas hamale
12 Taiya dle sota Yesu Pepele dimo dla hetla omha꞉ha꞉po depo Olipi tamali di tle ma Yelusalem dla ilame tamalaiyo. Yelusalem eye Olipi tamali tle pase pateka꞉muyo. 13 Yia꞉ Yelusalem dla tame yia꞉ta ha꞉ha꞉lalo aya dla hetaiyo. Taiya dle so iwolotapo aya dulu hema ha꞉ha꞉iyo, Pita mate epo Yon mate epo Yeims mate epo Endulu mate epo Pilipi mate epo Tomas mate epo Batolome mate epo Ma꞉tiyu mate epame Alpiyes yami Yeims mate epame Loum gamani so mate opahale demhalale oplami Saimon mate epo Yeims yami Yudas. 14 Epapeleye Taiya dle so iwolotapo wola꞉ opi mate epo Yesu ya꞉ wai Meli mate epo Yesu ya꞉ eidulo mate alila hapuloma alupame inoma sumsiyamdiyo.
15 Alila haleta mikadepe dle so hapuloma, 120 epapeleta yimkata alupo popa꞉iyo. Epalati Pitata sila꞉time yia꞉ watle epo atlaiyo, 16-20 “Mikadepe dle so namkadulo, na꞉ta wua꞉ watle Yudas kokoye atlowepo. Ya꞉ye di alumale dulu dla dia꞉ mate oko hatlo hamsela꞉uwapo. Epapele tlope ya꞉tapo Yesuye opahale so dla hamame iwapo. Epalati asiyama aiyalma aya dokopala sota ya꞉ watle mani hamiwapo. Epalati Yudastapo mani e hamtame ta꞉la hauwapo. Epedeme ya꞉ ta꞉la edla tame teyumama kokota hopostepo elepalota gowala tulumama pouwapo. Epalati Yelusalem so hapulomata koko i dalepo, ta꞉la iye yia꞉ yu mate hi ipo sauwapo, ‘Akeledama.’ Hi i ya꞉ dulu kokoye omali ta꞉la demama apopo.
Epapedeme God yu bukata atlale yuye mo-mikadepe duwapo. Adipalati, Hela꞉dle Sokota imale tle Deibidita Yudas kokoye mo-powataliya God yu buka dla ilimuwapo. Epapele tle ya꞉ Sam buka dla yu eye ipo ilimuwapo,
‘Ya꞉ ayata aya siyapo hallepe,
oplami haleta pohallowa.’
Epame ma epo ilimuwapo,
‘Oplami haletapo ya꞉ oko ipiye halepe.’ ”
21-22 Pita ma epo atlaiyo, “Di ma Yudasta haluwa mo dla hallowe oplami hale hamolowa, ya꞉tapo dia꞉ mate Yesuta popo sila꞉tili kokoye atlamsiyamoloweye. Epapedeme oplami iye dia꞉ mate sela꞉mama Yon opa yú dla ka꞉ka꞉timsela꞉la natili mate epo Yesuye Pepele di dla hamame hetla natili mate tlo hamolowa,” diyo.
23 Epame mikadepe dle so hapulomatapo opa dapiyamte Yosep mate epo Matiyas mate huhulumaiyo. Epeleye oplami hale Yosep iye, ya꞉ hi dapahatlopeyo, ya꞉ hi opiye Balesabas epo Yustus. 24-25 Yia꞉ opa dapiyamte iwolo huhulupo popa꞉mama ipo inoma sumaiyo, “Lod, wa꞉ opa hapulomata momalamale wa꞉malamana. Epedeme opa dapiyamte hema wa꞉ta sale oplamiye di watle nati-ine, ya꞉tapo Yudasta hallalo mo dla halemama Taiya dle so oko ipi halepo depame. Adipalati, Yudasye batalimale koko hademe ya꞉ asiyama wotiyalle ma-hauwapo,” diyo.
26 Yia꞉ inoma sumale gudepame alotle ewala mate tatipiyele hale tatipiyeiyo, yia꞉ta opa dapiyamte huhulumale dulu dla Godta sale oplami tlo hamolowedeme. Yia꞉ epo tatipiyemtumama oplami hatlo Matiyas tlo hamaiyo. Epalati ya꞉tapo Taiya dle so oko halowedeme Taiya dle so opi mate hatlo godiyo.