1 Poli'nane, Timoti'ene Krais Jisasi kazokzo eri'zampi tragoteta kina hu'neta, Filipai kumate Anumzamofo naga Krais Jisasinte tamentinti nehaza vahe'ene mono kva nagamotane, eri'za tamaza hu'za eneriza naga'motma kre neramu'e. 2 Anumza nafatimo'ene Ranti Jisas Kraisi enena asuragiramanteno, rimpa fruzana agampu hurmanteno tamisie.

3 Hakare zupa tamagriku nagesa nentahi'na Anumzamofo muse hunentena, 4 maka nunamunia'fina musezamo avi'netege'na nunamu nehu'na maka'motma antahi neramue. 5 Ese'ma agafa hutma mono antahi'naza knareti tamagra nagri'ene tragoteta knare musenke huama hume menina neaze. 6 Na'ankure nagra antahi'noe, Anumzamo tamagripi knare eri'zama erigafa hu'nea eri'za erime nevnageno, Krais Jisasi esnia knare eri vgaregahie. 7 Na'ankure maka'motma nagu'areti antahi nerami'na, Anumzamofo knare musenkea huama nehugu kina nompine, megi'ane ruga'a vahepi, asunku'zana tarega'mota e'neru'e. 8 Na'ankure Krais Jisasi asuragirmantea zankura, nagra tusi'za hu'na nagesa nentahuankino, Anumzamo nagrira huama hugahie. 9 Nagra nunamuna huneramantoe, vaheku'ma avesizamante'zamo tamagripi me'neno ra nehnigetma, tamage antahi'zampine, knare tamagu tamagesafi hagegahaze. 10 Ana nehutma maka'zana refko hutma negetma, so'e zantfama hu'nesnia zanku nentahitma, avusese hutma fatgo zampi mani'nesnageno Kraisi'a eteno egahie. 11 Fatgo avu'ava'zama Jisas Kraisima eri fore'ma nehiazamo tagripi avinete'na, vahe'mo'za nege'za Anumzamofona ra agi nemiza, agi'a erisaga hugahaze.

12 Nafuhetane nasaraheta kma antahiho, kinafima mani'noa zamo knare musenkea (gospol) eri ra higeno vuno eno nehie. 13 E'ina hu'negu, Kraisi eri'zante kina hu'noa agafare, maka kinimofo avufare kva nehaza vahe'mo'zane, maka vahe'mo'za nentahize. 14 Kinama hu'noa agafare maka nenfu'zane nasarhe'zane zamagu'areti Rantimofona antahi nemi'za, korora osu'za hanaveti'za Anumzamofo nanekea zamagiteti huama nehaze.

15 Antahi'none, mago'amo'za hu'za tagra Kraisi naneke huama hugaragi nehu'za, ha' renenantaze. Hianagi mago'amo'za fatgo kante nehaze. 16 Fatgo avu'avapi e'neriza naga'mo'za, nagrira zamesi nenante'za Kraisi naneke huama nehaze. Anumzamo'a nagrira navreno ege'na, Knare MusenKe'agura kehara neroge'za nentahiza, 17 ha'ma renenantaza vahe'mo'za zamagra zamesi'zante Kraisi nanekea huama nehaze. Tamage zamagu'areti nosaze, hagi kina nompima nagri amuho namisagu ana nehaze. 18 Ana nehu'za amega zamagitetiro zamaguaretiro Kraisinkura huama nehaze. E'inama nehaza zankura nagra nagu'a muse nehue. Tamage, naguafina nagra muse nehue.

19 Na'ankure nagra antahi'noe, kina nompi mani'nogetma, nunamu nehaza zamo'ene, Jisasi Kraisi Avamu'mo naza huno nazeri atregahie. 20 Nagra mani'ne'na antahuampi, namema eritena antahuana, mago'zama nagazema erinami'zana osutfa hugahue. Hagi mika zupa nagra Kraisinte hanaveti'na manigahue, korapa'ma mani'noaza hu'na manisnuo, frisnua zamo'a, Kraisi ragi amigahie. 21 Na'ankure nagrama ksefa'ma manisnuana Kraisinte manigahue. Hagi frisnuana knare'zantfa erigahue. 22 Hianagi nagrama mopa navufane mani'ne'na, eri'zama erisua zamo rga rentegahie. Nagra ina kamofo avaririgahufi ontahi'noe. 23 Hianagi tarega kazigati e'nea zamo navazu huno rentrako hu'nenante, na'ankure fri'nama Kraisi'ene umani'snua zamo'a knare zantfa hugahie. 24 Hanki mopa navufane mani'nua zamo'a mago'ene tamagri tmaza hugahie. 25 Nagra nagu'areti antahi'noe, tamagrane tragote'na miko eri'za e'nerisugeno, eri'zamo ra hanigetma negetma, tamentintimofo muse'zama'a kegahaze. 26 Nagri'ma Kraisi Jisasi'ma hunante'nea zankura nagrama ete'na tamagrane umani'nenketa, musena hugahaze. 27 Kraisi knare musenke'amo hu'nesia kante anteta mani'nenke'na eme tamagegahuo, ontamagegahuo, magoke tamagu tamagesare ene antahintahi tmifina hanavetitma mani'netma, Knare MusenKe'afi tamentintia nehinke'na tmantahi'neno. 28 Keha'ma renermantaza vahe'mo'za, zamagra'zmi hakare kampinti traka hugahaze. Hianagi tamagra tmazahu'za erigahaze. E'i ana avame zana Anumzamo tamigahie. 29 Na'ankure Kraisinte tamentinti nehaza zantekukera ontami'ne, hianagi Agri eri'zampi kna erisnazegu, tamaza hu'ne. 30 Kote'na knazama eri'noana tamagra nage'naze, knafima nemanuana meninena nentahize, ama ana hara tamagrane tragoteta nehune.